الموضوع: ايه رايك فى برسونا..ادخل كلمنا عن تجربتك معاها

صباح الفل
انا واحد من ملاك بروتون
وحكايتي مع بروتون ابتدت من حوالي سنه وشويه
كنت بعمل شغل عند واحد نجار وفي محل حدايد وبويات جنب الورشه وصاحب المحل معاه واجا 2005
المهم كنت يمويا وطول ما انا عند النجار ده براقب الواجا
وبتفرج عليها ولغايه ما وقعت في حب الواجا وقررت اني اشتريها
لعده اسباب
وبعد فتره واحد صاحبي اشتري الجين2
واتفرجت علي العربيه وخلاص نويت اشتري الواجا
وفعلا روحت اتفرجت عليها في معرض العجوزه وكانت الجين والرسونا موجوده لاكن بصراحه ما اديتش البرسونا اي اهتمام مع العلم ان مراتي كانت معايا وكانت عجباها البرسونا اكتر من الواجا
وفعلا وقبل ما امشي بصيت علي البرسونا نظره خاطفه ومكانش عاجبتي فيها زراير التكيف والعدادات
المهم بعد شهرين تلاته روحت الصحراوي عشان احجز الواجا
وسبحان الله محسن صالح مدير المبيعات مكانش في مكتبه
وكان في فرصه ووقت اني اتفرج علي العربيات تاني وخصوصا ان البرسونا والواجا كانوا مركونين حنب بعض
ولك ان تتخيل ان خلال 10 دقايق واول ما دخلت لمحسن صالح قلتله انا رامي قالي اهلا استاذ رامي
هوا عارفني لان حبيبي واخويا ايمن كان مكلمه عني وان هروح احجز
المهم محسن قالي اتفضل وقالي ياتري عايز اي لون في الواجا قلتله لاء انا جاي احجز البرسونا
الراجل صعق ازاي ده ايمن مكلمني علي الواجا
المهم قلتله لاء انا غيرت رايي
وتم بحمد الله الحجز والاستلام
وكان ذللك يوم 31/12/2009
والي الان كل يوم بكتشف حاجه جديديه وميزه جديده في العربيه يوم من بعد يوم المهم اخر حاجه اقدر اقولهالك
انزل اتفرج علي العربيه

