لو حكينا يا سيراتو نبتدى منين الحكاية

السلام عليكم ورحمة الله وبركاته

فى البداية اتشرف انى عضو فى هذا الموقع الرائع لما فيها من خدمات متميزة من الصعب ان تعثر
عليها فى اى موقع اخر واحيى القائمين على هذا الموقع واتمنى من الله ان يزدد تالقا مع مرور
الوقت .
يابابا هات ( السيلاتو ) احلى لا ( الاولترا ) احلى لا لالالا ( الانترا ) احلى كل ده وانا بسمع صوت بناتى الكبيره عاوزه السيراتو والصغيره عاوزه الاوبترا وامهم عاوزه الانترا وانا واقف بسمع شويه اميل للكبيره وشويه اضحك على الصغيره حيره لذيذه ومتعبة على فكرة
انا مش هدخل فى مقارنات بين العربيات لان فى كتير عملو كل ده البداية كانت اميل الى الاوبترا لان السعر كان مناسب ليا والعربية محترمة لانى ركبتها كتير ( اوتوماتك ) بس عينى على السيراتو من بعيد الفرق مكنش كتير فى البداية يعنى حوالى 10 او 12 الف وفى التقسيط مش هيفرقو من هنا الى هنا قررت على السيراتو وتوكلت على الله العربية تخطفك خطف مبهرة اروح اتفرج على موديلات تانية وتكون هى فى خيالى حفظتها كل حته فيها بتشدك ليها ارجع واقول هى دى اللى العين عليها
بينى وبينكم تستاهل صليت ودعيت وقربت اعمل عمرة حتى :Ob_mak1[1]:علشان اخد القرار ونويت وتوكلت على الله سالت فى البداية فى التوكيل مافيش دلوقتى هتستنى حوالى شهرين روحت للموزع موجوده وتعالى
رحت فعلا ولقيت العربية بس للاسف اللون مكنش موجود واتجهت للخليجى والمعروف فى الخليجى انها تجميع مواصفات يعنى لقيت حوالى 40 عربية سيراتو مختلفة فى الكماليات ما بين السعودى ليه مواصفات الكويتى ليه مواصفات والسورى والاردنى وانت بقى تجمع الكماليات دى وكل حاجه ليها سعرها واخيرا استقريت على الموصفات سيراتو سعودى جنط 16- ايه بى اس - فتحة سقف - تكيف تاتش - طارة مالتى .وباقى الكماليات المعتادة والسعر 110000 الف تقسيط النص والباقى كاش .
وكل ده اخترتها بعد متابعه دقيقه جدا للموقع والاعضاء المحترمين وبجد شكر لكل عضو قال رايه عن تجريه او عن سمع .
ركبت العربية ودورتها والمفروض امشى بجد حسيت برهبه شديده وخوف مع انى متعود على العربيات الاوتوماتك ( نسيت اقول انا كنت راكب دايو لانوس مانويل ) العربية تحس انك فى كابينة طيارة فعلا صوت موتور قوى وبعد ما قريت القران كله مشيت بالراحه تحس ان العربية عاوزه تجرى وتقولى ايه يا عم ما تجرى انا كده هنام منك اقول فى سرى اصبرى بس هقطعك يا سيراتو طلعت على الدائرى وقلت فى نفسى اتشجع يا عم بقى شكلك وحش ( كنت لوحدى وانا بستلم ) حصان جامح او طور هايج عاوزه تجرى وانا بقيت ماسك فيها والنبى بالراحه انا غلطان اشيل رجلى تهدى وكانها بتقولى متخفش عليا بس بلاش خوف انا عندى فرامل قويه وجربنى وفعلا سمعت كلامها ودوست فرامل فعلا قويه جدا وقلت ما باليد حيلا ودوست بنزين وجبت 120 وانا عارف انه غلط على العربية فى الاول بس صدقونى مكنش بايدى هى اللى عاوزه كده تحس انها بتكون فرحانه وعاوزه تطير وانا مبهور يانهار ابيض ايه ده كمان الناس عنيها عليا تحس انها راكبة معاك جوه كانى نازل من كوكب تانى بالعربية ارجع اقر قران تانى واقول فى سرى عجبك كده يا سيراتو خليتى الناس تتفرج علينا كل ده وانا فعلا متوتر جدا بس واحده واحده هديت وهى اللى ادتينى الاحساس ده الاسرخاء التام حسيت انى امير فى مملكتى قلت اشغل التكيف ويدوبك شغلته دقيقه وحسيت انى تلجت مع ان الايام دى كانت حر جدا قفلته لانى قريت انه غلط انى اشغله فى فترة التلين ( مش عارف ليه ) كنت مظبط فلاشة عليها قران ودى اول حاجه عملتها قبل ما اطلع بيها شغلتها بسم الله ماشاء الله صوت ايه ولا تقولى بقى بى ام ولا صب ولا الكلام اللى بنسمعه ده صوت رائع قوى مش محتاج اى حاجه تانى . تحس وانت قاعد على الكرسى انك متحكم فى كل جزء فى العربية كرسى قوى فى ناس كانت بتقول ان العفشة ناشفه فعلا كده لما تكون راكب حصان قوى فى عز شبابه عاوز يجرى وبيدب فى الارض برجله مع كل خطوه بيجريها ده معانه ايه ( اسيب ليكم الاجابه ) الجنط كان على 37 ولما ظبطه حسيت ان العربية هديت شويه فى المطبات .( الجزء الاول ) .........يتبع :dzey:
ملحوظه : يا جماعه اعزرونى لانى مش هعرف ارد على متابعتكم لانى فعلا مش بكون كتير على الجهاز

