شخصيات في NILE MOTORS شِعر حلابنتيشي ....(PAYOO)

**mbluethunder** · 20-05-2007 09:16 PM

رائع جدا يا هاني

هو ده بايو بتاع زمان لما كان بييكتب أشعار . ده أنا كنت بفكر أنقل الأشعار بتاعته من كونتاكت لهنا بس قلت مادام هو موجود مقدرشي ألمس حاجه :D

الله ينور عليك ياباشا وتعملنا أشعار كمان وكمان

**Karim_Monir** · 20-05-2007 09:32 PM

تسلم ايدك يا هاني
فنان يابني بجد
علي الاقل احلي من الشعر بتاع الريس حمام اللي بيقولو عليه بتاع فؤاد نجم

**اسامة عبد العزيز جابر** · 20-05-2007 11:35 PM

والله يا أستاذ هانى انت راجل سكرة والواحد بصراحة حب كل الناس اللى فى المنتدى هنا بالرغم من بعد المسافة لدرجة انى تخيلت أشكال الناس رغم عدم رؤيتى لهم وأن شاء الله نتقابل ضرورى
اخوكم
اسامة عبد العزيز :roll:

**hanyfarrag** · 21-05-2007 12:04 AM

تسلم إيدك يا أبو باسل
موهبة جميلة جدا:)

**د.أحمد سمير** · 21-05-2007 03:41 AM

على فكرة بايو خريج كلية ؟؟؟؟؟؟؟ الجميلة
لازم تكون جميلة علشان خرجت إنسان جميل
تقبل خالص حبي

**PAYOO** · 21-05-2007 07:03 AM

[align=justify:71d8e761f5]طبعا أنتم عارفين إني وعدتكم بأني مش هاعتق إللي هايعلق هنا في الموضوع ده وهاسمعه من الشعِر الحلابنتيشي البايخ بتاعي ده لحد ما يزهق مني ويبطل يدخل يقرا الموضوع ده خالص
عشان كده تعالو نبُص مع بعض على إللي علقوا على الموضوع ده[/align:71d8e761f5]

دخل أخونا الماهتما غاندي AlmAhAtmA
وعاجبته قوي كلمة عكاوي
وبدل ما يقوللي تعالى أتغدى عاندي
لقيته بيقول انه على صُحبيتي ناوي
والظاهر أنه جزار ومتخصص عكاوي
يا إما يكون شغال في محلات الشرقاوي

"سوكاسون" ده بقى من أعداء الصيني
ومن كـُتر مدخلاته من الغلب مواريني
هوه و"شريف المصري" تاعبين عيني
من كـُتر متابعة مواضعيه إللي ضد الصيني
وشكله هايعمل حزب برئاسة "موسوليني"
ويبقى شعاره الشيوعيه والأمبرياليه البكيني
وساعتها أنا ماعرفوش حتى لو صاحبي وأنتيمي

"شاركي" sharky بيقول عليا أني رايق
وأكيد "شاركي" مايعرفش الحقايق
يا شاركي لو تعرف إللي بيا كنت عرفت أني متضايق
بس أنا مابحبش وأنا مع أصحابي أبقى رخم
وتلاقيني مهما كان إللي بيا دايما مبتسم
لأن الناس مالهاش ذنب أدخل عليهم وأترسم
وأحب دايما مواضيعي تقراها وانت بتبتسم

المهندس حازم بيقول عليا أني شاعر
وأنا بصراحه معرفش عن الشعر إلا المشاعر
وأنا بس بكتب مشاعري عنكم في صورة خواطر
وماتوصلش أبدا للشعر لأن كلامي حلابنتيشي
وماتوصلش أبدا للشعر عشان أنا ما بافتيشي
دي مجرد كلامات زي عساكر وظباط في جيشي
وأنت فاهمني عشان صاحب اللقب قبل كده مارضيشي

محمد ممدح MMamdouhدخل بكلمتين لوذاذ
ولخص ومارضيش يطول عشان عنده جواز
وعشان ماعندوش وقت وطلعان عينه في الجهاز
بهديه أغنية المطرب "شعبان عبد الرحيم" والقزاز
إللي بيقول فيها "عليها العفش كله وعليا أنا الإزاز"
ومبروك مقدما يا حماده وخللي عليا أنا النحاس

عبدالله دخلني في سكه تانيه خالص
ولقيته عليا قارص
وعاوزني أءلف أغاني
لشعبان ولواحد تاني
وهو مايعرفش إن وداني وجعاني
من العالم دول بتوع هذه الأغاني
ولو "عبدالله" صاحبي بجد وعاوز مصلحتي
كان رشحني لـ"روبي" وللا "هيفا" وللا حتى "نانسي"
ساعتها يبقى بجد صاحبي وأخليه كل يوم يتغدا عندي

أما بقى صديقنا 911 turboإللي هوه "أحمد" بتاع عـُمان
إللي مداخلاته أغلبها عن التعديلات في العربيات الجنان
دخل يضحك ضحكه صافيه من بتوع زمان
ضحكه صافيه بجد زي قلبه الصافي كمان
أصل "أحمد" مصري أبن مصري من زمان
و والدته هيه إللي من عـُمان
وربنا يكرمه مطرح مايكون وفي أي مكان
ومايحرمناش من موضوعات التعديلات التمام

