رجاء المساعدة العاجلة جداَ .. دكتور نفسية و عصبية
انا منشغل عن المنتدي بقالي فترة بسبب صديق حالته غريبة جداَ بحاول أساعده و بحاول أتصرف معاه و طلع عيني !
حالته معقدة فوق ما تتصوروا ..
1) بيتخيل إنه بيتكلم و يشوف ناس توفت! مثلاََ بيقولنا إن والده وصله إنهاردة المكان الفلاني و هو والده متوفي .. و يقولنا انا خرجت إنهاردة مع فلان و يقول واحد صاحبنا متوفي برضه!
2) بيخترع شخصيات مش موجودة أصلاَ ! زي شخصية بنت بتحبه مثلاَ !
3) بيقول إنه بيسمع أصوات بتكلمه عننا تكرهه فينا !
4) بيتقمص شخصيات يكلمنا بيها عالتليفون و عالنت توهمنا إنه في أزمة و تطلب مننا نهتم بيه أكتر .. و الموضوع ده تم إكتشافه بالصدفة.
5) بيتصل بأهالي صحابنا يقولهم حاجات مش كويسة عنهم!
6) تقريباَ زائر يومي للمستشفي كل شوية ترجيع و يغم عليه.
7) أوهمنا إن عنده ثقب في القلب و إنه هيموت و سافر فترة و رجع قالنا إنه عمل عملية .. بعد كدة قالنا انا عندي كانسر! و التحاليل طلع مفيهاش حاجة .. و دلوقت طالع في إن العملية الأولانية هتبوظ ..
حبه لأصدقائه حب مرضي بشكل كبير .. اللي بيهتموا بيه بيبهدلهم عشان يشوف هيستحملوه قد إيه .. و اللي مبيهتموش بيه بيكون عنيف معاهم و يبوظلهم حياتهم عشان يهتموا بيه .. بيخلق لنفسه مشاكل عشان يخليهم يقفوا جنبوا زي إدعاء إنه هيموت .. و ساعات يخلق لهم هما مشاكل عشان يقف جنبهم ! و أي مشكلة لازم يقلبها علينا و انا المشاكل هدت حيلي و إنتوا مش بتقدروا في حين إن تلات تربع المشاكل من خياله.
الحقيقة انا عملت معظم الحاجات الممكنة و مش عارف إزاي أخده بالعافية لدكتور نفسي لأنه رافض الموضوع و بيقول انا مش محتاج! انا قريت كتير في علم النفس و عارف أتعامل معاه نوعاَ ما يمكن أكتر واحد من الأصدقاء بس الحالة معقدة بشكل كبير!!
أي إقتراحات ل سمحتوا .. و اللي يعرف دكتور نفسية و عصبية ممتاز يقولي عليه.
عايز أساعده يبطل يبوظ حياته و حياة اللي حواليه.
ملحوظة : الأهل غير موجودين في مصر فا مش عارفين نوصل ل full history للحالة بس هي لسة حاجة جديدة.