أهلا بيك فى المنتدى ومبروك عليك العربيه
ربنا يديك خيرها ويكفيك شرها
بس حاول متقرصش عليها فى فتره التلين وبعد 1500 كده ولا حاجه
أعمل ما بدالك
مبروك مره تانيه و نورت

لو حكينا يا سيراتو نبتدى منين الحكاية؟

ده احنا قصة حبنا ليها اكتر من بداية

متابع حكايتك وقصة حبك .....

متااااااااااااااااااااااا ااااااااابع للجزء التانى

قصة رائعة فكرتنى بنفسى وبانبهارى بعربيتى الحالية ومازال انبهارى بعربيتى قائم لحد انهردة فا فعلا نبتدى منين الحكاية زى ما عبد الحليم قال والف الف مبروك ياباشا بالعربية وربنا يباركلك فيها ويكفيك شرها

ألف مبرووووووك ياباشا وربنا يديك خيرها ويكفيك شرها :)

فى البداية اشكر كل من اهتم وقرا موضوعى لنهايته والرجاء من الجميع تقبل عزرى للكتابة بالتفاصيل ولكن غرضى ان الكل يستفيد من تجربيتى كما استفدت انا شخصيا من تجارب الاخرين .

لو بدينا يا سيراتو نبتدى منين الحكاية ..... الجزء التانى

طبعا والمعروف ان اى حد بيشترى عربية جديدة اول حاجه بيعملها بيروح راجع على البيت وواخد ولاده وام العيال ونضيف عليهم الحاجه والدتى وفعلا كل شويه يتصلو ها ايه الاخبار اقولهم تماما انا جى اهو اخبار العربية ايه اقلهم استنو وانتو تشوفو بعنيكم وفعلا وصلت وبينى وبينكم وقفت بعيد عن البيت وانتم طبعا عرفين السبب . الحاجه الاولاد وامهم ركبو العربية وطبعا واضح فى عنيهم تاثير العربية عليهم تقوم بنتى الكبيرة تقلى ايوة كده سمعت كلامى وجبت ( السيلاتو ) والتانية تقولى هى دى بقى ( الاولترا ) وطبعا انا فى قمة الضحك وتوكلنا على الله .

العربية لونها بدنجانى وبليل بتدى اسود معرفش ازاى وطبعا زى العاده الناس عنيهم على العربية وتحس انهم قاعدين جنبك تقوم الصغيره فاتحة نور الصالون رحت شاخط فيه اقفلى انور يا بنتى احنا مترقبين :36_1_37[1]: ونفس الاحساس اللى عندى كان برضه على الموجودين معايا انبهار تام بكل حاجه بالعربيه.
لاازم نكون متفقين على ان الكمال لله وحده ومفيش حاجه ممكن تكون كاملة وكل شى ليه مميزات وعيوب وانا بتكلم عن العربية بحس انها تستهال كل كلمة بتتقال عنها فى احسن منها اكيد ولكن اكيد السعر اعلى انما لما تركب عربية مميزة بمعنى الكلمة ويكون سعرها فى المتناول وفيها كل ما تتمناه فى عربية وبالسعر ده يبقى اكيد لاازم يكون حاجه شاذه وده فعلا اللى موجود تحس انها شاذه عن اللى حواليك وده واضح فى عيون الناس مع ان فى موديلات كتير اعلى منها فى الامكانيات والسمعه الطيبة بس برضه تحس انها مختلفه .
طبعا الحكم فى الاول بيكون حكم مبداى لان لسه متجربتش كويس وطلع فى دماغى انى لاازم كما سمعت انى اعمل تلين للعربية قلت اطلع على العين السخنة طريق واسه وكبير وامشى براحتى بدون مضايقه من حد
الحاجه قالت انا عاوزه اروح بورسعيد قلت من عنيا وبالمرة نلين العربية من الجيزة لبورسعيد بالتقريب 250ك قلت كويس اهو نجرب العربية رحت البنزينة وفولت العربية الناس كانت بتقول انها بتاكل بنزين قلت نشوف طبعا وانا ماشى براحتى والعربية زى العاده عاوزه تجرى وانا ماسك فيها بايدى وسنانى طول ما الطريق متساوى وكويس تحس بقمة النعومة يجى مطب او حفرة تحس بيه بس مش بالمنظر اللى الناس بتتكلم عنه وانا ماشى يدوبك ما بين 90 او 100 وبالعافيه بحاول اسيطر عليها استنيت اسمع صوت الماتورو انه عالى مافيش زودت السرعه شويه 120 برضه مافيش صوت زى العاده اسيب ايدى من على الدريكسون واشوف اذا كانت بتروح بتحدف شمال زى ما بيقولو ابدا مافيش برضه العربية ماشى على الخط بالظبط مافيش لا شمال ولا يمين وانا على سرعه حوالى 100 ك طيب ياجماعه فين الحدفه ناس هتقولى لا دى بتبان بعد 120ك اقلهم يا جدعان وانت كام مرة بتمشى فى شوارع مصر على 120 ك حتى لو بتسافر كام مرة هتزود السرعه عن ال 120 ك من الاخر انا محصلش معايا حاجه من اللى سمعت عليه وده للامانة

