الموضوع: الموضوع قتل بحثا (No Active Action taking) وانا دمى اتحرق خلاص

المشاركة الأصلية كتبت بواسطة pro_samir

فعلا والله دة اللي بيحصل

أو إنك تلاقي عربية ماشية تعمل حركات غريبة وعمالة تحدف علي خلق الله لحد ما تجيب أخرك وتجري علشان تعدي منها وأول ما تشوف اللي سايق تقول أأأأأأة دي واحدة ست ، نظام إذا عرف السبب بطل العجب

لكن في طبعا بيسوقو كويس جدا ، وبرضو في رجالة سواقتهم زفت بس النسبة دي في الستات 80% والرجالة 10% مثلا

فيه طبعا في الرجالة اللي سواقتهم سيئة جدا
البلطجي
و البارد
و مجنون السرعة
و اللي شغلته انه سواق , نقل , تاكسي , ميكروباص , ميني باص اتوبيس

لكن الستات فعلا النسبة الأغلب منهم كده
و دي احصائية من الواقع مش اتهام

المشاركة الأصلية كتبت بواسطة R A N A

يابمشهندس تامر انا معاك في اللي بتقوله وفعلا بعمل زيك كدة لما اشوف عربية قدامي او جنبي بحط احتمال كبير انها تكون بنت من اللخمة والهبل اللي بتعمله في الطريق (بس بقول معلش متلخميهاش زيادة ابعدي عنها او اديها كلاكس توسعلك وسيبيها هي تكمل عك يمكن تكون لسة مبتدئة) والمبتدئ بيكون دي حالته حتى لو راجل برده على فكرة

كده احنا مش مختلفين


وفعلا في بعض الستات بيفضل ده مستواهم طول عمرهم مبيتحسنوش.

ده بقى اللي باقوله بالظبط , بتفضل زي ما هي على طول , و بتبقى النتيجة الوضع اللي باقول عليه ده , فعلا العربية اللي سايقاها ست غالبا و الله باعرفها


وانا بردة متولدتش بسوق عربيات برده كنت مبتدئة وبخاف في بداية تعليم السواقة وكان ليا اخطاء لكني مع الوقت حسنت نفسي جدا ومستوايا في القيادة كويس جدا بشهادة ناس كتير منهم اعضاء هنا في المنتدي.

ولا اي حد فينا , لكن المشكلة زي ما قلتي , النسبة العظمى من الستات بيفضلوا زي ما هما كده
و القلة اللي بتعلى في مستواها بتفتري عادة

لكن الفكرة المطروحة مسبقاً واللي مرسخة في اذهان معظم السادة الرجال (إلا من رحم ربي) ان طالما بنت اللي سايقة قدامك يبقي اي غلطة هاتعملها هايبقي سببها بس انها واحدة ست
يعني لو نفس الغلطة دي عملها راجل هايكونله مليون سبب ومليون مبرر يشفعله
معلش اصله سرح شوية
معلش اصله صدع فجأة
معلش اصله مخنوق حبتين
معلش اصله نسي يدي اشارة
معلش اصل اللي قدامه فرمل فجأة وملحقش يفاديه
معلش اصل العربية مش مساعداه
معلش مخدش باله جل من لايسهو ياسيدي

لا مش حقيقي و الله , الواحد و هو ماشي مش بياخد اعذار لحد من اللي حواليه لأنه راجل و العكس مع الستات , على الأقل انا , الا اعذار لنفسي طبعا
:)
لكن هاقول لحضرتك حاجة , العربية اللي بيبقى سايقها واحد بيخرف او بيعك ( على اختلاف انواعهم ) كل نوع بيبقى لعربيته و مشيتها شكل , الستات كل اللي بيعكوا منهم بيبقى لهم عادة نفس شكل و هيئة مشية العربية , عشان كده الواحد حفظها

لكن الست بننصبلها المشانق لمجرد انها غلطت غلطة واحدة
ليه ؟ عشان هي واحدة ست وطالما ست لازما وحتما ولابد تبقي غبية وحمقاء ومعندهاش سرعة تصرف وحافظة مش فاهمة ومش تعبانة في العربية ومستهترة وعندها لامبالاة وفيها كل العبر
كل ده ليه عشان هي واحدة ست.

