جن2 اوتوماتيك 2008 وعداد 75000 كم حتى اليوم - تقرير- من تويتي
السلام عليكم ورحمة الله وبركاته
الاخوه الاعضاء
ارجو ان تكونوا منتظرين هذا التقرير كما عودتكم في التقارير السابقه
السياره موديل 2008 اوتوماتيك هاي لاين
السياره ماشاء الله بحاله ممتازه حتى الان وكما ذكرت قبل ذلك انني اخر صيانه لي كانت صيانة ال 60000 كم في التوكيل والتي شملت تغيير
سير كاتينه
فلتر بنزين
بوجيهات
سير المجموعه
ولكن لم يتم تغيير بلية الكاتينه لانها كانت غير موجوده وعند سؤال احد الفنيين قال ماتغيرهاش طالما مش عامله صوت معاك ومافيش اي ادنى ضرر على سير الكاتينه
طبعا الزيت والفلتر كالعاده بغيرهم بره شل الترا 10000 كم والفلتر بتاع البومه الاصلي ب 35 جنيه مع كل تغييرة زيت على 8000 كم بالكتير
انا اتعودت اغير الزيت بدري لراحة الموتور
بعد الصيانه
على ال 68000 كم كنت المفروض اني مغير زيت الفتيس على ال 40000 كم ولكن قررت اني اغيره كمان وذلك لراحة الفتيس ايضا كل 30000 كم وطبعا اشتريت الزيت من شل اللتر ب 26 جنيه
واخدت السياره 5 لتر
ولكن ماغيرتش زيت الباور لان كتير من الفنيين قاللي مالوش داعي
بالمناسبه الجن2 اوتوماتيك مالهاش فلتر زيت للفتيس
وتم تنظيف حساس الفتيس بالهوا وهو راكب مكانه طبعا
كل الاصلاحات دي تم تغييرها في مركز الخدمه اللي في اخر فيصل طبعا اللي شغالين فيه هما اللي كانوا في التوكيل
ولو تفتكروا كمان موضوع طبة الزيت اللي هرشت من الراجل بتاع المحطه لما كنت بغير الزيت
تم توسيع مكانها واستبدالها بطبه اكبر في المقاس ولكن قالولي لو لاقدر الله باظت تاني بتتغير الكارتيره بتاع الزيت ودي تمنها اعتقد في التوكيل ب 2600 جنيه
وربنا يستر وكان كلامهم معايا انها بطبيعتها مصنوعه من الالمنيوم الضعيف للاسف
وبكده تكون معايا العربيه ان شاء الله زي الفل
مافيش اي مشكله الا الاتي
طبعا الفرامل مش بنفس جودتها من يوم شراء السياره وذلك يرجع للتيل السيء داخل التوكيل او خارجه واذا كان التيل الريمسا احلى تيل موجود خارج التوكيل حتى الان ولكن لايرتقي للاصلي وبالطبيعي ان التيل اللي قاعدين نغيره ده اثر على الطنابير فأحيانا لما اجي اهدي من سرعه عاليه على 140 ونازل مثلا بسمع صوت احتكاك عالي مع الفرامل ودي طبعا من الطنابير وللاسف
المهم
ان شاء الله وكيل العربيه دي في السعوديه بيبع قطع غيارها الاصليه وارخص في السعر
هبعت ان شاء الله حد يجيبلي طنابير وتيل اصلي خلال الشهرين اللي جايين
مبدأيا
تيل الفرامل لحد مايجي هنا هيكون ب 350 جنيه بالكتير
طنابير الفرامل الاتنين هيكونوا بالكتير 900 جنيه
لو اصلي اصلي يبقى تماااام ومايكونش الاصلي بتاع واحد صاحبنا
انا هتابعكم كل فتره بحالة السياره معايا
ولكن حتى الان ومن خلال استخدامي لسيارات بروتون جن2
انا استنتجلكم التالي في العيوب واذا كانت المميزات تطغى على العيوب ولكن لن اذكر المميزات وسوف اذكر العيوب لاننا كلنا عارفين المميزات
1- سيارات ذات دهان سيء
2-بعض قطع الغيار في السياره ليست اعتماديه اوعمليه مثل فرن الشكمان وكارتيرة الزيت
3-فرامل ليست قويه +الاي بي اس ليس من النوع الجيد
4-تقفيل غير ممتاز ولكن جيد وليس بالسيء
فقط هذه هي ملاحظاتي في سيارات جن2 موديلات 2008 وليست سيارتي فقط
ولاادري اذا كانت الموديلات الاعلى احسن او اسوأ ولايجادلني احد في هذه النقاط لاني متأكد منها جداااااا
ارجو انا اكون افدتكم ولو بالقليل واعذروني لقلة مواضيعي ولكن ذلك يرجع الى اني لست اقول او اكتب شيء الا اذا كنت متأكد منه
تحياتي الى كل الاخوه الكرام