ودخل "نادر" يسألني انت خريج أيه يا بايوو كمان ؟
وفاكر إن الشِعر الحلابنتيشي بالتخصص زي زمان
ما يعرفش إن المشاعر لما تـُخرج بتبقى جنان في جنان
وربنا يصبره على الشِعر الحلابنتيشي ده من التواهان
وأقدر أكمل لكم القصايد وماحدش يبقى مني زعلان

مستر ميدو mr_midoo0 للأسف إني ماعرفهوش
وبالرغم من وجوده معانا ماشوفتهوش
وللأسف ماجتش فرصه أني أكلمه وماكلمتهوش
ولكن هاعذبه معايا ولوحد سألني هاقول ماعذبتهوش
كفايه عليه الشِعر بتاعي إللي هايخلي شَعره منكوش

نيجي بقى لـLegal_Adviser أ/"على حسن"
إللي كنت أتمنى أني اعرفه من زمن
وإللي لا كلام و لا شِعر ولا حتى الشجن
يقدروا يوصفوا محبته عندي إللي قد محبت جنة عدن
والناس معادن ... وهوه معدنه نفيس وما يتقدر بتمن
وأنا شايف إن شِعري الحلابنتيشي مش هايقدر يوصف
رجوله وشهامه وأدب وعلى المحتاج بيعطف
وكمان أنا مش عاوز أطول و أحلف
لأن قلمي حاسس أنه تقيل متكتف
ولو حتى كتبت بريشة عود وحاولت بيها أعزف
هتلاقو لحن للحُب والأخوه يغسل قلوبنا ولا أحسن مُنظف
حُب أخوه كبير وتقيل مش محتاج يتخفف
لأن إللي يعرف أ/على يبقى أكيد على الحـُسن أتعرف
وبصداقته وأخوته قدام كل الناس يتشرف
ولو دورت على صاحب جامد وعاوز تتعرف
يبقى أكيد مش هاتلاقي ضمير وقلب من كده أنضف
ومش عاوز اطول عليك أكتر من كده يا أبو ريم
ولو اني مهما أكتب مش هاقدر أعبر عن مدى التقدير العظيم
ومحبتك في قلبي و ربنا يبعد عننا الشيطان الرجيم

محمد باشا المرسي صاحب العربيه الأشهر
عربيتك حلوه وزي الفل بس للي يقدر
وماتقلقش من أي رأي حتى لو كان رأي الحاج "عنتر"
أنت أخترت وأتدبست ودا شيء مكتوب متقدر
ولو طلعت وحشه عالطول حاتروح وتغير
ماهياش نهاية العالم وأوعى تكون متكدر
وإللي يقولك صيني قول له كان غيرك أشطر
أهي عربيه زي الكل ولو طلعت وحشه هابعها وأنا مش هاخسر
وهاجيب أحسن منها بأمكانيات أحسن أكتر واكتر

حازم خضر الراجل بتاع المحله الكبرى
كان ليا سؤال من زمان عن كلمة كبرى
هوه في عندنا في مصر محله صغرى ؟
طب لو مافيش ليه في عندنا محله كبرى ؟
لما تيجي المقابله أبقى جاوبني ونبي يا حازم
ولو أنت مش عارف الأجابه يبقى مش لازم

وهجيلكم تاني ومعايا أحلى معاني
وإللي نسيته راجع له من تاني
ومش عاوز حد يقول دماغي وجعاني
لحسن أحلف أني أهبده قصيده ألماني
من بتوع هتلر والراجل صاحبه الطلياني

**hazem_khidr** · 21-05-2007 09:04 AM

حازم خضر الراجل بتاع المحله الكبرى
كان ليا سؤال من زمان عن كلمة كبرى
هوه في عندنا في مصر محله صغرى ؟
طب لو مافيش ليه في عندنا محله كبرى ؟
لما تيجي المقابله أبقى جاوبني ونبي يا حازم
ولو أنت مش عارف الأجابه يبقى مش لازم

يا باشا الف شكر انك افتكرتنا و كلام زي العسل و داخل القلب بسره كمان
اسم المحله الكبري جاي من ان في بلاد بجوار المحله اسمه (محله حسن محله الزياد محله ابو علي محله روح) ف هيا اكبر مدينه علشان كده سموها المحله
و يقال في مقوله اخري انها ايام الفراعنه كان اسمها محله الكبراء و اتحور الاسم فيما بعد
و عموما المحله تنور لو تتكرم و تزورنا في يوم و تقضي يوم معانا هنا

**PAYOO** · 21-05-2007 12:50 PM

المشاركة الأصلية كتبت بواسطة hazem_khidr

حازم خضر الراجل بتاع المحله الكبرى
كان ليا سؤال من زمان عن كلمة كبرى
هوه في عندنا في مصر محله صغرى ؟
طب لو مافيش ليه في عندنا محله كبرى ؟
لما تيجي المقابله أبقى جاوبني ونبي يا حازم
ولو أنت مش عارف الأجابه يبقى مش لازم

يا باشا الف شكر انك افتكرتنا و كلام زي العسل و داخل القلب بسره كمان
اسم المحله الكبري جاي من ان في بلاد بجوار المحله اسمه (محله حسن محله الزياد محله ابو علي محله روح) ف هيا اكبر مدينه علشان كده سموها المحله
و يقال في مقوله اخري انها ايام الفراعنه كان اسمها محله الكبراء و اتحور الاسم فيما بعد
و عموما المحله تنور لو تتكرم و تزورنا في يوم و تقضي يوم معانا هنا

كلك زوق يا حازم باشا

وإن شاء الله هاكمل بس أدوني فرصه عشان مش لاحق