الحمد لله عملت صيانة ال 10000 للسيريون
إخواتى الأعزاء أعضاء المنتدى الجميل والمحترم والمفيد جدا جدا جدا ... الحمد لله عملت النهاردة صيانة ال 10000 لعربيتى السيريون GL 1300 CC موديل 2009 وقلت أقولكم على التفاصيل لعل وعسى تفيد حد من اللى زى حالاتى كدة ملهومش فى العربيات قوى ولسه جداد فى موضوع السواقة :original: ...
إتصلت بالتوكيل يوم الثلاثاء 16 مارس على الساعة 11 الصبح ... البنت اللى ردت أخدت بياناتى كلها ورقم شاسيه العربية ... وحجزت وأخدت ميعاد الأحد 9 وربع الصبح فى مركز العبور ... قبل أما أقفل سألتها مش المفروض إن البيانات دى عندكم من قبل كدة من صيانة الألف وال 5000 وكل مرة تاخدوها ليه ؟؟؟ قالتلى هى البيانات موجودة بس إحنا بنحدث السيستم ... مقتنعتش قوى بس قولتها شكرا
يوم السبت الصبح اللى هو إمبارح التليفون رن اساعة 9 ونص الصبح ورقم private قلت أشوف مين ... طلع مركز الصيانة وبيأكد الميعاد
النهاردة الصبح توكلت على الله وإتحركت الصبح بدرى وكنت هناك فى العبور على الساعة الساعة 9 وتلت ... خدوا رخصة العربية والكلام ده وطلعت مع المهندس تامر وقاللى على الحاجات اللى هتتعمل ... وتقريبا طلعت الإستراحة على 10 إلا ربع. خلصت تقريبا على 10 ونص قلت الحمد لله على طول أهو
تفاصيل الفاتورة كالتالى ... عشان أنا قعدت ادور عليها قبل ما أروح الأسبوع اللى فات وملقيتش للأسف تفاصيل المصاريف إيه المهم المصاريف كالتالى ...
مصنعية
187.5
تغير فلتر زيت
48.49
تنضيف حاجة كدة قاللى المهندس عليها بس نسيت .. أفتكر عند العجل
5
تنضيف الماتور والكبوت
19.5
خامات بتاع التنضيف
10
زيت موبيل 1 اللى هو بتاع ال 10000
234
المجموع
504.49
ضريبة
27.05
مش عارف
0.04
الإجمالى
531.58
بعد اما خلصت بقى الحمد لله حسيت إن العربية مسكت نفسها ولقيت الملحوظة اللى الأخوة قالوها هنا فى المنتدى بخصوص فرامل اليد وفعلا بقت تقيلة جامد متفاجئتش بيها لأنى رايح وأنا متوقع ... برضه بخصوص الفرامل الفرامل بقت أشد وبقت حساسيتها أعلى والحمد لله عدت على خير .....
إفتكرت حاجة بخصوص زيت Mobil 1
الله يبارك فيكوا يا جماعة :satelite:
بالنسبة لموضوع التنضيف هو فعلا عندكم حق بس أنا قلت أنا هناك وأخلص بالمرة بس إن شاء الله أبقى أخد بالى بعدين وأهو أدينا بنتعلم
بالنسبة لمركز أبو رواش وليه رمروحتش هناك .. فى كذا سبب ...
1- أنا ساكن عند أول صلاح سالم من ناحية السيدة عائشة فالطريق للعبور يعتبر على طول من عندى
2- الطريق لأبو رواش وعشان أطلع كوبرى المنيب وأنزل أخره والمنطقة دى بتكون زحمة موت سواء الصبح أو بليل وبيكون الدائرى كله واقف
3- أنا كنت قريت هنا فى المنتدى على مركز أبو رواش وفى ناس قالت على مشاكل وإنه مش زى ما كان متوقع
ده زائد طبعا إنى عملت صيانة الألف والخمسة هناك فى العبور فخلاص الواحد خد على المكان
فى بس نقطة إفتكرتها بخصوص زيت Mobil 1 بتاع ال 10000 كم ... أنا كنت أخترته على أساس إنه أحسن وإنه يعد ال 10000 كم ولو روحت صيانة ال 15000 مغيرش الزيت ساعتها وقلت الكلام ده للمهندس .. قالى .. أه ممكن طبعا بس إنت (على إنا) من البيانات اللى قدامى إنك بتعمل ال 5000 كم كل 6 شهور تقريبا قلتله أه فعلا .. قالى طب زيت Mobil 1 لازم يتغير كل 6 شهور سواء عملت ال 10000 كم ولا لأ
المعلومة دى بصراحة أنا أول مرة أعرفها ومكنتش قريتها على المنتدى قبل كدة فحبيت بس أقول عليها