تقييم مركز حورس لصيانة هيونداي بالزمالك ...
كنت امبارح بعمل صيانة ال 15 الف كم عند مركز حورس اللي الزمالك .
المركز في شارع ضيق جدا ( حارة ) بس الوصول له سهل لانه خلف محطة مصر بتاعة البنزين
اول ما دخلت استقبلتني موظفة عشان تشوف المطلوب واتكتب في ورقة وقالولي استنى فوق في الاستراحة ( مكان نظيف وفيه تلفزيون ) وقالتلي الصيانة هتاخد ساعة ونص .
ما فيش وانا قاعد 5 دقائق ونادوني تاني وقالولي في صوت في الشباك غريب عند الفتح قلتلهم ده هي كده من الاول وياريت تشوفوا السبب.
المهم استنيت من 10 ص لحد 12:30 وجالي الفني وقالي احنا مخلصين من بدري والله بس اللي
واخد وقت موضوع الشباك عشان فكوا الفرش بتاع الباب كله وفي الاخر طلع في شرخ في قطعة مش موجودة عندهم .
المهم : اجمالي المشتريات : تغيير زيت شل الترا 215 ج
فلتر زيت : 18 ج
المصنعيات : 160 ج
ضريبة 10 % على قطع الغيار والزيت
الاجمالي 416.5 ج
وطبعا عملوا الفحوصات بتاعة ال 15 الف كيلو بجانب تربيط العفشة ....
والهدية بقه هي غسيل السيارة مجانا من الخارج والداخل مع غسيل الماكينة . وبصراحة غسيل فوق الممتاز بالنسبة للماكينة . رجعت اكنهاا جديدة.
عموما الاستقبال والفنيين والمهندس المسئول كلهم تعاملهم كويس وشكلهم مدربين بشكل جيد ومكنش في اي ملاحظات بعد الصيانة والحمد لله .
ورغم ان عربيتي خليجي المهندس المسئول وافق انها تدخل الصيانة.
وعلى فكرة كنت بشوف عربيات غير هيونداي بتعمل صيانة .شفت مثلا تويوتا كورولا ولانوس ورينو كليو .... مش عارف دول نظامهم ايه.
بشكل عام تقييمي للمركز 10/9 وده شيء جيد جدا مقارنة بابو رواش . مع العلم اني اتعاملت مع ابو رواش في عربية اخويا.