اسمي ياسر يا أستاذ عبد الحي ، ولسة المقايسة متعملتش المفروض هكلم التوكيل بكرة اعرف ايه اللي تم من ساعة ما سلمتها واتعملت المعاينة ، ان شاء الله هعرفكم التفاصيل اول بأول ، ادعيلي بس الأمور تمشي والعربية متتأخرش عندهم كتير
عرض للطباعة
تشرفنا يا أستاذ ياسر .وربنا أن شاء الله يصلح الحال ويسرلك ويسهلك أمورك . وحاول أن تفكرهم وتذن على ودنهم كل ساعة وكل يوم علشان يحسوا ويعرفوا أنك متابع ويهتموا وينجزوا غير هذا الآسلوب أكيد هيتأخروا
والله المستعان
السلام عليكم يا استاذ ياسر
الاول الف حمد الله علي سلامتك
وفي مليون داهية الحديد طالما انت بخير
بقي يا راجل اسيب المنتدي يومين ارجع الاقيك عامل حادثة
قدر الله وماشاء فعل و الحمد لله انها جت علي قد كده
من حكم خبرتي مع التوكيل الاكتر من محترم ده ... رأيي بمتهي الامانة
خد عربيتك ووديها لسمكري محترم
احسن مليووووووووووووووون مرة
بجد
انا عربيتي اترمت عندهم شهرين ونص تقريبا
وكان ليا معرفة كبيرة كمان جوه التوكيل
يا باشا بجد بجد
طالما الحمد لله الخبطة مش محصلة صدر ولا محصلة ميكانيكا
يبقي سيبك من التوكيل بجد
انت عارف حتي تقفيلهم في الدهااان زبااااااااالة
والله انا ما اقصد ازعلك .. بس انا عايز اقولك بجد بجد .. جمد قلبك وروح خدها وديها اي ورشة نضيفة احسن ملايين المرات
تحياتي
ويا ريت تطمنا
يسلم سؤالك يا دكتور حسام والحمد لله على اللي حصل وانها جت على أد كدة
بخصوص التوكيل انا فعلاً سامع ان ايدك منه والقبر بس انا عاوز اخوض التجربة لآخرها معاهم عشان ابقى بجد اتعاملت معاهم في حاجة جامدة وجربتهم عشان لما انساهم من حساباتي تماماً يبقى على أساس ، تاني حاجة الموضوع فيه فانوس هيتركب واكصدام وحرام اشيل المبلغ ده لوحدي لاني مأمن عليها ، انا حاسس ان أول سنة بإذن الله هقدر أحصل على خبرة كافية فيما يتعلق بعروض التأمين الأفضل وبمعاملة التوكيل والورش البديلة له والصيانة الدورية وايه اللي أقدر أعمله مع نفسي من غير ما اضطر اوديها ابو رواش واسيبها هناك لو حصل حاجة لا قدر الله
واديني هكلمهم تاني وان شاء الله الموضوع يخلص وان كنت ابتديت اقلق من كلام حضرتك بخصوص حكاية الشهرين ونص دول!!
لاحول ولا قوة الا بالله .. قدر الله وماشاء فعل .. أنا داخل ابارك لك لقيت الموضوع ده حصل وربنا يعينك
اولا مبروك ع العربيه و ثانيا الف حمد الله ع سلامتك و انا متابع تجربتك مع الالتو باهتمام و ان شاء الله ترجع احسن من الاول بس عاوز اسألك سؤال مع اني عارف انه ملوش لزوم دلوقتي بس حابب اعرف وجهة نظرك اشتريت ليه الالتو مع انك ممكن كنت تشتري لادا 2107 بنفس التمن و تقبل تحياتي
اولا الله يبارك في حضرتك ويسلمك من كل شر وأشكرك على اهتمامك بموضوعي
ثانيا بخصوص سؤال حضرتك اني ليه ما اشترتش لادا 2107 بنفس تمن الالتو
لما قررت اجيب الألتو رغم ان فيه عربيات كتير زيرو ومستعمل ممكن تتجاب بسعرها وتكون اعلى في السي سي او حاجات تانية ، الا اني اختارتها علشان بتحققلي اشباع لمتطلباتي من العربية اللي محتاجها في المرحلة دي من حياتي ، ابعادها صغيرة اعرف اسيطر عليها ، سي سي مش عالي وبردو مش قليل ، تكييف ، ياباني ( على الأقل موتور وجير بوكس ياباني ) ، اقتصادية في البنزين ، متتعبنيش في السواقة ، شكل عصري ، سعر منافس في الفئة بتاعتها ، تجارب ناس عديدة بتشكر فيها
لما جبت موبايل جبته سوني اريكسون وعارف انه عند البيع هيقع كتير وانه كان ممكن اجيب نوكيا بأقل من تمنه وفيه امكانيات مهولة اكتر منه لكن كانت احتياجاتي بيوفرهالي سوني اريكسون ساعتها، ولما جبت لوالدتي اداة مطبخ حجم صغير في عرض من كارفور كان الحجم الكبير منها بنفس التمن بس جبت الصغيرة عشان احتياجنا كان للحجم الصغير تحديداً ، دي طريقة تفكيري اني اجيب الحاجة اللي تلبي احتياجاتي وبس لاني مش محتاج اكتر منها حتى لو بنفس التمن اقدر اجيب حاجة اعلى لكن خارج نطاق احتياجاتي في الاجل القصير والمتوسط.
اتمنى اكون رديت على سؤالك بشكل واضح
تشرفني متابعتك للموضوع
شكرا لتوضيح وجهة نظرك
ألتو مان أخبارك أية وأية أخبار عربيتك ما فيش جديد
وربنا ييسر الآحوال ويسترطريقك وأحنا كمان يا رب
والله الموفق والمستعان
الف مليون مبروك و ربنا يعطيك خيرها و يكفيك شرها
ربنا يباركلك و متنساناش في صيانة الاف , عايزين تقرير مفصل
السلام عليكم أزيك يا ألتومان معلش على التأخير النت عملة شوية مشاكل
الناس بتوع التوكيل دول عملت معاهم أية وخدت منهم ميعاد للتسليم ولا لسة .
لو ميدينك ميعاد بعيد شوية زن عليهم شوية وأستعجلهم علشان يفتكروك
ويخلصوا بسرعة شوية لآنهم ممكن قوى ينسوك وينسوا عربيتك
وعند التسليم راجع عليها كويس قوى فى كل حاجة علشان ما تخرجش من عندهم الا وهى 100 100 بأذن الله .
لآن لو ظهر حاجة ما عملوهاش هتبقى حكاية وشغلانة
والله المستعان
هكلمهم يوم الاثنين اشوفهم خلصوها ولا لأ وبإذن الله هراجع عليها كويس قبل الاستلام
أية الآخبار يا باشا
هما من المفروض أن مديينك معاد محدد للآستلام أمتى بالضبط ؟؟؟؟؟؟؟؟؟؟؟؟؟؟
ولا العملية ماشية أزاى
والله الموفق والمستعان
طيب ماشى هما أولا بقالهم أد أية شغالين فى العربية ؟؟؟؟
ثانيا : هما عملوا كام مرحلة وأية هى نوعية المراحل اللى خلصوها وفاضل كام مرحلة
والله المستعان
ربنا يديك خيرها و يكفيك شرها
العربيه معايا من 3\2008 عامله 43000 كم الحمد لله زى الفل
حاول تعمل الصيانه فى لهايكستب ناس محترمين جدا
زملائي الأعزاء أعضاء قسم السوزوكي المتابعين لموضوعي ، أعتذر عن قلة المتابعة لأسباب كتيرة منها العمل ، أحب أشارككم تطورات موضوعي بخصوص الألتو وصيانة الحادثة وصيانة الألف ، بخصوص صيانة الحادثة العربية استلمتها امبارح بفضل الله وبكدة تبقى قعدت شهر عندهم اتقسم على مراحل من غير ميعاد تسليم بمعنى اول مرحلة كانت تسليمها ليهم وعمل معاينة تاني مرحلة كلمو شركة التأمين تيجي تعاين وتعمل مقايسة تالت مرحلة تدخل العربية ورشة بناء على موافقة المقايسة تالت مرحلة متابعة العربية سمكرة مرة ودهان مرة وتركيبات مرة وآخر مرحلة اخطار من شركة التأمين بتسليم المالك سيارته بعد توضيح نسبة تحمله كام من التكاليف.