دخلنا بورسعيد بامان الله وانتو عارفين بقى اللى حصل ( ولو تحبو احكى بقى انا روحت فين )
خلصنا اليوم واحنا راجعين لقيت نفسى قدام مطب صناعى كبير للاسف كان قدامى بس مكنتش مركز فيه كنت على حوالى سرعه 60 ك كان فى خيارين انى ادوس فرامل والعربية اللى بتجرى ورايا تلبس فيا او اخد المطب وعقبال ما فكرت كنت اخدت المطب وسمعت صوت هبد جامد جدا العيال وامهم لقيتهم اتخبطو فى السقف جامد جدا :36_1_40[1]: والحاجه جنبى نفس الشى خبطة جامدة فى سقف العربية طلعت لفوق وراحت نازلة وبووووووم وانا قلبى نزل معاها ابص فى المرايا لقيت العربية اللى ورايا نفس الشى بس هو لحق نفسه بفرامل بس اخد برضه نفس المطب ركنت وانا قلت خلاص
( العربية اللى حيلتى راحت ....راحت ... راحت ) اخدت نفس ونزلت بصيت تحت العربية مافيش حاجه قلت هيبان وانا ماشى وفعلا مشيت وانا فى قمة الضيق والنرفزة وقلت ربنا يستر .
خرجنا من بورسعيد وقلت اجرب وازود السرعه انها تحدف يمين ولا شمال ابدا اسمع حاجه ابدا طيب
ايه فين اثر الخبطه الجامده دى مافيش طب ازاى ده انا اخدتها قبل كده فى عربيتى القديمة حسيت انها بتفرفر منى بعدها استنى مافيش الله ده العربية عفشتها حلوة اهو ( اقسم بالله ده اللى حصل معايا ) وطبعا بقى وانا ماشى شفت الويل انا تكون راكب عربية عاوزه تجرى وانت ماسك فيها والطريق اغلبه ضلمة وانت يدوبك ماشى على 90 ك وكل شويه اهدى اقول مطب يطلع خيال عامود اتجننت وانا ماشى وطبعا الحاجه جنبى يبنى بالراحه يبنى حاسب من الاخر شكلى كان وحش جدا قدامهم :khd:وصلت بتنا والحمد لله ابص على العداد الاقى عامل 550 ك والبنزين لسه فيه شرطتين الله طب يعتبر كده كويس اهو هو صحيح انا معرفش الشرطتين دول يعملو كام لتر بس حلو برضه ( ده من وجه نظرى ) .

الجزء التانى ...............يتبع

صيانة الالف .:hlopaet_prv:

فى أنتظار الجزء الثالث :)))

ألف مبروك عليك السيلاتو يا باشا :) :)

أحييك على موضوعك الشيق
ربنا يباركلك فى عربيتك

ربنا يباركلك فيها وقصة الحب ان شاء الله مش هتنتهي ولو عايز قصة تانية برده اكيد مع كيا

الف الف مبروك على (السيلاتو) وعقبال متخاويها بواحده تانيه (اولترا) وهى فعلا عربية كويسه وجرايه جامده لو سبت نفسك ليها

الف مبروك على السيلاتو وربنا يكفيك شرها ويبعد عنك العين ونصيحة من اخ ليك فى السيلاتو ادبح حاجه عليها ووزعها بنية الشكر لله على النعمه :b4_048:

الف مبروك على العربية وربنا يحفظهالك
اكيد بيبقى احساس جميل لما تشترى عربية وتطلع فعلا زى مانت كنت متخيلها واكتر

ألف ألف مبروك يا استاذ و يارب قصة الغرام دي تفضل علطول كدة.

الف مبرووووك وربنا يديك خيرها ويكفيك شرها...وانشاء الله انا خلاص قربت ابيع عربيتى واجيب سيراتو , وناوى اطلع زيك بردوا على بورسعيد اول ما اجبها باذن الله
ومستنين باقى الحكاية باذن الله

1000000 مبرووووك وربنا يديك خيرها ويكفيك شرها

السلام عليكم ورحمة الله وبركاته

اشكر من قرا موضوعى سؤاء علق عليه او لم يعلق والتمس العزر منكم فى عدم الرد على مشاركتكم لانى بصراحه مهتم اكتر انى افيد بقدر الامكان كل من يدخل على موقعنا كما انا استفدت ايضا .

