الموضوع: تجميع السيارات في مصر , كنز لماذا لا يستغل ؟

المشاركة الأصلية كتبت بواسطة ahmed0nouh

والله يا استاذ كريم انا اسعد وكفايه ذوقك والحوار الهادئ اللى بقالنا كتير قوى مبنشوفهوش فى المنتدى , انا لو عندى معلومات بقولها على طول :) بس انا حقيقى فى الجانب المحلى مش متواجد قوى يعنى وبصراحه اللى اعرفه ان تويوتا اخر شركه ممكن تفكر فى تجميع عربيه فى مصر لأن على حد كلامهم انها هتجيب معاهم بخساره وده سمعته من واحد زميل سأل السؤال ده قبل كدا لحد من قيادات الشركه ازاى هما معاهم كورولا اللى جيل ورا جيل الناس بتستناها ولم يستغل تجميعها او الياريس فى مصر لمنافسه سعريه افضل

bmw و مرسيدس فى السوق هنا على فكره مفيش بينهم تنافس زى ما يبدو يعنى , الناس دى حبايب وبتلعب انت حته وانا حته وكل واحد وليه الزبون بتاعه عكس أودى فى مصر مثلا ماشيه ضدهم بكل ما اوتيت من قوه علشان تثبت عربياتها وده هتشوفه فى التعامل مع العملاء اللى لو واحد فيهم على وشك شراء أودى هتلاقى رجل المبيعات معاه بيقارنها بشكل صريح مع المقابل من المرسيدس او البيمر



بالظبط دى نقطه اساسا يفتقدها كتير من مصانع التجميع فى مصر , مش دايما الشركه الام بتفرض رقابه صارمه على مصانع التجميع دى فبالتالى بيكون الوكيل هو المستفيد وصاحب معايير الجوده فى نفس الوقت وده بيحصل مع العربيات اللى اساسا محليه الانتاج والتسويق ومتفرقش مع سمعه الشركه الام فى حاجه زى الفيرنا واللانوس والصنى , ويمكن ده احد اسباب ان تويوتا ايجيبت مش هتعمل هنا مصنع علشان مثلا لو هتجمع الكورولا بجوده برا ممكن فرق السعر ميحققش المنافسه المطلوبه بجانب المكسب اللى مش هيعوض بناء المصنع وخط الانتاج

يعنى انا مثلا لو مستهلك عادى و لقيت بين الكورولا المصرى واليابانى 5 الاف جنيه اكيد هجيب اليابانى علشان انا عارف ان المصرى مستحيل يبقى فى جوده اليابانى ولو 20 واحد اثبتولى العكس هلعب برده فى المضمون , وده يتطلب ان الشركه تبعد سعر المحلى كتير عن المستورد وبالتالى بنفس الجوده هيبقى المعادله صعبه والمكسب يمكن يكون أقل



اللى بتقراه بيبقى خارج من تحت ايد نفس الصحفى اللى بيقولك ان العربيه الصينى هى الاسرع والاوسع والارخص والافخم والاقل استهلاكا للوقود والافضل امانا فى الفئه بتاعتها والفئه اللى وراها بشويه , وبالفعل مصر مش مستفيده من اتفاقيه اغادير فى التصدير حاجه علشان حجم المكون المحلى اقل من الشروط المطلوبه



هو فى كل الفئات بشكل عام الوكيل اللى بيجمع بجانب انه بياخد منك مكسب العربيه نفسها هو عايز ياخد منك حق خط الانتاج اللى هو عمله ده وحق تشغيله فطبيعى انه بيكسب فى المحلى اكتر من المستورد وعلشان كدا ساعات كتير تلاقيه لما اتجمعت محلى مفرقتش كتير عن المستورده

احييك على كلامك , حضرتك غطيت اهم النقاط فعلا

للاسف فعلا فرق السعر بيصغر جامد , لأنه بيحتاج يغطي مصاريف التشغيل و العمال , و عشان تكون بنفس جودة السيارت العالمية بيحتاج يجيب افضل المكونات و الخامات غير العمالة الغالية

بس لازم يكون في حل عشان نستغل القوة البيكبر بيها السوق

مشاء الله مبيعات العربيات دلوقتي بقت اعلى من اي وقت قبل كدة , و كل الفئات بقا فيها منافسة قوية جدا و كل عربية بتدور على حاجة واحد تميزها عشان الناس تشتريها

و احنا عندنا ناس كتير مستعدة تضحي بجانب من الجودة عشان سعر العربية يقل

خصوصا ان العربيات عندنا هنا بتعتبر رفاهية فالناس بتحب الرخيص

عامة تجميع العربيات عندنا اظن ان هيكون اول الطريق لتصنيع عربية مصرية

لأننا اكيد بنستفيد من خبرات الشركات , طبعا دة لو جمعنا عربية جديدة , مش عربيات اتوقف انتاجها


و اشكر حضرتك جزيلا على كلامك الجميل دة , و حوارك المفيد

لما بيبقا النقاش هادئ الناس بتستفيد و انا عن نفسي استفدت كتير جدا و في حاجات مكنتش اعرفها قبل كدة

