الموضوع: هل انت مقتنع بالتعليم الخاص

التعليم
الصحة
الاسكان

بعتبرهم من اكبر 3 مشكلات بتواجهم مصر
للاسف فيه تلاميذ بتتخرج من ابتدائيه واعداديه وللاسف مش بيعرفوا يقروا ولا يكتبوا ( هتقولوا ازاى بينجح ، اقولك بينج بالغش) طلبه الدبلومات الصناعيه بتنجح بالغش
المشكلة مش انه اتعلم او لا
المشكلة انه بيطلع للحياه وعارف انه علشان ينجح فى حياته لازم يغش
الدروس الخصوصيه، الحشو والكم ، الكثافه العاليه فى الفصول
هل الدولة فعلا مهتمه بالتعليم وعارفه انه علشان تتقدم وتبقى دوله محترمه ومتحضره ان الحل الوحيد هوا انها تعمل تعليم بجد
عاوز اقول ان معظم القائمين على العملية التعليميه من المسئولين الكبار أولادهم مش بيدرسوا المناهج المصريه ولا بيتعلموا فى المدارس الحكوميه
كوريا الجنوبيه كدولة علشان تتقدم وتبقى دوله محترمه حولت كل الاستثمارات اللى عندها فى بداية التمانيات القرن اللى فات فى التعليم
الحقيقة انا شايف المشكلة مش جامعات خاصه او جامعات حكوميه
انما هى عيب فى المنظومة التعليم ككل

الصحة ، وزراة الصحة من افقر الوزرات فى مصر لانها مالهاش مورد دخل وبتعتمد على دعم الحكومه وحتى لو فيه موارد فهى مش بتغطى التكلفه او المصاريف
عاوز اقلكم ان مرتب الدكتور ولا حاجة ومش بيعدى 300 جنيه
مصر بقت موطن للاوبئة والامراض المعديه زى فيروسات الكبد
لو انت على قدك حالك ولا قدر الله تعبت يبقى هتبهدل فى المستشفيات الحكوميه

اما بقا الاسكان فحدث ولا حرج
الشباب مش لاقى يتجوز وفيه أسر بتعيش فى أوضه وأحيانا بيوصلوا 8 أفراد بيناموا فى أوضه واحدة
عاوزك تتخيل حجم المشكلات الأجتماعيه والأخلاقية اللى ممكن تنتج عن موضوع زى ده

عاوزك تتصور معايا واحد بيروح المدرسه وبينجح بالغش وعايش فى أوضة فيها 8 غيره ولما بيروح المستشفى مش بيلاقى علاج
وفى ظل تدنى للاخلاق ووجود كل ما هو هابط فى مصر
يبقى ده مجتمع عنده فرصه انه يتقدم او حتى يفضل زى ما هوا

ممكن تقولى ده نظرة تشاؤميه لكن للاسف ده واقع ولكن مش علشان نحبط ونحط ادينا على خدنا
كل واحد فينا لازم يحاول ياجماعة يبدا بنفسه وبعد كده باسرته واللى حواليه
وان شاء الله حالنا هيتصلح

انا أسف يابشمهندس محمود انا نسيت ارد على سؤال حضرتك
الحقيقة انا مقتنع بالتعليم الخاص لان فيه جامعات بتوفر امكانيات وطرق تدريس هايله وبالتالى تبقى جامعات كويسه جدا
زى الجامعه الامريكيه والجامعة الالمانيه والجامعه الفرنسيه فى مصر
وجامعه 6 أكتوبر تعتبر من الجامعات الجيده
أهم حاجه ان الواحد يتعلم صح ، يطلع من التعليم عنده ثقه فى نفسه وقدراته
انا هضربلك مثال عن حالتى
الحقيقة انا لما اتخرجت (على فكره انا خريج هندسة القاهرة 2004) وكان تقديرى جيد جدا واخر سنة كنت جايب امتياز
وبقالى تقريبا 3 سنين متخرج وماشي فى السنه الرابعه، الشغل لا يتعتمد على مهارات التصميم فقط وكميه الحشو الرهيبه اللى واحد درسها انما فيه مهارات اخرى زى
ازاى تطبق اللى انت اتعلمته
ازاى تستفيد من المعلومات اللى عندك
ازاى تاخد قرار
ازاى تقنع اللى قدامك بافكارك ووجهة نظرك
ازاى تفكر صح
ازاى تشتغل بروح الفريق وتبقى فعال
ازاى تبقى بروفشنال فى عملك وتبعد اى حاجة شخصية بعيد عن الشغل
طبعا فيه مهارات كتيرة الواحد اكتسبتها من الشغل وانا حاسس ان
محمد عز 2004 ومحمد عز 2008 عبارة عن شخصين مختلفين جدا فى كل حاجة

ومش معنى كده ان الواحد اللى اتعلمه مالهوش لازمه او غلط لكن فيه حاجات ناقصة كان المفروض الواحد اتعلمها

بم ان ده صميم عملى فاحب انقل وجهة نظرى:

- لا شىء كله جيد او كله سىء, بدايه اى اتجاه جديد (مثل التعليم الخاص) يعتبر حديث نسبيآ والحكم عليه بصوره مطلقه غير موضوعى
- اغلب التعليم الخاص الأن على المستوى الجامعى هو عمليه تجاريه بالدرجه الأولى وان كانت نسبة الجديه تختلف من مكان لآخر. مثلا المعاهد الخاصه كالموجوده على الدائرى والمعادى الجديده وطريق الأسماعيليه و 6 اكتوبر عليها الكثير من الغبار وانا شخصيا قمت بالتدريس فى احداها (أسوأها بالفعل) لمدة تيرم واحد و كانت تجربه مقززه. ممكن اعطيها تقدير عام مقبول
- الجامعات الدوليه ليست كلها طاهره, الأمريكيه اكثرهم (بمراحل) فى الجديه والأحترام ونوعية الطلبه وهيئة التدريس. بعدها بالترتيب حسب خبرتى تأتى الفرنسيه والألمانيه وأخيرآ البريطانيه
- التعليم الخاص هو الحل الوحيد! مثل أى شىء خاص. ولكنه يحتاج الى 10-20 سنه ليصبح ذو مستوى مرموق. والصناعه والسوق هما اللذان سيدفعانه للتحسن عكس الجامعات الحكوميه التى تصير الأن بالدفع الذاتى وستتوقف تماما عن اخراج اى فائقين فى خلال المده نفسها