لو حكينا يا سيراتو نبتدى منين الحكاية .....الجزء الثالث

بعد رحلة بورسعيد اللى حكيتها ليكم وما تم فيها كان العداد وصل لحوالى 800 ك وبينى وبينكم انا كنت مستعجل على ميعاد صيانة الالف لسببين اول فى ناس كانت بتقول ان العفشة مش بتكون مربطه بشكل كويس بعد الاستلام ( مع انى لم الاحظ ذلك ) والسبب التانى عاوز اعرف اثر الخبطه اللى اخدتها عملت تاثير ولا لا المهم عرفت رقم الصيانة وقمت حاجز ميعاد بعدها بيومين وقلت عقبال ما يجى ميعاد الصيلنة هكون جبت الالف وفعلا اتصلت بصراحه قمة الزوق وطول البال من الاخوة اللى فى الكول سنتر صحيح اسئلتى مكناش ليها اجابات كلها بس على الاقل يكفى كمبية الترحاب حولت اسال على قيمة صيانة الالف وخصوصا انى خليجى وقريت هنا انها بتكون زياده شويه الاخ اللى فى الكول سنتر ماختش منه اجابه مباشرة وقلى انا اسف ممكن تتصل بكرة وتكلم امهندس وهو يقولك قلى احجز قولته اتوكل على الله وحزت على الساعة 10 ص وطبعا اخدت اليوم ده اجازة كان يوم الاثنين 15/3 انا من سكان الهرم يعنى اقرب فرع والطبيعى مركز ابو رواش حوالى نص ساعة بالكتير نزلت من البيت حوالى 9.15 انا عارف الطريق المدخل كله يفط بصراحه وواضحه وبدلك على الطريق بسهولة مدخل القريه الذكية اللى بعد كارفور دندى مباشرة ( بعد مش قبل ) تمشى على طول فيه هتلاقى يفطة بتقولك شمال تعمل يو ترن واول يمين على طول هتلاقى يافطة بتشاور على المركز على ايدك اليمين وصلت فى ميعادى بالظبط وانا طبعا متوتر شويه بينى وبينكم اول مرة ادخل مركز صيانة على البوابة سالنى واحد حضرتك حاجز ميعاد قلتيله ايوة حاجز سالنى عن اسمى وراح الكشك ورجع قلى اتفضل كل شى ماشى كويس البداية مبشرة دخلت توقعت ان المدخل يكون اكبر من كده بصراحه تحس انه صغير على كمية العربيات اللى موجوده وحط رقم على العربية كان 19 ومكنتش اعرف ده معناه ايه بس عرفت بعدها ان فى 18 عربية جوه الصيانة يدوبك ركنت وجالى شاب زى الفل بصراحه كان مبتسم قلتله صيانه الالف ( على فكرة العربية كانت عاملة وقت ما وصلت بالظبط 924 ك ) وقلتله عربية خليجى هتتكلف كام وبينى وبينكم كانى كنت مستنى النتيجه ( توقعى فى حدود 400 ج ) قلى 500 ج استغربت وقلتله بضحك طيب وعلشان خاطرى راح ضاحك قلته ليه كتير كده انا سمعت انها فى حدود 306 وعلشان خليجى بتكون 400 ج قلى لا علشان المصنعية بتكون اغلى قلت مش هتفرق علشانك سا سيراتو استحمل اى شى والغالى تمنه فيه ( وقلت فى سرى مرة وهتعدى ) اخد البيانات وشيك على العربية قلتله هقعد قد ايه قلى 4 ساعات ( يانهار ابيض ليه يعنى كل ده فى تغير فلتر وزيت ) قلى اتفضل فى الاستراحة وطبعا ناس كتير شرحت قبل كده كل حاجه خاصة بالتوكيل واللى بيحصل فيه حتى الشاى ابو بلاش اتكلمو عنه ( فضايح ) :b4_592:.
ملاحظات :
*الاستراحة محتاجه كراسى وتربيزات اكتر شويه وخصوصا اللى بيجى الصيانه مش بيكون لوحده اللى جايب صاحبه او مراته او حتى عيلته ودول بيكونو من المحافظات وحبه تيجى المركز الرئيسى .
*اجمل حاجه انك طبعا مش بتقعد على تربيزة لوحدك بيكون معاك ناس تانية وبتتعرف بقى على اللى معاك انا عن نفسى كنت جايب جرايد معايا وعشت معاهم .
*العربية دخلت 10.13و فضلت فى الانتظار لحد 12.3 ومكنش جه حد جنبها لسه
* العربية خرجت من الصيانة 1.3 وعقبال ما استلمت كان 2 يعنى الميعاد بالظبط
* العربية بره وجوه زى الفل بصراحه .
* ياريت ياريت يتم التنبيه على الشباب اللى بتجيب العربية من جوه سواء من الغسيل او من الصيانة يتعملو مع العربية فى السواقه احسن من كده الاخ كانها راكب عربية ملاهى وبيمشى بسرعه كبيره فى مسافه صغيرة جدا ( قلبى كان هيتقطع لما شوفت عربية بياكنتو والاخ اللى راكبها كان هيلبس فى عربية تانية )

