المشاركة الأصلية كتبت بواسطة Amr A.salam
السلام عليكم
امبارح بالليل جه في دماغي أنا واصحابي نطلع اسماعيلية صد رد (ناكل أكلة السمك التمام)
المهم وأنا ماشي عادي في نصف الطريق وخير اللهم اجعله خير واذ بنقرة عميقة جداً ناحية الكاوتش الشمال .
المهم حاولت اتفاداها ما لحقتش وكنت ماشي على 100 -120 مثلاً ......طبعاً صوت انفجار عظيم واتشقلطنا جوة العربية ورجرجة .............ركنت على جنب .....الكاوتش الوراني مقطوع وما أخدتش بالي ساعتها ان الأداماني برضه جتله بالونة
ملحوظة : يا رب يجازي المسؤل عن الحتة دي لأني كنت هاروح فيها أنا و3 شباب زي الورد لولا ستر ربنا ان الكاوتش الأداماني مش هو اللي فرقع
غيرنا الكاوتش بالاستبن والكوريك السامبوكسة اللي جاي مع العربية طلع عينينا
المهم كملنا الطريق بعد ما نفسنا اتسدت :H_angry[1]::H_angry[1]::H_angry[1]::H_angry[1]:
النهاردة بدأت رحلة البحث عن كاوتشات بعد ما اكتشفت ان العجلة اللي قدام عملت بالونة
رحت الحي السابع دورت على هانكوك k415 زي اللي عندي (جنط 16) ما لقيتش في كل حتة ولقيت كومهو نفس المقاس (النقشة اللي فيها قريبة أوي من عجلتي) جبتها كانت ب355 العجلة
بالمناسبة اكتشفت ان الكوبيه بينزلها كاوتشات نوع كومهو والهاي لاين (جنط 17) برضه
أمال انا نازللي كاوتشات هانكوك ليه (الاتنين صناعتهم كوري بس مش عارف أنهي كفائتها أعلى)
خلصت قصة الكاوتشات واطمنت رحت نازل على دمشق اشتريت ستاير كبس عملوا 100 جندي من عند ابراهيم وهي ظريفة بصراحة ولايقة على لون العربية الأبيض
وانا راجع من دمشق رحت معدي على GO Car Accesories اللي اعلاناته على المنتدى علشان أغير لمبات الزينون بلمبات أقوى فقلتله أن اليو اس بي بيهيس وبيفصل كل ما أشغل الزينون قاللي نركب مكثف قبل كل لمبة Capacitor هيظبط كهربة العربية...ركبته وبقى فل أوي وجربت أفصل الزينون واشغله ستين ألف مرة لغاية ما كنت هاحرق اللمض وكله تمام....ما رضيتش أركب للفوجات لغاية ما اتأكد على الاخر كان تمنه 90 جندي للمكثف الواحد
وسألت عنده على جهاز الجي بي اس الأصلي بتاع السيراتو قاللي انه نزل للكارينز بس وكان تمنه 3200 وما نزلش للسيراتو لغاية دلوقتي (نفس الكلام دة كان عربكوم قالهولي قبل كدة )
الخلاصة :
1- ماحدش يروح اسماعيلية ياكل سمك تاني ههههههههههه(ماله الأكل هنا....جميل أوي)
2- الزينون دلوقتي بقى ليه حل للي عايز يركبه من غير ما الفلاشة تفصل
3-بفكر اشتري كوريك تمساح أحسن بكتير
4-الحمد لله قبل كل شيء لأن الموضوع كان ممكن يكون أكبر من كدة بكتيير:ask: