الموضوع: الإستيجماتيزم ؟؟؟؟؟

المشاركة الأصلية كتبت بواسطة dr_3eshoo

مصطفى بكري باشا
اولا الستجماتيزم ده خلل في سطح القرنيه و ده ملوش اسباب معينه فيخلي الضوء الي داخل متكسر يعملك ضعف البصر الي بتقول عليه و يعملك دوخه
و الاستيجاتيزم للعلم يروح و يختفي بعد سن الاربعين
و علاجه اليزك و النظاره و للعلم ولو عملته بليزك يبقى عندك على الاقل ربع
لو عملت ليزك او عاوز تعمله يبقى عند دكتور كويس جدا و عنده جهاز نضيف علشان تضمن نجاح العمليه
و بعدين انت عندك 35 سنه و بعد 5 سنين مش هتحتاج النظاره لان بعد سن الاربعين يحصل حاجه اسمها seinle degneration الي هو مش عارف اوصفه الي هو مع السن كل حاجه تصغر
و ده كويس في حالتك لان نظرك هيرج 6 على 6 بعد سن الاربعين
الخلل ده لان القرنيه تطلع لبره و تبقى غير منتظمه

شكرا يا دكتور علي الرد انا مش مشكلتي ان البس النضارة او لأ انا مشكلتي ان اشوف كويس سواء بالنضارة او بالليزك
انا خلاص اتعودت علي النضارة و ما عنديشكلة منها
المشكلة الكبيرة يا دكتور هي اني لسه صغير في السن انا عندي 26 سنة مش 35 زي ما حضرتك فاكر و انا كنت اعني اني لما اوصل سن 35 سنة و بالمعدل دا في ضعف النظر هيكون النظر قل جدا و دا اللي انا خايف منه

عموما شكرا جزيلا علي المعلومات القيمة دي و ربنا يكرمك و يديك الصحة

شكرا يا دكتور أنا كدة قلبى جمد أنى أعملها - ممكن تقولى أبداء أزاى وأروح لمين

المشاركة الأصلية كتبت بواسطة ابو سيف

الاخ مصطفى بكري : اولا هون عليك الموضوع ان شاء الله ابسط من كدة بكتير دلوقتي في نصيحه لوجه الله هقولهالك من باب الاطمنان عليك فقط مش اكتر و هي ان كنت ناوي تتخلص من النظارة بعمل عمليه ليزك او مش ناوي لابد للذهاب لأي مركز متخصص في الليزك و هم كثر و تعمل الفحص دة corneal topography دة عبارة عن تخطيط للقرنيه يعني رسم تخطيطي كامل عن تفاصيل سطح القرنيه لأنه بصراحه نسبه الاستيجاميتزم اللى عندك عاليه شويه و دة ساعات بيكون بسبب شيء اسمه قرنيه مخروطيه و ممكن جدا يكون الخلل اللى في سطح القرنيه مش لهذه الدرجه و يكون مفيش مشكله (دة اولا)

ثانيا لو حضرتك عايز شيء يحافظ على النظر فدة شيء مش موجود بس يا ريت تقولي ايه الفرق بين مقاس اخر نظارة و النظارة اللى حضرتك عملتها مؤخرا دي ( يعني مقاس دي و مقاس دي ) لأن الكلام اللى احنا بنقوله و اللى مكتوب في الكتب ان المفروض ان النظر بيثبت عند 18 او 20 سنه لكن طبعا الكلام الواقعي بيقول غير كدة و ان في ناس بيستمر النظر بتاعهم في النزول الى سن اكتر من كدة فلو كان نظر حضرتك ثابت عند هذه المرحله و النظارة مضايقاك يبقا حلك الوحيد هو عمليه ليزك

اتكلم بقا عن عمليه الليزك خمسه كدة لأن حضرتك و اكتر من عضو فاضل سألتو

اولا بنقول ان مش كل واحد ينفع يتعمل له عمليه ليزك في فحوصات بتتعمل الاول علشان تحدد ان كان ينفع الليزك للشخص دة و لا لأ و ان كان هيفيدة فعلا و لا لأ و ان كان هيتبقى اي نسبه من ضعف النظر و لا لأ
الفحوصات دي عبارة عن تخطيط للقرنيه و دة اللى بيبين لينا زي ما وضحت رسم تخطيطي لسطح القرنيه كله علشان العمليه كلها على القرنيه