حسيت بعد الصيانة ان العربية اختلفت صراحه () العربية بتسحب اكتر من الاول الفرامل بقت اقوى التجميع بقى اعلى ~( هو انا كنت ناقص )

اتمنى من كل قلبى انى اكون افدت كل من اطلع على موضوعى واعزرونى لانى كتبت كتير جدا بس حقيقى انا كنت حابب انى اقول كل الحكاية من اولها الى اخرها بمنتهى الامانة ومستنى اى اسئلة من اى عضو حابب يسال وانا تحت امره وبينى وبنكم الكلام على ( السيلاتو ) مش ممكن يخلص وربنا يستر ويكفينا شرها يارب .

بس 500 جنيه كتير جدا جدا على صيانه 1000
حتى لو خليجى!

اخي العزيز
في سؤال مهم جدا جدا جدا جدا .............................. وهو انت بتشتغل كاتب اوصحفي او كاتب سيناريو ولا مؤلف افلام او مؤلف اغاني ؟؟؟؟؟؟؟؟؟؟؟؟؟ ايه كمية الحب ده ؟؟؟؟؟؟؟؟؟؟ انت فكرتي بأيام الخطوبة بتاعتى ؟؟؟؟؟؟؟؟؟؟؟؟
الف الف مبروك وربنا يديلك خيرها ويكفيك شرها .:satelite:

الف مبروك على العربيه والف شكر لحضرتك على التقرير المميز

الخبطة طلعت أثرت على حاجة ؟؟؟؟؟

ههههههههههه قصة جميلة فعلا وربنا يباركلك فيها

اقتباس:

---

المشاركة الأصلية كتبت بواسطة ahmed_su

لو حكينا يا سيراتو نبتدى منين الحكاية؟

ده احنا قصة حبنا ليها اكتر من بداية

متابع حكايتك وقصة حبك .....

---

عجبنى جدا ردك عليا انك ماشى معايا فى المود

اقتباس:

---

المشاركة الأصلية كتبت بواسطة normal

أهلا بيك فى المنتدى ومبروك عليك العربيه
ربنا يديك خيرها ويكفيك شرها
بس حاول متقرصش عليها فى فتره التلين وبعد 1500 كده ولا حاجه
أعمل ما بدالك
مبروك مره تانيه و نورت

---

شكرا على نصحيكتك الغالية بس صدقينى والنعمة الشريفه ما باديى هى اللى عاوزه كده

اقتباس:

---

المشاركة الأصلية كتبت بواسطة hanystar

أحييك على موضوعك الشيق
ربنا يباركلك فى عربيتك

---

شكرا ويارب يدوم علينا النعمة

اقتباس:

---

المشاركة الأصلية كتبت بواسطة ghost1900

الف الف مبروك على (السيلاتو) وعقبال متخاويها بواحده تانيه (اولترا) وهى فعلا عربية كويسه وجرايه جامده لو سبت نفسك ليها

---

يارب بس صدقينى لو خويتها هاجيب برضه ( السيلاتو 2)

اقتباس:

---

المشاركة الأصلية كتبت بواسطة conspirator

الف مبروك على السيلاتو وربنا يكفيك شرها ويبعد عنك العين ونصيحة من اخ ليك فى السيلاتو ادبح حاجه عليها ووزعها بنية الشكر لله على النعمه :b4_048:

---

بصراحه لسه معملتش كده بس لما هدبح حاجه لاازم مش اقل من ديناصور على قد قيمة العربية

اقتباس:

---

المشاركة الأصلية كتبت بواسطة normal

بس 500 جنيه كتير جدا جدا على صيانه 1000
حتى لو خليجى!

---

من جه كتير فده كتير بس ما باليد حيلة اول مرة اعمل صيانة وكنت مشدود وبينى وبينك مافيش حاجه كتيره على العربية

اقتباس:

---

المشاركة الأصلية كتبت بواسطة amr a.salam

الخبطة طلعت أثرت على حاجة ؟؟؟؟؟

---

بص ياسيدى انا قلت كده للمهندس وانا بسلمه العربية وقلى هيشوفها جوه ولما العربية استلمتها سالته برضه مافيش حاجه ظهرت قلى بص مكتوب فى التقرير بدون ..وده معانه ان مافيش حاجه شفوها مختلفة عن المعتاد وبينى وبينك محولتش ارفعها واشوف انا بنفسى احسن لو لقيت حاجه ولو مجرد خدش هضايق جدا وانا مش عاوز اضيايق دلوقتى .

