يا جدعان ..اخوكم متغرب و مش عارف حاجه في مصر

انا مسافر بره بقالي 6 سنين و بفكر اجيب عربيه استعملها في الاجازات بدل حوار الايجار ده
و عايز اجيبها في حدود ال 100 الف جنيه
و طبعا المبلغ ده مش هيكفي اجيب حاجه زيرو جامده فقولت اجيب حاجه مستعمله كويسه
بس انا عمال اسمع عن عيوب في العربيات في مصر
الناس قالولي شوفلك حاجه من دول
- اوكتافيا
- لانسر شارك
- مازدا 3
- اوبترا
- كورولا او ياريس
- صني
-النترا
- سيراتو
مع العلم ان مش هينفع معايا عربيه ضيقه او موتور ضعيف و تكون قطع غيارها في المتناول علشان المدام هتسوقها كمان يعني لازم عفشه محترمه

افيدوني افادكم الله

الفيات اللينيا ممتازه و موتورها قوي جدا و موفره في البنزين و واسعه و بودي وشاسيه قوي ..بس زي اي عربيه موديل ٢٠١٠ مش هتلاقي قطع غيارها الا في التوكيل

بقي الراجل بيقولك متغرب تقوله توكيل؟؟؟؟؟؟؟
حرام عليك ترشقه دي فلوس طلع بيها عينه
عموما هات لانسر قطع غيارها في كل حته وعفشتها رياضية واعتمادية جدا جدا ( معايا وعن تجربة ) وطبعا تبقي 1600 سي سي وممكن تجيبها 2007 او 2008 بالمبلغ اللي معاك

ممكن تجيب الالنترا سيارة ناعمة ومريحة وقطع غيارها متوفرة خارج التوكيل وقليلة الاعطال وتكييفها جامد وسعرها حلو- على حدعلمى ممكن ب100 الف تجيبها زيرو مانيوال او تزود حاجة بسيطة وتجبها اوتوماتيك

هات لانسر وخليك في المضمون

لانسر بوما او شارك قطع غيارهم سعرها معقولة جدا و متوفرة

بص اولا راى هات عربيه زيرو اضمن واحسن ليك

ثانيا لو عريبه زيرو يبقى بردوا هاتها اتوماتيك علشان الزحمه ولو المدام هتسوقها تبقى اسهل

ثالثا افضل خيار هى 100.000 واتوماتيك واعتماديه وقطع غيارها متوفره عند اى حد وامنهم هى النيسان صنى

يارب اكون قدرت افيدك

اقتباس:

---

المشاركة الأصلية كتبت بواسطة mahamedaraby

بص اولا راى هات عربيه زيرو اضمن واحسن ليك

ثانيا لو عريبه زيرو يبقى بردوا هاتها اتوماتيك علشان الزحمه ولو المدام هتسوقها تبقى اسهل

ثالثا افضل خيار هى 100.000 واتوماتيك واعتماديه وقطع غيارها متوفره عند اى حد وامنهم هى النيسان صنى

يارب اكون قدرت افيدك

---

رأيى المتواضع خليك فى النيسان صنى سوبر صالون:satelite:

لو زيرو هات النترا اوتوماتيك ب 98 الف

لو مستعمل يبقى لانسر بوما اوتوماتيك

اقتباس:

---

المشاركة الأصلية كتبت بواسطة hosam_optrawy

لو زيرو هات النترا اوتوماتيك ب 98 الف

لو مستعمل يبقى لانسر بوما اوتوماتيك

---

بيقولوا الالنترا فيها عيب في علبه الدركسيون و ال لانسر البومه دي انا مش بطيقها

اقتباس:

---

المشاركة الأصلية كتبت بواسطة macdiv

الفيات اللينيا ممتازه و موتورها قوي جدا و موفره في البنزين و واسعه و بودي وشاسيه قوي ..بس زي اي عربيه موديل ٢٠١٠ مش هتلاقي قطع غيارها الا في التوكيل

---

انا مشوفتش الفيات دي و محدش قالي عاليها . لو في حد هنا في المنتدي يعرف اكتر عنها يقولي

اقتباس:

---

المشاركة الأصلية كتبت بواسطة shooter123

بقي الراجل بيقولك متغرب تقوله توكيل؟؟؟؟؟؟؟
حرام عليك ترشقه دي فلوس طلع بيها عينه
عموما هات لانسر قطع غيارها في كل حته وعفشتها رياضية واعتمادية جدا جدا ( معايا وعن تجربة ) وطبعا تبقي 1600 سي سي وممكن تجيبها 2007 او 2008 بالمبلغ اللي معاك

---

انت قصدك بوما ولا شارك

اقتباس:

---

المشاركة الأصلية كتبت بواسطة wal

ممكن تجيب الالنترا سيارة ناعمة ومريحة وقطع غيارها متوفرة خارج التوكيل وقليلة الاعطال وتكييفها جامد وسعرها حلو- على حدعلمى ممكن ب100 الف تجيبها زيرو مانيوال او تزود حاجة بسيطة وتجبها اوتوماتيك

---

انا اختي معاها ماتريكس و بتشتم جامد في توكيل غبور ده

اقتباس:

---

المشاركة الأصلية كتبت بواسطة abo.mayyam

رأيى المتواضع خليك فى النيسان صنى سوبر صالون:satelite:

---

انا كان معايا واحده 1800 سي سي هنا سوبر صالون بس كانت ياباني و كانت ممتازه جدا بس معرفش التقفيل المصري عامله ازاي

