قياده منوال ولا اتوماتيك

**johnyweb** · 09-01-2008 08:20 PM

انا جديد في المنتدي واول مشاركة ليا احب تكون في الياباني يعني الميتسوبيشي يعني الانسر

انا بصراحة نواي اشتري عربيه لانسر 2008 شكل القديم لكن انا تهت من الانواع لكن مبدئيا انا ناوي اشتري سيارة بمتور 1600 لكن السوق واغرائاته فيوجد المانويل والاتوماتيك
والرياضيه نازله اتوماتيك جميع الكامليات(جنوط-فتحة سقف-سبويلر-فوجات-ريموت-كسحات-عتب)
لكن المانويال مافهاش الحاجات ديه انا بصراحة مجربتش سواقة الاتوماتيك قبل كدا ومحتار في حاجات كتيرا
خايف تكون ممله في القياده حاسس يعني ان العربيه ماشيه لوحدتها ماتعرفش تسقط ولا تخمس ولا كدا وكمان موضع صيانة الاتوماتيك اكيد اغلي من المانويل
وياريت من حضارتكم تقوليلي الفرق من سواقه المانويل والاتوماتيك اني احسن من ناحيه السواقة ومن ناحيه الصيانة واستهلاك البنزين
شكرا

**limo** · 09-01-2008 08:24 PM

الاتوماتيك مريح جدا جدا جدا ومش مملل ولا حاجه
بس المشكله انى من خلال مواضيع سابقه فى المنتدى عرفت ان استهلاك البنزين فى الانسر الاتوماتيك اعلى من المانيوال

**cpt_shawky** · 09-01-2008 08:26 PM

سيبك من الأتوماتيك هاتلك لانسر فل اوبشن مانيوال واى حاجة ناقصاها زودها عشان تاخد افضل اداء رياضى

**amr mokhtar** · 09-01-2008 08:34 PM

على فكرة يا استاذ johnyweb انا كنت بقول زيك كده بالظبط و كنت بقول انه ممل و ان العربية هيبقى سحبها سىء و كلام من ده

بس بصراحة لما واحد صاحبى اشترى اوبترا اتوماتيك و ركبتها و جربت سواقتها نسيت كل الكلام اللى انا كنت بقوله و على فكرة العربية ما شاء الله سحبتها ممتازة جدآ و متحسش انها اوتوماتيك خالص كل الحكاية ان الاوتوماتيك فى بداية الحركة بيقى بطىء لكن بمجرد ان العربية بتمشى بيبقى ممتاز جدآ

معلش هو الكلام ده عن الاوبترا عشان دى العربية اللى انا عارفها معرفش اللانسر الأوتوماتيك هيبقى ممتاز زى الاوبترا و لا لأ

**مصراوي جدا** · 09-01-2008 11:23 PM

اهلا بيك يا استاذ johnyweb عضو جديد معانا في المنتدى

انا نصيحتي ليك تجيب الاوتوماتيك الرياضية او السام (الفرق بينهم ان السام فرش جلد وفوانيس امامية مش غامقة زي الرياضية والفوانيس الخلفية مش شفافة زي الرياضيه) لكن الباقي هو نفسه

اولا الاوتوماتيك مناسب جدا لشوارعنا المملة المتوقفة دائما في مصر بدل ما ايدك رايحة جاية على الفتيس ورجلك على الدبرياج (هو ده الملل فعلا)

ثانيا العربية فتيس CVT يعني Continuous Variable Transmission يعني مش هتحس بالنقلات خالص وسحبها حلو جدا

ثالثا : استهلاك البنزين في الاوتوماتيك اعلى حاجة بسيطة عن المانوال وخاصة ان الCVT بيقلل استهلاك البنزين كمان

رابعا : ليه باقول لك رياضية او سام لأن كل الكماليات اللي في العربية أصلي ولو حبيت تضيفها لوحدها (اصلي) فرق السعر قد يصل الى 20 ألف جنيه

على سبيل المثال الكساحة الأمامية (اللي على الاكصدام) بـ 1400 جنيه لوحدها

فتحة السقف متتعملش اساسا ولو حد بيعملها اكيد عمرها ما تكون زي الأصلي

الاسبويلر الاصلي والجنوط غالية

الاعتاب الجانبية والفوانيس الأمامية الغامقة والخلفية الشفافة

يعني حاجات كتير

انما برضه ميمنعش لو غاوي مانوال انك تجيب مانوال وتظبطها كماليات (غير أصلية) هتكون في حدود تكلفة معقولة

**johnyweb** · 10-01-2008 12:19 AM

بجد انا مبسوط من ردودكم وحاسس بروح التفاعل معاكم
شكرا ياشباب علي فكرة انا كنت في توكيل ميتسوبيشي الي في رمسيس الي جنب الرواس الاسعار عليت ياشباب عن السنة الي فاتت مش عارف ليه العربيه عامله الرياضيه 1600 سي سي حوالي 180000 الي بيحصل ده

**johnyweb** · 10-01-2008 12:23 AM

سوري ياشباب غلطة مطبعيه 118و000 جنيه ياشباب

**johnyweb** · 10-01-2008 12:30 AM

بس الفتيس الاتوامتيك الصيانة بتاعتوا مكلفة علي المدي الطويل
انا معرفش عنوا كتير لكن بالنسبه للصيانة
ايه تحذيراتكم بالنسبه لاستعمال الفتيس الاتوامتيك اكيد الاستعمال السيء بيأثر علي حاجات زي التروس وبيكام قطع غيار الفتيس
وصحيح بيوصل تمن الكوبلن لي 3000 جنيه
انا سالت علي السبويلر في المصر قالي من غير دهان بحوالي 700 جنيه بالدهان والتركيب 300 يعني كله 1000 جنيه سبويلر بس
امال الباقي بقي بس اهم حاجة عندي
مميزات وعيوب الفتيس الاتوماتيك واسف علي التطويل

**شاهين - بنز** · 10-01-2008 01:42 AM

لو بتحب الإنطلاق يبقى المانيوال أنسبلك وحتحس فيه متعة أكبر بكتير
لو سواقتك هادية يبقى الأتوماتيك أنسبلك وعلى فكرة السحب بتاع ال الأوتو ممتاز جدا خصوا أما تديها كيك داون إستجابتها ممتازة