اقتباس:

---

المشاركة الأصلية كتبت بواسطة ehab_osman

اخي العزيز
في سؤال مهم جدا جدا جدا جدا .............................. وهو انت بتشتغل كاتب اوصحفي او كاتب سيناريو ولا مؤلف افلام او مؤلف اغاني ؟؟؟؟؟؟؟؟؟؟؟؟؟ ايه كمية الحب ده ؟؟؟؟؟؟؟؟؟؟ انت فكرتي بأيام الخطوبة بتاعتى ؟؟؟؟؟؟؟؟؟؟؟؟
الف الف مبروك وربنا يديلك خيرها ويكفيك شرها .:satelite:

---

تصدق ان مراتى قليتلى كده برضه انفع اشتغل كاتب وبتقول انى عندى الموهبه .

متخلتيش اصدقها بس عارف لما تتكلم عن حاجه انت بتعشقها صدقنى الكلام هيكون خارج من القلب مش من العقل والنتيجه قدامك

الف مبروك للعربية وسردك رائع بصراحة وواضح ان حضرتك قرأت كل كبيرة وصغيرة هنا في المنتدى عن السيراتو ,,
ربنا يسعدك بيها ويحافظلك عليها

[QUOTE=abouleila;3872466334]السلام عليكم ورحمة الله وبركاته

واتجهت للخليجى والمعروف فى الخليجى انها تجميع مواصفات يعنى لقيت حوالى 40 عربية سيراتو مختلفة فى الكماليات ما بين السعودى ليه مواصفات الكويتى ليه مواصفات والسورى والاردنى وانت بقى تجمع الكماليات دى وكل حاجه ليها سعرها واخيرا استقريت على الموصفات سيراتو سعودى جنط 16- ايه بى اس - فتحة سقف - تكيف تاتش - طارة مالتى .وباقى الكماليات المعتادة والسعر 110000 الف تقسيط النص والباقى كاش .

سؤال عاااااااااااااااجل جدا ..............
يا تري انت اشتريت من معرض ايه ...............علشان انا عايز اخلص اليوم قبل بكرة ... وانت مقسط مع بنك ايه ...

تحياتى
ايهاب عثمان

[QUOTE=ehab_osman;3872477292]

اقتباس:

---

المشاركة الأصلية كتبت بواسطة abouleila

السلام عليكم ورحمة الله وبركاته

واتجهت للخليجى والمعروف فى الخليجى انها تجميع مواصفات يعنى لقيت حوالى 40 عربية سيراتو مختلفة فى الكماليات ما بين السعودى ليه مواصفات الكويتى ليه مواصفات والسورى والاردنى وانت بقى تجمع الكماليات دى وكل حاجه ليها سعرها واخيرا استقريت على الموصفات سيراتو سعودى جنط 16- ايه بى اس - فتحة سقف - تكيف تاتش - طارة مالتى .وباقى الكماليات المعتادة والسعر 110000 الف تقسيط النص والباقى كاش .

سؤال عاااااااااااااااجل جدا ..............
يا تري انت اشتريت من معرض ايه ...............علشان انا عايز اخلص اليوم قبل بكرة ... وانت مقسط مع بنك ايه ...

تحياتى
ايهاب عثمان

---

انا اشتريت من معرض اوتو سمير ريان اللى قدام نادى المقاولون العرب والمعرض ده ليه معايا حكاية بس مافيش داعى احكيها دلوقتى .. بالنسبة للتقسيط انا مع البنك الوطنى للتنمية ( ابو ظبى الاسلامى ) واللى عرفته ان ضماناتك هى الى حتحدد البنك اللى هيمولك .
واى استفسار انا تحت امر حضرتك

بقولك انا نازل دلوقتي لسمير الريان ( باعتباره فعلا اقل سعر في السوق ) بس انا مصر على بنك فيصل الاسلامى ؟؟؟؟؟ وانا اتصلت بيهم اكثر من مرة ؟؟؟؟؟؟؟؟؟؟ بسمعوا اسم بنك فيصل .......... بيجلهم هسس ...... بعيد عنك ؟؟؟؟؟؟
قولي اي حاجة ؟؟؟؟؟؟؟؟؟؟؟؟؟؟؟؟ علشان انا خلصت خلاص مع بنك فيصل والاستعلام البنكى خلص اليوم 21-03-2010 ؟؟؟؟؟ وعايز اشترى خلاص

اقتباس:

---

المشاركة الأصلية كتبت بواسطة د.محمود صلاح

الف مبروك للعربية وسردك رائع بصراحة وواضح ان حضرتك قرأت كل كبيرة وصغيرة هنا في المنتدى عن السيراتو ,,
ربنا يسعدك بيها ويحافظلك عليها

---

كنت منتظر حضرتك انك تشرفنى بقراة موضوعى اتاخرت شويه عليا بس مجرد انك تعلق على موضوعى انا بعتبره وسام على راس الموضوع . لان حضرتك من العلامات المميزة فى المنتدى .