و التاني حاجة اسمها سمك القرنيه و دة بجهاز بسيط بنقيس سماكه القرنيه لأن عن طريق كميه سمك القرنيه بنقدر نعرف هنقدر نصلح من ضعف النظر اد ايه؟؟؟؟(مع العلم ان في ناس سمك القرنيه بتاعهم ميسمحش اننا نتدخل في العمليه اساسا) و طبعا سمك القرنيه دة علشان نقدر نعرف مظبوط نتيجه العمليه و النظر بعد العمليه هيكون ايه لازم يكون معانا مقاس النظر (احدث واحد) و الشخص دة بيشوف ايه بالنظارة
لأن كثير من الناس بتكون فاكرة انهم هيشوفوا بعد عمليه الليزك 6/6 و دة مش صح (الليزك هو بديل للنظارة يعني هتشوف زي ما انت شايف بالنظارة بالظبط ايا كان نظرك بالنظارة كام مش احسن من كدة و لا اوحش من كدة ان شاء الله ) طبعا دة باعتبار انه ينفعلك العمليه اصلا و اننا هنقدر نصلح كل قصر النظر او طول النظر اللى موجود


بالنسبه للعمليه نفسها: العمليه و لله الحمد بسيطه جدا جدا و تعتبر الى مدى كبير جدا جدا آمنه اوي و نتايجها حتى يومنا هذا ممتازة بالذات بسبب التطور الرهيب في الاجهزة و مميزاتها و عدد الناس الكبير اللى بتعملها و دة بيتيح للأطباء عملها بكثرة و اخذ خبرة عاليه فيها

بالنسبه للتكلفه : في المراكز المعروفه الكويسه في القاهرة بتتكلف العمليه من 4000 الى 5500 جنيه للعينين بالفحوصات اللى قولنا عليها في الاول
في الاقاليم طبعا الوضع بيقل عن كدة كتير عندنا في الزقازيق بنعملها بحوالي 3400 جنيه

و اي استفسار انا تحت امرك و اسف جدا على الاطاله و لو في حاجة مش مفهومه ممكن تستوضحها و اقولهالك ان شاء الله

جزاك الله كل الخير اخي الفاضل ابو سيف و بالعكس انت ما طولتش و لا حاجة انا نفسي حد يفهمني زي كدا
من الواضح من كلام حضرتك انك طبيب عيون صح و لا غلط
بصراحة انا قلقان جدا من حكاية القرنية المخروطية دي لأني فاكر ان من فترة كنت بكشف عند دكتور عيون و سألته عن امكانية اجراء الليزك فقالي انه بيشك في ان القرنية عندي مخروطية و ما ينفعش ليا الليزك
المرة دي لما كشفت عنده سالته نفس السؤال عن الليزك فقاللي اني القرنية عندي عليها شوية سحابات خفيفة وانه هيسأل اساتذه متخصصين في الليزك علي حالتي و ما جابش سيرة القرنية المخروطية دي
انا ازاي اتاكد من الحكاية دي هل اروح لمركز متخصص و اعمل رسم تخطيطي و لا هي اي طبيب عيون ممكن يعرفها في العيادة عنده
الحاجة التانية انه الدكتور قاللي ان العين اليمين كسلانة شوية و فعلا انا رؤيتي منها اضعف بكتير من الشمال و قاللي ان احاول اغمض عيني الشمال و اركز شوية علي اليمين لمدة نص ساعة يو ميا عشان ننشطها و نخلي المخ يستخدمها زي الشمال
وكتب لي علي جل ايمه Genteal Gel عشان استخدمة لأنه بيشيل السحابات دي فايه راي حضرتك
بصراحة حاليا انا مش معايا المقاس القديم و لكن انا فاكر انه كان نص الأرقام دي يعني كان الإستيجماتيزم في حدود من 2 - 3.5 للعينين و طبعا الشمال افضل من اليمين بس انا هدور علي المقاس القديم لو ضروري لحضرتك
علي فكرة انا كنت كشفت في شهر 5 اللي فات 5/2007 عند دكتور غير اللي بروح عنده بس انا ما عملتش المقاسات دي و فضلت علي المقاسات القديمة و كانت المقاسات كالتالي
Right SPH :-6.75 CYL: -5 Ax: 170
Left SPH:- 2.75 CYL:-5 Ax: 155

طبعا المقاسات اللي من يومين هي
R SPH: -5 CYL: -6 AX : 105
L SPH : -4.5 CYL: - 5.5 AX : 150

انا عملت المقاس الجديد ولبست النظارة بالمقاس دا و طبعا الفرق كبير ما بين اللي كنت لابسها و بين الجديدة و العدسات بقي سمكها كبير جدا علي اللي فاتت و خصوصا في الحواف و الصورة بتزغلل شوية لو انا ببص في طرف العدسة يعني لما انا ببص في مركز العدسة اليمين بالذات تبقي الصورة كويسة بس لو عنيا اتحركت يمين ولا شمال ناحية الجزء السميك من العدسة بحس بزغلله شوية و دا بيحصل في العدسة اليمين فقط
يا ريت لو حضرتك عندك اي ملاحظات تقولي عليها
اسف جدا علي الإطالة لكن اعذرني انا ماصدقت لقيت حد يفهمني
يا ريت لو حضرتك عندك ملاحظة

