كلمة ونص 20 مايو 2007

**sab3aawy** · 20-05-2007 12:22 PM

حالة اجتماعية غريبة جدا يعبر عنها دائما الباب الأيمن لسيارتى ، فهو دائما فى حاجة للإصلاح( اكرة داخلية او خارجية ماتفتحش، الشبالك بيعلق او بايظ، سنترال لوك بايظ ، الخ) علما بأن عمرى ما صلحت اى حاجة فى الباب ايسر الامامى لأى سيارة امتلكتها-مع انه الأكثر إستعمالا-ولكن دائما الباب الأيمن، وهو ما يعبر لى دائما عن مدى امتنان اى شخص اتطوع بتوصيله الى اى مكان من خلال رزع باب السيارة رزعة تكاد تقتلعه من جذوره ومعه قلبى، والغريب جدا ان الناس بتزعل وتتقمص لو قلت لهم "بالراحة على الباب" وياخدوها انى بتتمنظر عليهم علشان يعنى عندى عربية وهو لا، لكن انا مش مفروض ازعل ولا اتقمص لما كل واحد يركب معى العربية يفش كل الغل اللى بيشوفه من مديره وحماته وعياله ومراته فى باب عربيتى

**السيد أحمد** · 20-05-2007 12:35 PM

ازيك يا م/ خالد
فكرتنى بحكاية باب عربيتك اللانوس هو التوكيل اتصل بيك ولا لسه انا عارف طبعا انك بعت العربية
،عايز اقلك على حل لمموضوع رزع الباب ده
فى العربيات الميكروباص كنت احيانا اركب مع سواقين والاحظ اما ينزل الراكب اللى بجواره ويهم بقفل الباب الاقيه بيصد الباب بايده ويقفله هوه ، طبعا كنت بلاحظ ان العربية معتنى بيها وغالبا بيبقى صاحبها اللى سايق عشان كده بيقفل الباب بايده بدل ما قلبه يوجعه .
السيد أحمد

**memo_hefnawy** · 20-05-2007 12:55 PM

ساعات بلحق ذي ما إنت قولت الباب بس ده مش كثير :( و بتضايق أوى من رزعة الباب دى بحس إن الشخص إللى نازل ده فاكر إنه راكب دبابة .....

**M_ElSabaa** · 20-05-2007 12:59 PM

انا لازم ازعق فى الى نازل قبل ما يقفل واقوله براحة على الباب

**hazem_khidr** · 20-05-2007 02:44 PM

كلام صح يا باشمهندس سبعاوي و بتحصلي كمان من ناس بيركبو و عندهم عربيات!! ياريت ما عندهومش بس انا بحاول الحق الباب و اجيبها بهزار علشان محدش يضايق(يعني اقوله زي سواقين الميكروباصات بالراحه يا عم دا عليها اقساط:)) يعني نوع من الدعابه لو اتكرر كتير ممكن اكشر علشان فعلا حاجه تضايق لما بيترزع كده بحس ان قلبي بيتنفض من جوه الصراحه .
بالنسبه للابواب اللي ورا ف انا عامل زي التاكسيات فعلا و شايل اكر الزجاج الخلفي علشان محدش يركب و ينزل يسبهولي مفتوح و مخبيهم في الفرش و لو حد عزيز عليا ركب ممكن اعرفه المكان بس يفتح و يقفل تاني اصل فيههه ناس تحب تركب تفتح الزجاج و انت تبقي تقفله انت بقي :mrgreen:

**amrtalaat** · 21-05-2007 03:15 AM

طب إية رأيك لما صاحبك يفتح الباب فجأة فى وش عربية جاية ....؟؟ ودة مع التحذير المسبق...
الحكاية دى عملتلى (فوبيا فتح الأبواب)!! :shock:

**hazem_khidr** · 21-05-2007 03:36 AM

طب إية رأيك لما صاحبك يفتح الباب فجأة فى وش عربية جاية ....؟؟ ودة مع التحذير المسبق...
الحكاية دى عملتلى (فوبيا فتح الأبواب)!!

انا شفت المنر دا مع واحد صاحبي و مش حد بيفتح الباب لاء هو جاي بيفتح ينزل و ما اخدش باله ف جه ميكروباص شال الباب بتاعه خلاص ستر ربنا انه ما كنش لسه نزل
احسن طريقه بتاع التاكسيات انك تقفل الباب الشمال ورا بالمسوجر و كله ينزل من اليمين و خلاص

**memoo305** · 23-05-2007 01:16 PM

موضوع رزع الباب ده فعلاً مستفز جداً جداً
يس على فكرة في بعض الناس بتبقى مش قاصده . يعني مثلاُ لو بيركب عربية لادا وجه يقفل باب عربية كوري ممكن الباب يقع بعد مايتقفل زي توم وجيري :D