فعلا انا فضلت 3 اسابيع متابع المنتدى قبل قرار الشراء مش محتاج اسال بره كل حاجه موجوده هنا وبالتجربة وعلى راى المثل ( اسال مجرب ولا تسال طبيب ) :biggrin2:

اقتباس:

---

المشاركة الأصلية كتبت بواسطة ehab_osman

بقولك انا نازل دلوقتي لسمير الريان ( باعتباره فعلا اقل سعر في السوق ) بس انا مصر على بنك فيصل الاسلامى ؟؟؟؟؟ وانا اتصلت بيهم اكثر من مرة ؟؟؟؟؟؟؟؟؟؟ بسمعوا اسم بنك فيصل .......... بيجلهم هسس ...... بعيد عنك ؟؟؟؟؟؟
قولي اي حاجة ؟؟؟؟؟؟؟؟؟؟؟؟؟؟؟؟ علشان انا خلصت خلاص مع بنك فيصل والاستعلام البنكى خلص اليوم 21-03-2010 ؟؟؟؟؟ وعايز اشترى خلاص

---

المعرض عنده اكتر من بنك وليهم مندوبين فعلا موجودين هناك بصفة دايما بس معرفش اذا كان فيهم بنك فيصل ولا لا . وحقيقى معرفش اذا كان ينفع تتعاقد مع بنك من بره اللى بيتعملو معه ولا لا الموضوع محتاج استفسارات كتير ونصيحة منى بلاش الاستعجال وتاكد تماما لو ليك نصيب فى حاجه هتاخدها .

اقتباس:

---

المشاركة الأصلية كتبت بواسطة abouleila

المعرض عنده اكتر من بنك وليهم مندوبين فعلا موجودين هناك بصفة دايما بس معرفش اذا كان فيهم بنك فيصل ولا لا . وحقيقى معرفش اذا كان ينفع تتعاقد مع بنك من بره اللى بيتعملو معه ولا لا الموضوع محتاج استفسارات كتير ونصيحة منى بلاش الاستعجال وتاكد تماما لو ليك نصيب فى حاجه هتاخدها .

---

انا روحت عند سمير الريان فى احد المرات ..........مندوب بيع اخت في ايده 15 ثانية وعرف اني عايز تقسيط ... راح حدفنى علي واحد من بنك عوده .............. سألني اسئلة اكتر من مندوب البيع ؟؟؟؟؟؟؟؟ وقعت 5 دقائق ؟؟؟ المهم الفائدة 9.6 % ....... وانا اخي اشترى هوندا سيفك من المصرية للسيارات ومن بنك عوده ايضا ........... 9 % فقط ؟؟؟؟؟؟؟؟؟؟ :U_thin1[1]:
المهم انا حروح تاني لسمير الريان الان .............. مش حتقولي حكايتك ايه معه ؟؟؟

اقتباس:

---

المشاركة الأصلية كتبت بواسطة ehab_osman

انا روحت عند سمير الريان فى احد المرات ..........مندوب بيع اخت في ايده 15 ثانية وعرف اني عايز تقسيط ... راح حدفنى علي واحد من بنك عوده .............. سألني اسئلة اكتر من مندوب البيع ؟؟؟؟؟؟؟؟ وقعت 5 دقائق ؟؟؟ المهم الفائدة 9.6 % ....... وانا اخي اشترى هوندا سيفك من المصرية للسيارات ومن بنك عوده ايضا ........... 9 % فقط ؟؟؟؟؟؟؟؟؟؟ :u_thin1[1]:
المهم انا حروح تاني لسمير الريان الان .............. مش حتقولي حكايتك ايه معه ؟؟؟

---

على حسب ضماناتك يتحدد سعر الفايده كل ماكانت ضماناتك كويسه كل ما هتاخد فايده قليلة

حاكيتى مع المعرض تتلخص انى كنت بدور على عربية زى اللى كتبت مواصفاتها فى الاول وده كان صعب شويه انى القيها بسهولة والعربية كانت موجوده بس ورقها لسه مجاش والعربية قاعدت معايا حوالى 11 يوم من بعد الاستلام من غير ترخيص وكل يوم يقولو بكرة ..بكرة اصلا الورق وصل المرور اصل الورق متاخر من الشركة اللى مستوردين منها لحد ما انا بنفسى تدخلت وتتبعت ورقى فين من خلال المرور واللى عرفته ان مش عربيتى بس ده كان معايا 13 عربية ومن متبعاتى فهمت انهم انهم بيخلصو فى الجمارك كدفعه واحده مش عربية عربية الخطا اللى وقعو فيه انهم باعو العربية وهما مش متاكدين ان ورقها هايخد الوقت ده كله وكمان هما عندهم ضغط كتير بسم الله ماشاء الله من كتر البيع فالمتابعه ضعيفه شويه يعنى لاازم انت اللى تجرى واره عربينك .
بس للامانه من المعارض المحترمة وفعلا ارخص من بره ومافيش بقى عمولة ومصاريف والحاجات اللى الواحد بيسمع عنها فى المعارض التانية اللى اتفقنا عليه هو اللى دفعته .
واى استفسار انا معاك ولو حابب تكتب تليفونك وانا اتبعاك تحت امرك بس انت مقلتش انت هتجيب عربية ايه ؟

اقتباس:

---

المشاركة الأصلية كتبت بواسطة abouleila

وعلى راى المثل ( اسال مجرب ولا تسال طبيب ) :biggrin2:

---

ملقتش غير المثل دا وتقوله لدكتور محمود :C_laugh[1]:

من أحلى قصص الحب اللى قرأتها ....
مبروك عليك الجميلة .........

