محدش يركن في مكان فيه طوب
الاسبوع اللي فات تعرضت لموقف غلس حبتين
كنت رايح الحرفيين لاخويا اقف معاه و هو بيصلح عربيته
و بركن في مكان مليان طوب و فجأه سمعت صوت في العجل ببص لقيت الفرده علي الارض مع انها تيوبلس ( طبعا قبل ما ابص في ايه عرفت انها اتقطعت بس مش عاوز اصدق نفسي )
فكيت العجلة و طلع فعلا في قطع حوالي 7 ســم طلع السبب هو صبة الاسمنت اللي بيبقوا زارعين فيها ماسورة حديد عشان محدش يركن و الماسورة كانت مقطوعة وزي السكينة .. انا مشفتهاس من كتر الطوب المكسر حواليه و قولت دول شوية طوب و خلاص مهو مفيش مكان اركن
المهم بقي فكيت الفرده و جيت اركب الاستبن لقيتة نايم هو كمان
قولت اركب الاستبن بتاع اخويا عندي اصل احنا الاتنين نفس المقاس .. اجي اركب الاقي عندي في الطمبوره في مسمارين تثبيت طالعين من الطمبورة غير الاربع مسامير بتوع الربط و دول ليهم فتحتين في الجنط عندي و طبعا مالهمش مكان في الجنط بتاعة ... طيب اعمل ايه
قولت اخد الفرده بتاعت اخويا و اركبها علي الجنط بتاعي لحد ما اروح اشتري كاوتش .. و قد كان و الحمد لله
اروح بقي اشتري الكاوتش .. و اخويا هو اللي بيوريني الطريق لبتاع الكاوتش و انا وراه بعربيتي عشان انا معرفش الطريق فا انا لازق فيه من ورا عشان مايتوهش مني الاقي بقي ميكروباص راشق ورايا و فاكرنا بنشد مع بعض انا و اخويا و هو قال يفضل ورانا عشان ينجز و هوووب راح لابس فيا من ورا ... يادي اليوم الازرق هو في ايه النهارده ... مانا كنت قاعد في بيتنا ايه اللي نزلني بس
نزلت ابص لقيت الخبطة جت في الاكصدام و الشنطة بس محصلش حاجة الحمد لله الا ان في نقره بسيطة اوي في الشنطة قولتله امشي يا عم اتكل علي الله
نصيحة محدش يركن في مكان في طوب و محدش يخاف ان اخوه يتوه منه و محدش ينزل من بيتهم من غير سبب اساسا