الكابتن انهاردة في الجيم قالي انت محتاج تاخد امينو ؟؟! عايز راي حد فاهم لو سمحتم

**MomoMedo** · 20-03-2010 11:40 PM

السلام عليكم
انا بتمرن بقالي شهر وشوية اهو والكابتن انهاردة قالي انت محتاج تاخد امينو
بس انا مقلق بصراحة ف عايز راي دكتور لو سمحتم في موضوع الامينو دة مضر ولا مش مضر
ولو في طريقة معينة اخدوا بيها عشان ميعملش ضرر
كدة يعني :b4_592:
وشكرا ليكم مقدما :)

**Ralliart** · 20-03-2010 11:47 PM

انا بقلق من الحاجات دي
بس هما عامةً بيقولو كده عشان يبيعو مش اكتر

**Most_H** · 20-03-2010 11:50 PM

الطبيعى مفيش احسن منه

ونصحية اخوية ، بلاش تخلى الكميا هى اللى تبنيك

انا عندى سنة طحن، ولا يوم بأمينو

ولو قالك دة علشان البروتين والغذا، وبيتحرق والكلام دة، متسمعش كلامة، كل فى البيت احسن، لان الحاجات وحتى لو اتحرقت، فا هى بتسيب اثر

بلاش كميا

**SHNORY** · 21-03-2010 12:02 AM

الاحماض الامينيه هي الناتج النهائي من عمليه هضم البروتين في الجسم
ولما الواحد بياخد امينو صافي زي اللي بيتباع
بيكون ليه معدل حرق معين وتمرينات معرفهاش
ولو متحرقش بالكامل بياثر علي الكليه والكبد والعياذ بالله علي المدي الطويل او القصير
دا كل اللي اعرفه

**dr.amr** · 21-03-2010 12:09 AM

طبعا بلاش
وبعدين انت بقالك شهر واحد يعني لسه بتسخن
بس سؤال هل هو تطوع وقالك كده من نفسه ولا انت سألته
وهل قالك انا عندي نوع حلو ولا لأ

**MomoMedo** · 21-03-2010 12:31 AM

المشاركة الأصلية كتبت بواسطة dr.amr

طبعا بلاش
وبعدين انت بقالك شهر واحد يعني لسه بتسخن
بس سؤال هل هو تطوع وقالك كده من نفسه ولا انت سألته
وهل قالك انا عندي نوع حلو ولا لأ

لا والله دة في نص التمرينة كدة لقيته بيقولي انت محتاج امينو واتنين صحابي كانو معايا قالهم انتو محتاجين بروتين ..

انا مش فاكر بالظبط بس انا سالته تقريبا هو مالوش ضرر قاللي لما يتاخد صح لا وبعدين اهو عندي جوة وبتاع

وفي راجل هناك جسمه ماشاء الله
فبساله قالي مالوش اضرار احتياج اللي بيلعب اكبر من احتياج الانسان العادي ودة اسمه مكمل غذائي
ازاي كمان هيتباع في الصيدلية لو ليه اضرار؟؟

**Ahmed A Rahman** · 21-03-2010 01:02 AM

الامينو اختصار كلمة amino acids

لو فرضنا ان البروتين هو سبحة كبيرة يبقى الامينو هو حبات السبحة دي
عدد الحبات في انواع السبح المختلفة من 2 الى كذا مية حبة في السبحة الواحدة

لو حضرتك اكلت لحمة مثلا ودخلت على الدم وهي بروتين معقد حتبقى ليلة زرقا
لان ساعتها الجسم حيتعامل معاها كأنك زارع عضو غريب وحيحصل حساسية وتدمير للجسم

يبقى الحل ان اللحمة تتكسر لآخر حاجه ممكنة في الامعاء قبل الهضم وتتحول الى حمض اميني

خللي بالك ان الاحماض الامينية بتاعة اللحمة مفيش فرق بينها وبين بتاعة الفول او العدس او الفراخ او السمك او الكبدة او اللبن طالما بنتكلم على الاحماض الامينية

الاحماض الامينية 20
10 الجسم بيعملهم : احماض امينية ملهمش لزمة لانك تقدر تعملهم لو كلت عيش حاف
10 الجسم لازم ياخدهم من بره

طيب اشمعنى اللحمة اغلى من القلقاس والاثنين فيهم بروتين؟؟؟
اللحوم والاسماك فيهم انواع اكتر من ال10 المهمين
البسلة والجزر والقلقاس (مثلا) فيهم انواع اكتر من ال10 اللي مش مهمين

الاكل النباتي الوحيد اللي مساوي للحمة هو اثنين: الفول والعدس (عرفت ليه الشعب المصري يفوت في الحديد؟)

ليه بقى اروح اشتري امينو بكذا ميت جنيه عشان آخد حبة احماض امينية لو اكلت حتة لحمة حعرف اخدهم

مبعرفش أهضم ؟؟ لأ
مبعرفش استفيد منهم ؟ برضه لأ

أساسا ياريت أصلا تكون الحبوب المستوردة معمولة من احماض امينية بس

لاني قريت قبل كده ان ساعات شركات عايزه الحرق بره بتعمل الجيلاتينة بتاعة الكبسولة من دهون وجيلاتين فيها هرمونات وساعتها بقى .................................................. ..............................................

فأنضحك بلاش بلاش بلاش