بص ياباشا طبعا انا مش مقتنع بكل واحد يدخل يقولك هات كذا من غير ما يقولك ليه فاحنا نتكلم بطريقه عمليه شويه و اقولك احنا عملنا مقارنه ازاى و اللى حضرتك شايفه صح اعمله وناخدها واحده واحده
1-اوكتافيا :طبعا عربيه جميله جدا بس 100000 مش حيجيبم اوكتافيا نضيفه a5ولو a4بصراحه خساره تدفع فيها المبلغ ده فمن راى الاوكتافيا كده لا
2-لانسر شارك :شكلها جامد جدا وميتسوبيشى طبعا شركه محترمه ويابانى بس العربيه 1500سىسى وده يعتبر صغير على حجم العربيه شويه ثانيا ان العربيه ملهاش سوق فى مصر والدليل على كده ان التوكيل رجع ينزل بوما و فيه منها موديل 2010 وده اكبر دليل على فشل الشارك فى مصر
3-مازدا3:عربيه جميله و كعربيه انا شايف مفيهاش عيوب بس موضوع قطع الغيار بتاعها صعب شويه و كمان ملهاش برضه سعر اعاده بيع فى مصر
4-اوبترا:من اعلى اعاده سعر البيع و هى عربيه كويسه بس انا شايف ان شكلها الخارجى رخم شويه و توكيلها رخم حبتين(وبالنسبه بقى للنقطه ده فهى ازواق فلو شكلها عاجبك فانا ارشحهالك لانها عربيه حلوة و فى نظرى لايعيبها الا شكلها)
5-كورولا:ب100000 يعنى حتجيب كورولا الشكل القديم وانا اسمع انها مش ثابته قوى على الطرق السريعه وكمان انا شايف ان اللى بيشترى تويوتا بيدفع فلوس فى العلامه التجاريه يعنى حرام تدفع 100000 فيها و كمان مستعمله والياريس مينفعش نقارنها لانها اساسا مش من نفس الفئه
6-صنى:فى وجهه نظرى عربيه فاشله لانها من جوه وحشه جدا جدا و تقفيلها ردئ لدرجه غريبه وتقفيلها المصرى زباله
7-النترا:عربيه ممتازه بكل المقاييس يعبها الباور و انها بتوطى جدا مع جلوس حتى لو فردين فقط عدا ذلك فهى عربيه ممتازة قطع غيار و اداء و موتور و سعر اعاده بيع كما يعيبها التوكيل والسبب الرئيسى نزول النترا بشكل جديد فى 2011 وده حيدفن الشكل القديم
8-سيراتو (عن تجربه و بكل امانه):الوكيل مايتركبش غير بعد الexلان الlx برضه خاماتها رديئه اما بالنسبه للخليجى فممتاز جدا وشكلها الخارجى تحفه و صالونها فى الفئات العاليه كانها بى ام بس برضه لازم نقول الملاحظات او العيوب ان اللى بجنط 17 عفشتها ناشفه و اى مطب جامد اللى راكبين فى العربيه بيحسم بيه ولكن فى المقابل بتدى ثبات وكمان توكيل محترم جدا وانا شايف ان السيراتو سعر =سلعه

يارب اكون افدت حضرتك و القرار الاول و الخير يرجع لحضرتك و ده ازواق ولولا اختلاف الازولق لبارت السلع

اسف للاطاله ................وتحياتى و مبروك مقدما

ممكن تجيب زيرو
النترا اوتوماتيك او سيراتو مانيوال
او كروز مانيوال او صني اوتوماتيك

اقتباس:

---

المشاركة الأصلية كتبت بواسطة mohamedhfz

بيقولوا الالنترا فيها عيب في علبه الدركسيون و ال لانسر البومه دي انا مش بطيقها

---

انت عايز عربيه تحبها وتطيقها

ولا عربيه تركبها فى فترة اجازتك وتكون عمليه وقطع غيارها متوفره وسعرها معقول وعفشتها قويه ؟؟

اقتباس:

---

المشاركة الأصلية كتبت بواسطة mohamedhfz

انا مشوفتش الفيات دي و محدش قالي عاليها . لو في حد هنا في المنتدي يعرف اكتر عنها يقولي

---

عربيه جميله جدا وده موضوع شامل ومميز ليها عمله عضو هنا في المنتدى

http://www.nilemotors.net/Nile/106551-a.html

اقتباس:

---

المشاركة الأصلية كتبت بواسطة mohamedhfz

انا اختي معاها ماتريكس و بتشتم جامد في توكيل غبور ده

---

معظم التوكيلات هنا ليست على المستوى المطلوب,مش هتلاقي حد زي المانع مثلا هنا :36_1_1[1]:




لو زيرو يبقى صني , وبفضل الـ ex باضافة الـ abs , لان الفروق بنها وبين ال سوبر صالون مش حاجه مؤثره ماعدا عمود الاتزان اللي موجود في الامام ,
غير كده كلها حاجات ممكن الاستغناء عنها .
وموضوع التقفيل المصري مش واضح فيه اي مشاكل كبيره ممكن تدايق حضرتك ( كلها حاجات بسيطه لو ظهرت )
وربنا يوفقك للاختيار الافضل

نصيحة ماتنزلش عربية معاك من هناك .. تعب وبهدلة ومصاريف جامدة على الفاضي

و الله يا جماعه انا بشكر كل واحد فكر انه ياخد من وقته و يرد علي سؤالي .
بس عايز اقولوكوا ان حيرتي زادت بس دماغي بدأت تروح للسيراتو لأني شايف ان الناس بتشكر في كل حاجه فيها ماعدا العفشه الناشفه بس
و الالنترا و الاوكتافيا بردو في الصورع معايا
لو حد عنده رأي تاني ياريت يشاركنا