و حضرتك من الاعضاء الانا بحب اتابع تعليقاتهم لأنها بتبقى دايما مفيدة و في صميم الموضوع

طبعا دى غير المواضيع الجميلة الحضرتك بتعملها :)

المشاركة الأصلية كتبت بواسطة zaza_lanos

المشكلة فى الايد اللى عايزة قطعها
وكلكم اتعاملتم مع فئة الحرفين ربنا يخودهم علشان نرتاح ونتقدم بقى

للأسف دة بسبب انهم "بيترخصوا" , فبيجيبوا عمالة اقل من المستوى المطلوب

دة غير ثقافة المجتمع نفسها و هي ان مينفعش عامل -حتى ولو في صناعة مهمة زاى دي- يكون معاه شهادة او متعلم

لازم يكون ميكانيكي و بيشتغل في المصنع الصبح و الورشة بعد الظهر

مع ان لو جابوا حد فاهم و متعلم , هيفيد الموضوع جدا لأنه هيبقى عارف هو بيعمل ايه بناء على دراسات

المشاركة الأصلية كتبت بواسطة n.y.s.m.a

موضوع جميل جدا ومناقشة رائعة

بس طول عمري بسأل نفسي سؤال بقى

هوة لو إحنا صنعنا عربية محلية بالكامل بأيدي وعقول مصرية .... موتور عفشة فتيس بودي كهرباء كل حاجة بلا إستثناء (بس ناخد بالنا من موضوع دواسة البنزين )

وهانفترض كمان إن جودتها لاتقل بأي حال عن عن جودة اللانسر مثلا أو ما شابهها من سيارات يثق بها الناس


السيارة المصرية دي سعرها هايكون في رينج كام هل هايفرق ويبقى رخيص فعلا .. لأن ساعتها المفروض إننا شلنا من على سعرها مبلغ الجمارك بالكامل وكمان مبالغ النقل ومصاريفه المتربطة بيه وربح الشركة الأم الأجنبية + وكيلها المصري .. وهانكتفي بربح الشركة الأم المصرية فقط

هل اللى أنا باقوله ده حقيقي ولا أنا بحلم وسعرها مش هايفرق في حاجة خالص

اكيد لو بقت مصرية 100٪ هتبقى ارخص كتير

و لكن للاسف احنا معندناش خبرة كافية للموضوع دة , احنا يادوب بنجمع عربيات اتوقف تصنيعها و التكنولوجيا بتاعتها قديمة

يعني دولة زاى تركيا بتجمع الميجان و الفلونس و اللينيا , عربيات حديثة , يستفيدوا من تجميعها

فتبقى فرصتهم انهم يعملوا عربية بتاعتهم اكبر

او زاى الصين , الصين مبتدتش تعمل عربيات غير بعد لما بقى في عربيات كتيير بتتجمع هناك

و احنا لازم هنبتدي بحاجة جودتها قليلة و اوبشنز كتير و سعر قليل , السعر يغري المشتري , و الناس تبتدي تشتري لغاية ما يثقوا في العربية و بعدين نبتدي واحدة واحدة نعلى بمستوى العربية

زاى بالظبط ما الصين بتعمل , و دة كان حال الياباني لغاية ما وصل للاحنا شايفينوا دة

المشاركة الأصلية كتبت بواسطة m.osman

انا شايف ان الشركات مش شايفة ان هيكون فيه مراقبة جودة كويسة في مصر

تفتكر لية تويوتا مش عاملة مصنع تجميع في مصر ؟؟ ولا هوندا ؟؟
اكيد خايفين على سمعتهم ..

انا واحد راكب عربية تقفيل مصري هيونداي
كنت في الأول بقول فيها شوية عيوب عبيطة في الفينيش بتاعها .. عادي زي اي عربية ... لكن لما اجي اصلحها و الاقي الصاج اللي تحت الرفرف مصدي لوحده و العربية مكملتش 3 سنين ... يبقى طز في هيونداي و التقفيل المصري كله

مش عايزه
و لا راكب هيونداي تاني لأنها لو بتدور على سمعتها مكانتش سمحت ان العربية تتفل بالمستوى دا

يا باشا العربية اتوقف تصنيعها , لذلك هيونداي مش هتهتم بالجودة , و خصوصا ان احنا شوق ضعيف جدا جدا جدا بالنسبة للاسواق البتحظى باهتمام هيونداي , زاى امريكا و اوروبا

انما لو بصينا على السوناتا البتتجمع هنا , فاظن ان احنا هنلاقي جودة تصنيع افضل لأن العربية اغلى و عربية موديلها لسه مبقاش قديم (طبعا قبل ما الشكل الجديد ينزل)

المشاركة الأصلية كتبت بواسطة fellacd

الغريبة إن العربيات اللى بتتجمع فى مصر بتتباع تقريبا بسعر المستورد
طب فين فرق الجمارك؟؟؟ .. فييييين؟؟؟؟؟
والله حاجة تجنن

زاى ما الاستاذ احمد نوح قال

لما العربيات بتتجمع هنا , التوكيل بياخد فلوس عشان يغطي مصاريف تشغيل خط الانتاج و اجور العمال و طبعا غير حاجات كتير

غير مكسب العربية نفسها و مكسبه هو.