روحت لقيتهم ركبولي اكصدام خلفي وفانوس خلفي واتسمكر واتدهن كل من الشنطة والرفرف، نيجي لأهم نقطة وهي عمل معاينة للعربية قبل استلامها ، في حاجات كنت قايلهم عليها ونسيوها وفكرتهم بيها وعملوها في ساعتها ، الأهم ان اللي كنت خايف منه حصل وهو البطارية قولتلهم انا شاكك في البطارية من ساعة ما استلمت العربية من توكيل الدقي في المساحة شكلها مش جديدة ووقفت العربية مني والسوائل اللي جواها فارت قالولي تلاقيها سخنت ولا حاجة دي جديدة يا أستاذ قمت مدور العربية كتجربة 5 مرات أول مرتين دارت العربية والتالتة خدت وقت لما دارت والرابعة والخامسة العربية ما دارتش ، ركبني 100 عفريت ساعتها وقتلهم شوفتو ان البطارية دي مش الأصلية بتاعتها وانها متغيرة وعيب تحصل حركة زي دي من سوزوكي مع عميل أول مرة يتعامل مع الماركة ، الخلاصة ربنا وقفلي مهندس محترم كان متابع عربيتي من أول ما سلمتها أسمه أحمد سعد ، الراجل خدني بالهداوة وقاللي متزعلش نفسك بطاريتك لسة في الضمان وهنغيرهالك بواحدة جديدة وجافة كمان ، المهم غيرولي البطارية واخدت العربية واتشهدت اني اخيرا استلمتها ، وان كنت حاسس اني بفضل الله استلمتها في زمن قياسي مقارنة بآخرين اتأخروا أكتر من شهر ولا يمكن عشان الحادثة عندي بسيطة مش عارف، بعد توفيق ربنا كان اهتمام المهندس أحمد سعد ومتابعته للعربية في كل مرحلة وكمان كان بيزن على مهندسين وعمال تانيين عشان يستعجلهم في امور ادارية وحاجات خاصة بالاصلاح والتركيب ، الراجل الشهادة لله كان ذوق ومحترم ومتابع بالتفصيل لدرجة اني حسيت ان استلامي للعربية كان مجهود فردي منه ولو مكنش موجود مكنش حد عبرني ، ما علينا اهي شهادة حق حبيت اقولها في حق الراجل ده.
نيجي لصيانة الألف، بعدها حاسس اني لازم اكبس بنزين اوي عشان العربية تجري مش بلمسة زي الأول ، الفرامل بقت أحسن ، الفتيس أول ما طلعت كان ناعم والعضة راحت لكن اول ما كملت الطريق والنقلات اشتغلت العضة رجعت تاني ، لما روحت البنزينة افول بصيت على قربة المية الخضرا لقيتها مليانة لآخرها لغاية الفتحة وحسب ما انا فاهم انها المفروض متعديش الماكسيمم ولما سألت في البنزينة قالولي فضيها لغاية العلامة عشان الرادياتير ميتخنقش ، لما روحت جبت حقنة وقعدت اشفط لغاية ما مليت ازازة بيبسي تربو وكانت لسة برضو فوق العلامة بسنتي .
