شخصيات في NILE MOTORS شِعر حلابنتيشي ....(PAYOO)

**PAYOO** · 20-05-2007 08:23 AM

فكرت أني أكتب لكم قصيده
أوصفكم فيها بنية طيبه أكيده
ومش عاوز حد وهوه بيقرا يبقى في أيده أي حديده
لحسن يتهور ويبقى محتاج يشتري شاشاه جديده
ولو أتهور انا مش مسئول عن أي نتيجه
وأنا عارف إن شِعري الحلابنتيشي له نتايج عديده

تعالو نبص على كلام المهندس "سبعاوي"
هانلاقي إن كلامه كـُـله تقاوي
لو رشيت كلامه على طريق صحراوي
الطريق هايزرع خير ومش هايبقى فيه بلاوي
ونصايحه دايما على صورة حكاوي
تستفيد منها ولا أجدع أكلة عكاوي
وبالهنا والشفى لو على تنفيذ نصايحه ناوي

أما بقى الدكتور "أحمد سمير"
كلامه دايما جد وخطير
نابع عن حكمه وخبره وتفاسير
ومايقولش الكلمه إلا بالسند والدليل
وتشم في كلامه رائحة أحلى عصير
عصير من الحكمه والمحبه والتبجيل
وتلاقي نفسك بتكن له ولكلامه كل تقدير

ونيجي بقى لمستر "محمود حفناوي"
وده راجل بيشتغل شغل ديناميكاوي
وبيشتغل في صمت وبدون حكاوي
والضغط عليه شديد من كل النحاوي
لكن برضه شغال ومالوش في الغناوي
وعشان كده بنقدره ونساعده في البلاوي

ولو دخلت ساحة دايو هاتلاقي "محمد ممدوح" MMamdouh
وده راجل عامل معمل تجارب فوق السطوح
فعلا خدوم وقلبه دايما مفتوح
بيحب يخدم بجد وشغله كله وضوح
مايقولش غير إللي يعرفه من غير فزلكه ولا شحوح
ولو عندك مشكله في الدايوو ويادوب فلوسك كام لحلوح
وكل يوم تزقها مع البواب ومخلياك في الحته مفضوح
يبقى عليك وعلى "محمد ممدوح"
وهوه هايدلك ببساطه على الحل من غير ما تيجي ولا تروح

ونيجي للسيد "كريم منير"
إلي بأرائه دايما تستنير
وبعد كلامه ماتحتجش لتفسير
لأن كلامه واضح وسهل التعبير
ومداخلاته مفيده وناعمه زي الحرير
وتعدي عليك مدخلاته زي نسمة عبير
وتلاقيه دايما من مشجعي التطوير
ومش غاوي فلسفه ولا حجج كتير

وعندنا هنا راجل مشاغب بس عصري
والراجل ده جدع وأسمه "شريف المصري"
ولو عاوز تعيش في المنتدى معاه في سلام
ماتشتريش حاجه صيني وأنتى تبقى معاه في وئام
ولو أشتريت صيني أوعى تقول عليها تمام
لأنه مش هايقتنع أبدا بهذا الكلام
ولو شكرت فيها يبقى أنت إللي عليك الملام

وزميلنا الجميل "أبو نورا" الأموره
وده راجل بيحب كلامه يبقى في أحسن صوره
وتلاقي معلوماته جيالك متظبطه بالمازوره
وتحس أنه في عربيته شادد وراه مقطوره
مقطورة معلومات جايبهالك ومايطلبش منك فاتوره
وأغلب وقته لنايل موتورز ونورا هيه المعزوره

ونفسي يبقى معانا "جمال أبوشنب"
لأنه صاحبي وبيتميز بقمة الأدب
وفي كل مقابله تلاقيه موجود بالعدد
والغريب أنه في نايل موتورز من الجـُدد
مع أني قلتله من زمان تعالى كمل العدد
بس أنشغاله عنا أكيد كان له ألف سبب

وأستاذ "حازم حزه" إللي كلامه قليل
من قلة كلامه تحس أنه في معلوماته بخيل
لكن لو تعرفه تلاقيه مايقولش إلا الكلام الجميل
ومن خبرته مايقولش الكلام إلا بعد التحليل
وحكمته فعلا صعب تلاقيلها مثيل
وإن جيت للحق تلاقيه سباق في الخير بضمير
ومن قبل نايل موتورز تلاقي له بصمات كتير

وعلى فكره انا مانسيتش حد
وكله هايجي دوره في القصيده بجد
بس أستنوني المره الجايه يوم الحد
وهاجيبلكم معايا كل اعضاء نايل موتورز النشطاء
إللي مابيبخلوش على أخوانهم بأي دواء
ودايما في نايل موتورز تلاقي علاج كل داء
وربنا يصبركم على شعر الحلابنتيش
وأتمنى أنكم ماتقولوليش
روح يا "بايوو" وماتجيش
لحسن أنت كده بقيت من الدراويش