هو مش لأنها ست لكن دي محاولات لتفسير اللي بيحصل , يعني زي ما باقول لك مثلا , واحد معرفتي واحدة خبطت عربيته و لما كلمها قالت له كده "ماعاييش فرامل هاعمل لك ايه ؟؟" , طبعا هو اتنقط
لازم اذكر ان رد الفعل نفسه بييجي كتير برده من رجالة و ردود افعال مستفزة و تنرفز , لكن نسبتها في الستات اكتر بكتير اوي , ده احصائيا مش رأي شخصي ولا لأنها ست


عايزة اقولك اني لما بكون سايقة العربية ومهديين مثلا أو واقفين في اشارة بلاحظ نظرات من بعض الرجال (خصوصا فئة الشباب محبي التحدي) ولسان حالهم بيقول
اه فاكرة نفسك عشان قاعدة ورا الدريكسيون تبقي بتعرفي تسوقي ها ها هيهات ثم هيهات
مهما عملتي برده هاتفضل سواقتك على قدها
وفي منهم اللي بيتعمد يرمي عليا عشان يشوف رد فعلي هايكون ازاي وهاعرف اتصرف وافاديه ولا لأ أو يحاول يسمعني صوت الموتور بتاعه وهو بيحرق عليه عشان اشد معاه وانا اصلا بيكون هدفي اني اروح بيتي بنفسي سليمة وبعربيتي سليمة رغم اني لو دخلت التحدي ده هوصل لمستوى كويس جدا ويمكن اتفوق عليه كمان وجربتها اكتر من مرة وشديت مع ناس ع الطريق وحصلتهم وسبقتهم واخدت غرز وعملت كل حاجة واثبتله اني بعرف اسوق زيه ويمكن احسن كمان .

بكده عرفنا انك من الفئة اللي مستواها بيزيد و بتقضيها غرز
:)
بصي , بصفة عامة الناس اللي بتقولي عليهم دول شوية مجانين او عيال فاضية بيدوروا على اي حد يطلعوا نقصهم عليه او يتسلوا معاه شوية , و يا حبذا لو كانت واحدة ست او بنت طبعا

وساعات بقول على ايه يعني طالما انا واثقة في نفسي وفي سواقتي خلاص خليه يروح يلعب مع حد تاني انا مش فاضياله.
نفسي بس السادة الرجال الناقمين على الكائن المسمي بالأنثى دول يشيلوهم من دماغهم شوية وميشغلوش نفسهم بهن زيادة عن اللزوم صدقوني هايستريحوا ويريحوا والله.
محدش فينا بلا عيوب ومحدش فينا بلا اخطاء


طب انا عايز اقول لك حاجة , انا قريت في كلامك احساس بأن الواحد فينا بيبص للست نظرة دونية انها اقل منه لأنها ست , و شايف انك بتحاولي تثبتي العكس
رأيي انا ان الموضوع مش كده خالص , الفكرة ان فعلا احصائيا الستات عندهم عيوب في السواقة , نقول الغالبية العظمى منهم عشان نبقى منصفين , الواحد مش بيقول كده عشان يثبت ان عنصر متفوق على العنصر الآخر , لكن لأن ده اللي بيحصل فعلا
مش بس الستات ستايلهم انهم بيعكوا في السواقة , و كلامي على الأغلبية مش الكل في اللي جاي
سواقين الميكروباص حريفة جدا لكن اخلاق مافيش
سواقين التاكسي لا حريفة ولا اخلاق
سواقين السوزوكي الربع نقل , متسرعين جدا
سواقين الاتوبيسات , كتير منهم بيبقوا محترمين , لكن واحد بس مش محترم بيبقى ملحوظ و بيسبب بلاوي
سواقين النص نقل كلهم بيقضوها بلطجة اعتمادا على قوة عربياتهم
سواقين اللوري , باخاف اقرب منهم اصلا , بس على الدائري بيمشوا على الشمال و يقرفوا الناس كلها
سواقين الملاكي فئاتهم كتير , ممكن اقول عليهم هما كمان , عادي جدا و انا في فئة منهم
مثلا , عادة تلاقي الفيرنا و الالنترا و البي ام دبليو بتجري بجنون , و تلاقي الشاهين و ال131 و ال125 و العربيات اللي صاجها جامد يا بتعك يا بتبلطج على اللي حواليها ( و يا رب ملاكهم ما يزعلوش )
كل ده من وجهة نظري طبعا
الخلاصة ان كل دول رجالة اهم , و الواحد مش بيقول انهم بيعملوا كذا لاثبات تفوقه , لكن ده احصائيا من اللي الواحد بيشوفه بعينه