نسيت اقولكم حطولي زيت موبيل وان 10000 ، شكراً لمتابعة حضراتكم وانا تحت أمركم في أي استفسار على حسب معلوماتي وعلى حسب ما بفهم في العربيات.
ألف مبروك يا أستاذ ياسر على أستلامك العربية وواحدة واحدة بالراحة ما تجريش جامد علشان العربية جراية وبتسحب وربنا يستر طريقنا جميعا
أهم حاجة أنك ترجعلهم تانى تقولهم على موضوع دواسة البنزين لية لازم تدوس عليها جامد علشان تسحب ممكن يكون فى حاجة غلط
الفترة الآولى دية بالذات ما تسكتش على أى حاجة تحصل فى العربية و أى حاجة تحس بيها مش مظبوطة روحلهم وأسئلهم عليها وتنح معاهم شوية علشان يعملوا اللى أنت عايزة
بخصوص زيت موبيل وان أنا كنت كتبت موضوع عنة لسة قريب عن سرعة البخر بتاعة يا ريت تتطلع علية وتتابع مستوى الزيت على عصاية مقياس الزيت لو نقص جامد بردة روحلهم وخليهم يكشفوا عن أية السبب هل فية تسريب ولا الزيت فعلا بيتبخر بسرعة
والله الموفق والمستعان
شكراً ليك يا أستاذ عبد الحي وبإذن الله هتابع مستوى الزيت كل شوية واشوف موضوع سرعة البخر بتاعته او لاقدر الله حاجة تانية ، كنت عوز اسأل حضرتك هو اللي انا عملته بخصوص المية الخضرة بتاعة الرادياتير اللي في القربة كان صح، اقصد اني انقصها لغاية مستوى الماكسيمم بدل ما كانت مليانة لفتحتها .
وشكرا لمتابعتك
أيوة طبعا حضرتك اللى عملتوة دة هو الصح وما فيش غير كدة وحضرتك تتابع مستوى مياة الريداتير من القربة كل أسبوع ولو نقص زودوا مياة خضرا بردوة
فى الفترة الآولى دية يعنى لغاية ال 10000 كيلو بالذات أى مشكلة تحصل روحلهم فى أى وقت بدون أنتظار لمواعيد الصيانة لآنها بتكون حالات طوارىء ومش من المفروض يحصل أى مشاكل من أى حاجة بأذن الله فى الفترة دية لآنها لا يتم قبلها تغيير أى قطع غيار ولكن يتم بعدها تغيير قطع الغيار تباعا
يا ريت حضرتك تفضل متابع معانا هنا فى القسم وأيضا فى كل المنتدى فى كل المواضيع وتشارك معانا بأى أسئلة أو أستفسارات أو مشاركات وأحنا كلنا هنا بنساعد بعض فى أى حاجة نكون نعرفها وفى خدمة بعضينا . وربنا يزيد المودة والمحبة بينا يا رب ويسترها معانا جميعا
والله المستعان
الف الف الف مبروك ربنا يباركلك فيها ويديك خيرها ويكفيك شرها
شكراً لردك يا أستاذ عبد الحي ، وانا مستغرب ازاي يملوها لآخرها كدة في الصيانة !!!
وبخصوص المتابعة في القسم والمنتدى بإذن الله هتابع ، بجد الواحد بيستفيد من زملائنا الأعضاء وربنا يزيد الخير والمحبة ما بينا
التو1100 للبيع2009
بسم الله الرحمن الرحيم
السيارة زى الفل والحمد لله فابريقة برة وجوة لون احمر بس عليها اقساط بنكية اللى هايخدها يكمل...
أنا كتبت لحضرتك سؤال فى موضوع مميزات وعيوب الماروتى يا ريت نكمل الكلام هناك
لآن أنا شايف السؤال هنا فى الموضوع دة مش مناسب لآنة موضوع خاص بعضو لينا لية مشكلة وأحنا بنشاركة فيها
ربنا يباركلك فيها و يجعلها دايما سبب لكل خير