الله يكرمك يا دكتور
طبعا ما خبيش عليك انا حزين بعد ما عرفت المعلومات دي و لكن دا ما يمنعش ان انا ارتحت اني لقيت حد يفهمني و ينصحني بجد زي حضرتك
عموما انا هحاول في اقرب فرصة و انا في القاهرة اعمل الفحص اللي حضرتك بتقول عليه و يا ريت حضرتك تقولي افضل مكان ممكن اروح له فين
هو بالنسبة لضعف النظر اللي عندي ما ظهرش الا و انا في الثانوية العامة و علي فكرة انا كنت بعاني من حساسية الرمد الربيعي الحادة و انا صغير يعني بدات معاي من سن 10 سنين و فضلت معاي لغاية سن 18 سنة تقريبا و الحمد لله راحت و طبعا كشفت كتير و كنت بتابع بس لأسف ما كنتش بحافظ علي عنيا زي ما الدكتور مان بيقول بالعكس انا كنت مدمن كرة قدم و طبعا انت عارف قري الصعيد تراب و شمس و عرق و هواء و بلاوي سودا و كانت العين في فصل الربيع و الصيف بتبقي حمرا جدا خاصة اليمين دي كانت اشد تاثرا بالرمد و كنت ما بطلش لعب بايدي في عنيا من جوا وكانت ايام ما يعلم بها الا ربنا
المهم انا الدكتور كان كتب علي نضارة حفظ من اشعة الشمس و التراب و طبعا انا بطبعي خجول و ما تقبلتش فكرة النضارة و كنت اطلع من البيت لابسها و علي ما بعدت شوية اقلعها و احطها في جيبي
طبعا كل دا اثر علي العين و دي كلها مضاعفات الرمد الربيعي
انا بقي حسيت بضعف النظر دا انا و في ثالثة ثانوي و فعلا عملت نضارة في اول ما دخلت الكلية و من ساعتها و انا لابس نضارة باستمرار و بقيت حاليا ما اقدرش اخرج من غيرها او اقعد في البيت من غيرها
يمكن الأول في البداية كنت ممكن اقلعها في البيت و اقعد من غيرها و اذاكر من غيرها لكن حاليا ما قدرش اعمل حاجة الا و انا لابسها
انا ما عنديش حد خالص في العيلة بيلبس نضارة و والدي و والدتي نظرهم كويس و اخواتي كلهم كويسين ما فيش غير اخويا الولد الوحيد اللي عنده رمد اما اخواتي البنات فالحمدلله ما عندهمش و مش عارف دي وراثة من فين لان ما حدش عندنا اشتكي قبل كدا من الرمد
بالنسبة للعين اليمين اللي هي اضعف من الشمال فانظر فيها بالنضارة بيفرق بس مش بيفرق كتير زي العين الشمال يعني ما اقدرش اقرا بيها وحدها من شاشة الكمبيوتر مثلا لو غمضت العين الشمال حتي ولو لابس النضارة و هي مشكلتي كلها في العين دي لانها لو بنفس قوة الشمال كنت بقيت تمام لكن المشكلة الفرق الكبير بين العينين دا هو اللي تاعبني حتي في النضارة الجديدة اللي كتب لحضرتك مقاسها تعباني شوية لأنيي حاسس ان كل عين عاوزة تشوف و حدها مش عارف ازاي اوصف لحضرتك بس ما فيش اتزان بين العينين
سؤالي لحضرتك هو ايه حل العين اليمين هل مثلا زرع قرنية و لا المشكلة مش القرنية اصلا و المشكلة بقت في العصب البصري و لا ايه طبعا انا بسأل كدا عشان اعرف مش اكتر لكني الوضع حاليا بالنسسبة لي كويس ان لم يتدهور اكتر من كدا لا قدر الله لاني الحمدلله انا حاليا بمارس حياتي بشكل طبيعي و بسوق العربية كويس بالنهار و بالليل و مستورة و الحمدلله انا بس قلقان من بعد كدا و نفس اطمن و اعرف حل وزي ما قلت لحضرتم اني ماعنديش مشكلة مع النضارة خالص و ممكن استمر بيها طالما ان الليزك هيديني نفس المستوي من النظر لكن انا ممكن اعملة للعين اليمن لو هو هينشطها شوية
انا اسف جدا علي ازعاجي لحضرتك لكن انا ارتحت جدا لحضرتك وبحاول استفيد من معلوماتك و اعرف افضل الطرق لحل المشكلة

ربنا يكرمك ويجزيك خيرا

ربنا يبارك فيك يا دكتور (ابو سيف )

انا فعلا قريت الرساله اللي حضرتك بعتهالي عالخاص

انا شاكر جدا لسعادتك و ان شاء الله هحاول اعمل الفحص بتاع القرنية في اقرب فرصة ممكنة و ارجع لحضرتك مرة تاني و اقولك علي النتيجة
شكرا جزيلا

حضرتك من القاهرة و عايز تعملها في القاهرة و لا منين بالظبط ولا مش تفرق معاك المكان؟؟

من القاهرة يا باشا