-
الوان جديدة للنيسان صني
السلام عليكم
انا قرأت موضوع هنا في المنتدي ان كان فيه خبر عن نزول نيسان صني بألوان جديدة
أمس شوفت حوالي 3 سيارات عند موزع نيسان الي في شارع الحجاز - مصر الجديدة
السيارات ال 3 كانوا نيسان صني فراني!! فعلا الفيراني شيك جدا جدا عليها بس ملحتش اخد بالي منزلين الفرش من جوه بيج ولا رمادي .
مش عارف باقي الألوان الجديدة ايه بس هحاول اشوفها مرة وانا راجع البيت لأن المعرض ده قريب مني.
مش ملاحظين معايا ان النيسان صني انتشرت اليومين دول؟
ده معناه ان سعر إعادة البيع هيرتفع وديه كانت نقطة سلبية من كام سنة بالنسبة لنيسان صني.
اتمنى نعمل مقابلة لقسم نيسان وطبعا يشرقنا فيها النيساناوي القديم سبعاوي الي متأكد ان كل اعضاء قسم نيسان نقسهم يقابلوه .
المقابلة ممكن نعملها في مكان مفتوح بس لما الجو يستقر بإذن الله.
دمتم في حفظ الله
-
انا لسه مشوفتش الالوان الجديده
بس احب اقولك لما اشتريت الصني بتاعتي في منتصف 2008 مكانتش نادره في الشارع
كنت امشي و اشوف منها عدد لا بأس به
لكن دلوقتي ساعات كتير ابقي ماشي جنب عربيه نفس لون عربيتي و في حراسه موكب كامل من الصني
الصني انتشرت انتشرت و ساعد علي كده الجشع الغير مبرر من شركه ميتسوبيشي و واضح الكلام ده جدا في اسلوب ارتفاع اسعار اللانسر بومه سنه بعد سنه اعتمادا علي الفرق الكبير بين سعرها و سعر اللانسر شارك, مما ادي لتهافت الناس علي اللحاق بطابور البومه قبل ما تغلي اكتر, مع ان العربيه هي هي من دون زياده باركنج سنسور حتي ذرا للملح في عيون امثالي ممن يهتمون بتفاصيل ما يشترون
الصني و ان كانت تجميع مصري و فيها بعض المكونات المصريه (بما لا يؤثر علي العربيه من زجاج و فرش و كاوتشات الابواب و الخراطيم و الرادياتير و الضفيره) علشان يوصلو لنسبه 40% مكونات مصريه
الا ان العربيه قدرت تنزل بسعر منافس جدا جدا و بجوده كويسه
و يكفي ان سنه 2008 كانت اسعار اللانسر بومه 1300 سي سي خليجي مانيوال ب 93 الف في نفس الوقت اللي الصني اوتوماتك 1600 سي سي ب 93 الف برضو!!
و محدش يدعي ان اكيد في فرق مخلي البومه تستاهل الزياده المبالغه دي
لأن مش معني الوكيل مستغل الناس و طلب الناس علي العربيه فبيرفع السعر كل سنه و العربيه بقالها 8 سنين و الناس تقعد تقنعك بالعافيه ان السعر قد ايه مناسب علي العربيه دون النظر في القيمه مقابل السعر
و خد بالك ان كلامي علي الاسعار و الفلوس اللي بتدفع مقابل القيمه
و حاليا الصني بقي لها قاعده انتشار ضخمه من ناس عرفو يميزو المقابل لفلوسهم و انتشار الصني اكيد يفرحني و يفرح ملاكها كلهم و يدينا امل كبير بتوافر قطع غيار باسعار تنافسيه و ضمان وجودها فتره طويله من الزمن و ده بيأثر بالايجاب علي سعر اعاده البيع و سهولته
غير طبعا ميزه اخري موجوده بالفعل من تنوع مراكز خدمه نيسان المعتمده من السبع و العوض و يونايتد و فروعهم الكتيره
-
لو قدرت تجيب صور يبقى تمام اوى
عندنا فالمنصورة برضه اقدر اقول ان الصنى خصوصاً فى سنة 2008 و 2009 بعد نزول الشكل الجديد فى السوق انتشرت انتشار واسع جداً
لدرجة ان فى عربية من الشكل الجديد اتعملت تاكسى بس الحمد لله مفيش غيرها لغاية دلوقتى
والمفروض فعلاً ان سعر اعادة بيع العربيه يزيد ويكون احسن من كده شويه يعنى يبقى ولو اقل من سعر اعادة بيع الكورولا واللانسر شويه
-
متنساش تقولنا على باقى الالوان اللى نزلت وهل التغير فى الالوان فقط ولا فى حاجة زيادة نزلت فيها
-
بإذن الله اعدي على المعرض واجبلكم باقي المعلومات
-
وانا وكل اعضاء منتدى نيسان الكرام فى انتظارك
-
بعد ما كنت طلبت لون فضي رجعت غيرت للذهبي ثم رجعت للفضي تاني ثم أخيرا واتمنا ان يكون اخرا طلبت اللون الفراني والفرش الاسود وبصراحة انا حاسس ان مدير فرع السبع بتاع شارع الحرية هيتخنق مني كل مرة يجيب العربية ويجهز ورقها وارجع في كلامي ادعولي اثبت على لون وريح نفسي واريح الراجل دا كمان
-
انا بحب اللون الذهبى فى الصنى
-
انا الحمدلله حجزت الرمادى فرش غامق
-
الأسود مش حلو فيها من وجهة نظري
Content Relevant URLs by
vBSEO 3.6.0 PL2