انا بقى حكايتى مع البرسونا أقدم بكتير داخلة على حوالى سنتين كده بعد ما فكرت أول مرة أجيب عربية زيرو و قتها كان معايا سوزوكى سويفت و لما فكرت أجيب زيرو ما كانش فارق معايا أوى هجيب إيه بس كان نفسى تبقى نقلة بالنسبة لى مش مجرد تغيير و السلام يعنى كنت عايز عربية أكبر حجما أعلى كإمكانيات و أحلى شكلا بس طبعا الامكانيات المادية كانت واقفة بينى و بين الحلم ده فكل اللى كنت بفكر فيه إنى أجيب لانوس.
و بعدين شفت الجين 2 كنت موهوم بيها آخر حاجة بس بكام ب84000 من غير ما أعرف إمكانياتها و لا الأوبشنز اللى فيها ولا السيفتى فاكتورز بس كنت مش عارف أفكر فى حاجة تانية و بعدين نقلت من الشغل فى أول 2008 و مرتبى بقى أحسن شوية و بقى ينفع إنى أدخل فى عربية فى التمانينات بس بصعوبة و لقيت نفسى بدور على حلمى القديم الجين 2 بس برده ارتفاع معدل الفلوس معايا خلانى أفكر فى عربيتين تانيين السيراتو القديمة و النيسان صنى و بصراحة الصنى ماكنتش داخلة دماغى أوى لا شكلو لا سعر بس السيراتو كانت عاجبانى لأنى بحب السيدان أكتر و موضوع الشنطة ده طول عمره عامللى عقدة و بالصدفة الشغل الجديد اللى كنت فيه كان فيه واحد معاه جين 2007 و الولد كان متعاون أوى و خلانى شفت العربيبة و ادانى مفتاحها و طلب منى أجربها بس أنا كنت خايف لأنى عمرى ما سقت عربية حد تانى بس بنسبة كبيرة لقيت نفسى خلاص بنسى السيراتو واللانوس و صنى و بستقر على الجين و بعدين سمعت من غبن عمتى و هو مهندس صيانة فى شركة كرايسلر مصر إن الجين عربية ممتازة و الويرا أختها الكبيرة أثبتت نفسها من زمان بس فيها عيبين جامدين أوى سعر إعادة البيع و قطع غيارها مش موجودة بره خالصو إنى هفضل طول عمرى مرتبط بالتوكيل.و هنا اتصدمت و خفت جدا بصراحة و تراجعت تماما إنى أشترى العربية خاصة كمان بعد ما قاللى إن أسعار قطع الغيار بتاعتها زى اليابانى العالى يعنى تويوتا وهوندا و سوبارو و انت طالع.
طبعا بعد الاحباط ده سألت واحد صاحبى معايا فى الشغل على الموضوع ده قاللى هى كانت غالية آه بس مش للدرجة دى و إدانى الموقع بتاع نايل موتورز أبص فيه و فعلا اشتركت و قعدت أبص على الجين و السيراتو و اللانوس و اكتشفت من المواضيع إن حاجات الجين موجودة بره التوكيل و فى أكتر من مكان و كمان قطع غيارها تقريبا فى نفس مستوى أسعار الكيا و اللانوس بس هى اللى كانت خارج المنافسة فى المقارنة دى طبعا.
المهم الأمل رجعلى تانى و بدأت أعرف أكتر عن العربية و أقرا كتير عنها كل حاجة و كل المواضيع لدرجة إنى أقنعت واحد زميلنا تانى فى الشغل إنه يشتريها و بعدها بمدة قصيرة اشتغل معانا واحد تانى معاه نفس العربية و بدأت آخد معلوماتى عملى منهم هما الاتنين و خدت قرارى بس كنت بمر بمشاكل فى الشغل و بدور على شغل تانى فماكنتش مستعجل لحد ما استقر فى الشغل الأول و بعدين شفت البرسونا طبعا حركت فيا حبى للسيدان و كمان أنا ماكنتش حابب أجيب غير مانيوال و ماكانش وقتها فيه غير مانيوال هاف أوبشن و كانت أرخص من الجين 5000 يعنى كانت ب79000 و الرقم كان وهمى بالنسبة لى ياه 5000 و كمان أكبر و سيدان و خفت طيب ليه و ازاى و شرحولى الفروقات بس لأنى و لا كنت فاهم فيهم ما فرقتش معايا كتير إيه المشكلة جنوط اسبورت و لا فرامل عادية و لا فوج لايت و لا أيا كان الأوبشن دول 5000 جنيه يا با و أنا الكسبان فى أى قرش بوفره و بعدين نزلت موضوع مقارنة بين الجين و البرسونا و أيمن رد عليا بالمقارنة بتاعة مزاجنجى الحقيقة كانت وافية جدا و قررت خلاص إنى هجيب برسونا مانيوال هاف أوبشن أول ما أنقل من الشغل علطول و بعدين نقلت الحمد لله و كانت الزيادة المرة دى كبيرة ماشاء الله عن الزيادة اللى فاتت و كنت دأت أفهم فروق الأوبشنز اللى ماكنتش همانى و قررت إنى أشترى الجين عشان مانيوال فول أوبشنز لأن الأوتو كان و مازال مش اختيار بالنسبة لى و بعدين نزلت البرسونا المانيوال الفول أوبشن وقتها احترت جداو ما بقيتش عارف أختار و قعدت مدة طويلة دماغى بتودى و تجيب من غير ما أوصل لحل لحد ما والدى قاللى حرام يبقى فرق 1000 بس و تجيب الصغيرة و بعدين إحنا محتاجين عربية كبيرة لأنى هبيع عربيتى قريب و الاعتماد هيبقى على عربيتك لفترة و وقتها قررت و قلت خلاص البرسونا و بعد مهاترات و خناقات فى البيت على إنى أجيب أى عربية تانية أرخص و السلام روحت حجزت البرسونا بعد معرض الأخبار أوتو ماك مباشرة مع أيمن و كان نزل قبلها موضوعه الجبار بتاع الخصم الإضافى اللى جابه على العربية و حجزت العربية تقريبا فى شهر 6 و استلمت فى شهر سبعة و من وقتها لحد دلوقتى و أنا كل يوم بحب العربية أكتر من اليوم اللى قبله و بيزيد إعجابى بيها أكتر و لو رجعت 1000 مرة برده كنت هجيبها و يا رب يباركلى فيها و نفضل كده علطول و على فكرة نسيت أقوللك إن الزيادة اللى كانت فى المرتب المرة التانية ما شاء الله كانت تسمحلى إنى أشترى كاتجورى أعلى بكتير بس أنا ما قدرتش ألاقى حاجة أحسن و زنقتى اللى أنا فيها دلوقتى بس عشان أنا اشتريت كاش بدل تقسيط

بالنسبه لى انا بدأت افكر فى شراء العربيه وانا لسه متدرب فى الشركه اللى انا فيها الان
كانت لسه الجين2 نازله مصر وكنت مبهور جدا بالكماليات اللى فى العربيه مقارنة بسعرها
بس انا كنت مركز قوى مع الالنترا لانى من النوع اللى ما بيحبش الهاتش باك ( ازواق )
لحد ما ربنا يسر واتثبت فى الشركه وبعديها اتجوزت وما بقاش فاضل غير العربيه
وقام واحد زميلى فى الشغل من السويس اشترى الجين 2 طبعا ماكدبتش خبر وخدتها منه ولقيتها ما شاء الله عربيه ممتازه فى كل حاجه لكن هاتش باك
وبعدين حصلت ظروف اجلت قرار شرا السياره شويه
جت البرسونا ونزلت
بصراحه عجبتنى جدا العربيه وشاء ربنا ان واحد من زمايلى يدلنى على سايت النايل موتورز الاقى عرض الخصم اللى جبهولنا ايمن ربنا يجازيه كل خير
وذهبت للصحراوى وحجزت العربيه واستلمت بعده بعشر ايام ودا كان فى شهر سته السنه اللى فاتت
والحمد لله العربيه معايا من ساعتها ما شاء الله عليها شافت معايا ايام سوده وكل مره تثبت انى احسنت الاختيار بفضل الله .....
بصراحه اخى العزيز العربيه مش عايزه منك تفكير كتير
توكل على الله واشتريها وصدقنى هاتبقى انت الكسبان

انا جبت البرسونا بعد ما كنت هاشتري الالنترا والحمد لله التوقعات كانت صائبه ومبسوط بيها جدا

السعر بتاعها منااافس جدا والعربيه فعلا رائعه وادائها بالنسبه لسعرها ميخلكش تعيب اوتقول اي كلام عنها حتي لو عندك تعقيب عليها
عربيه 10 / 10
وانا بصراحه مش ندمااان لحد الان اني اشتريتها
العربيه عامله معايا تقريبا 3000 كيلو

انا هقولك وجهة نظرى عن تجربة لمدة عام و 24000 كيلو
ماشاء الله انها سيارة تستحق الاحترام