بتتعامل مع ولادك وتربيهم ازاي؟
السلام عليكم جميعا
باختصار شديد - تربية الأطفال حاجه مش سهله ابدا وبما اني عندي ابن مطلع عيني وان شاء الله في واحد جاي في السكه فعايز اشوف اخوانا في المنتدي بيتبعو انهي اسلوب في تربية اولادهم
انا معظم الوقت ببقي بحاول اتكلم بهدوء بس ساعات مش بيسمع الكلام واحيانا احس انه بيرخم عليا وفاهم انا عايز ويقولي لآ
البارح كنت قلت انضف الجهاز من التراب اللي فيه وكنت قالب الكيسه وهو كل مااعمل حاجه عايز يعمل زيها - المهم بعد ماخلصت وركبت وجيت اشغل الجهاز مرضيش يشتغل ولقيت مفيش كهربا وصله
بعد حوالي ساعه من المحاولات وتأنيب الضمير اني فكرت احله من الأساس لقيت سيادته كان متكي علي الزرار بتاع الباور سبلاي ولما رجعته اشتغلت الدنيا
طبعا انا كنت مخنوق جدا وهو كان بيرزل عليا لحد ماضربته وعيط وزعلت قوي بعديها خصوصا لما عرفت العيب من ايه
ياريت كل واحد يقول علي احسن الطرق اللي شايفها في تربية الاطفال عشان انا بجد نفسي ولادي يكوني محترميين قوي ويسمعو الكلام من غير لا شخط ولا نتر ولا ضرب