السلام عليكم
انا الفتره اللى فاتت دى بحثت كتير وقريت هنا فى منتدى نيسان من اعضاء كتير وخصوصا مشاركات المهندس سبعاوى ومنتديات تانيه كتير عن الصنى لانها كانت تحت او نقول اول اختياراتى للعربيه الجديده
لاقيت هنا من ما بين مؤيد ومعارض للصنى ولكن الاكثريه مؤيد ليها وده خلانى احتار لغايه ما توافرت لى فرصه قيادتها فتره من الزمن بنفسى والحكم على مميزاتها وعيوبها كما قال الاخوه الاعضاء
ملحوظه : انا كنت ناوى اجيب السوبر صالون اللى بحوالى 100 الف جنيه مصرى
اولا : العربيه من الخارج شكلها تقليدى بس تقليدى شيك وعاجبنى انا بصراحه
ثانيا: صالوون العربيه الخلفى ضيق جدااااااااااااااااااااااا ا جدااااااااااااا بصراحه العربيه دى ليك انت ومراتك وبس ولو فى عيل معاكوا شادد حيله شويه رجليه حتوجعه ولازم ترجع الكرسى لو كنت زيى 180 سم طولك فى بعض الاعضاء هنا بيقولوا ان ضيق الصالون سببه وسع الشنطه الرهيييييييب 500 لتر ( مع ان السوزوكى sx4 شنطتها 530 لتر وصالونها مش ضيق ابداااااا) وكشلها اصغر من الصنى
ثالثا : صوت الموتور عالى نسبيا بس انا مش شايفه عاالى قوى اللى عااالى قوى بقى ويقرفك بجد هوا العزل الداخلى بتحس بكل زلطه مشيت عليها فى الطريق ولو الاسفلت خشن شويه بتحس ان نجار راكب وراك وهاتك يا شغل وتصميم الايرودينامك بتاع العربيه بيخليها على سرعه 100 كده فى صوت حفيف جاامد من تحت
بصراحه لو مشوارك بعيد وماشى على سرعه 100 او 120 كده خد بنادول معاك علشان حتصدع
رابعا: القيمه السعريه للسياره ( بتكلم هنا عن السوبر صالون ) فى ناس كتير كانوا بيسألوا سؤال غريب شويه بيقولوا هاتلى عربيه يابانى فيها نفس الامكانيات وبنفس السعر والكفاءه
انا عن نفسى شايف ان فى عربيه ممتازه جدا جدا جدا اسمها سوزوكى sx4 تمنها الفل اوبشن سيدان اوتوماتيك حوالى 106 الف جنيه
وجنوط وانظمه امان بالكامل للفرامل من abs وخلافه واتنين اير باج وفوج لايت وكل حاجه موجوده فى الصنى واكتر كمان
وبتلافى عيوب الصنى كمان
صاللون خلفى مش حقول وااسع جدا بس مش ضيق ابدا هوا فى وسع صالون الالنترا واضيق من التيدا بحاجه بسيطه
الفتيس الاوتوماتيك جميل جدا واستجابته ممتازه وسلس وناعم فى الغيارات بعكس الصنى تحس بنقلاته ومش لازم يكون الفتيس تحس بنقلاته علشان يبقى مرادف للقوه
عفشه ناعمه جدا جدا جدااااااااااااا بجانب انها متماسكه وثبات جميل جدااااااااا على سرعات 150 او اكتر العربيه بتبقى ثابته على الطريق
صوت العزل ممتااااااز
صالون شيك وخامات جيده جداااااااااااااا
استهلاك للبنزين داخل البلد وبالتكييف 11 لتر
وكمان عربيه يابانى يابانى مش تقفيل مصرى حتى ( لست ضد التقفيل المصرى بالعكس تماما) للناس اللى عندها عقده اليابانى ومبتحبش تركب الكورى
نيجى بقى ونقول ان فى فرق حوالى 6 الالف جنيه مصرى
فعلا السوزوكى اغلى
ولكن هل هذا المبلغ يستاهل فعلا راحتك وانك تشترى دماغك وكمان انت بتشترى عربيه العمر مش كل شويه بتنزل تشترى وااحده
انا عن نفسى شايف كده
ومن جهه اخرى انا شايف برضه ان الالنترا حل منناسب جدااا عربيه شيك واوتوماتيك ولو جبتها نفس مواصفات السوبر صالون حتلاقيها تقريبا ب 103 الف والالنترا لو مش عربيه كويسه مكنتش لاقيت الموديلات القديمه منها لسه موجوده لحد دلوقتى وبتتباع بسعر كويس كمان
شوف النترا 2005 بكام دلوقتى وصنى 2005 بكام
اما بالنسبه للفئه من 88 الف لحد 91 الف فانا مع الراى بتاع الصنى فعلا هيا كويسه فى الرينج ده
مع وجود بدائل لا تقل برضه زى الجين 2 مثلا
ملحوظه : انا والله العظيم مش طرف ولا ليا اى علاقه بمبيعات السوزوكى ولا ليا علاقه باى مبيعات من اساسه بس انا حبيت اوضح الفكره دى لانى كنت عاوز اشترى ولاقيت فى ناس كتيره هنا بتسال عن الصنى وبس