اقتباس:

---

المشاركة الأصلية كتبت بواسطة normal

ملقتش غير المثل دا وتقوله لدكتور محمود :c_laugh[1]:

---

بيعجبنى فيك انك معايا على الخط وبينى وبينك مقصوده علشان يرد واستمتع برده

اقتباس:

---

المشاركة الأصلية كتبت بواسطة sherif2net

من أحلى قصص الحب اللى قرأتها ....
مبروك عليك الجميلة .........

---

الله يبارك فيك وعلى راى عادل امام ( احنا فى زمن السيراتو )

اقتباس:

---

المشاركة الأصلية كتبت بواسطة abouleila

تصدق ان مراتى قليتلى كده برضه انفع اشتغل كاتب وبتقول انى عندى الموهبه .

متخلتيش اصدقها بس عارف لما تتكلم عن حاجه انت بتعشقها صدقنى الكلام هيكون خارج من القلب مش من العقل والنتيجه قدامك

---

اولا فعلا انت موهوب في فن الكتابة ولازم تنمى هذه الموهبة ........... وحط استاذنا سبوعي كمثل أعلي في الكتابة .......... فهو له كتابات رائعة ........ مثل "" ماما رشا "" و عربيتى التيوتا "" وده الرابط بتاع موقعه الجمييييييييييييييييييييي يييييييييييل:B4_039: .http://sab3awyat.blogspot.com/

اما موضوعي ... فانا رحت امس لسمير الريان ......... واحد مخلص كل حاجة وعايز فقط ..... عرض سعر ...... اجمل مقابلة واحسن معاملة ............. لحد ما عرفوا ان انا مخلص مع بنك فيصل ........... وش تاني خالص ... كلام في الهجايص ؟؟؟؟ كتير ..... لغاية واسعار زيادة عن السوق ؟؟؟؟؟؟ ( مع العلم قبل مايعرفوا بنك فيصل اسعار كويسة .... بعد فيصل اسعار نارررررررررررررررر ) واخيرا شرفت يا باشاااا .

انا عايز عربية كيا كارنيز .......توكيل خليجى .......... شغالللللللللللللللللللللل لللللل.
المهم انا سامع ان في مركب اليومين دول ....والعربيات حتكون في المعارض قبل 25-03-2010 .
يا رب يا مسهل .
ولك تحياتي
ايهاب عثمان

اقتباس:

---

المشاركة الأصلية كتبت بواسطة ehab_osman

اولا فعلا انت موهوب في فن الكتابة ولازم تنمى هذه الموهبة ........... وحط استاذنا سبوعي كمثل أعلي في الكتابة .......... فهو له كتابات رائعة ........ مثل "" ماما رشا "" و عربيتى التيوتا "" وده الرابط بتاع موقعه الجمييييييييييييييييييييي يييييييييييل:b4_039: .ط³ط¨ط¹ط§ظˆظٹط§طھ

اما موضوعي ... فانا رحت امس لسمير الريان ......... واحد مخلص كل حاجة وعايز فقط ..... عرض سعر ...... اجمل مقابلة واحسن معاملة ............. لحد ما عرفوا ان انا مخلص مع بنك فيصل ........... وش تاني خالص ... كلام في الهجايص ؟؟؟؟ كتير ..... لغاية واسعار زيادة عن السوق ؟؟؟؟؟؟ ( مع العلم قبل مايعرفوا بنك فيصل اسعار كويسة .... بعد فيصل اسعار نارررررررررررررررر ) واخيرا شرفت يا باشاااا .

انا عايز عربية كيا كارنيز .......توكيل خليجى .......... شغالللللللللللللللللللللل لللللل.
المهم انا سامع ان في مركب اليومين دول ....والعربيات حتكون في المعارض قبل 25-03-2010 .
يا رب يا مسهل .
ولك تحياتي
ايهاب عثمان

---

الله يخليك واشكرك على المجاملة

حقيقى انا معرفش السبب انهم مش بيتعاملو ليه مع بنك فيصل بس من الاحسن انك تسال فى بنك فيصل نفسه هما بيتعاملو مع مين من المعارض .

نصيحة منى متصدقش كلام غير لما تشوفو قدام عنيك لان الكلام ده سمعته كتير واللى هيقلك ادينى عربون علشان احجزلك وكل يوم يطلع بسبب التاخير المركب عطل فى السكة اصل الاشارات كتير فى البحر اصل فى المينا مش لاقين مكان العربيات تنزل فيه كلام كتير هتسمعه .

وانشاء الله ربنا هيكرمك