-
السير عكس الاتجاه
السلام عليكم
الحمد لله على كل حال
امبارح دخلت بالماروتى فى دخله غلط و الضابط وقفنى و قالى انتا ماشى عكس الاتجاه
المهم مأخدش منى الرخص و لا بص فيهم و قالى خلاص امشى و قام مطلع دفتر المخالفات و نشنى مخالفة سير عكس الاتجاه
المهم انا عايز اعرف المخالفة بتبقى بكام؟ و ايه حوار الحبس دا فيه ناس بتقول اتلغى؟
و هل ينفع اتظلم؟ و ايه الحد الادنى للمخالفة؟ و هل هتفرق لو دفعتها دلوقتى على طول و مستنيتش لحد تجديد الرخصة؟ يا ريت يا جماعه حد يفيدنى فى الموضوع دا ضرورى
شكرا
-
الحد اأدني 1000 خلال 3 ايام
تقريبا
متستناش
ربنا معاك
-
1000 جنيه للاسف و ربنا يعوض عليك
-
على فكرة مخالفة السير عكس الآتجاة لازم يأخذ الرخص علشان تروح تدفع وكمان علشان السرعة فى توريد أو دفع المخالفة
أحتمال يكون الراجل كرمك وعملهالك مخالفة عادية تدفع فى أخر السنة
أنت هتضطر تروح تتابع مع المرور علشان تعرف أنت عليك أية.
بس المشكلة هى المخالفة هتروح المرور أمتى هى دية المشكلة المقرفة
بس لازم تتابع لحسن تكون فعلا عكس الآتجاة ولو ما دفعتش بسرعة تتحبس
ممكن تتظلم وتقول ما كنش فى أى أرشادات أو علامات تدل على أنة عكسى أو أنة كان دوران عكس الاتجاة ودة مخالفتة أقل بكتير من السير عكس الآتجاة ...
أهم حاجة لو أنت غلطان فعلا ما تحاولش تعمل كدة تانى لآن السير عكس الآتجاة سواء كنت أنت أو غيرك مصيبة كبيرة وبتسبب كوارث وحوادث كبيرة
وربنا يسترها معانا جميعا
-
السلام عليكم
اولا خلي بالك بعد كدة عشان متقعش مع واحد بيصطاد في الميه العكرة ويعمل عليك شغل
ثانيا انا حصلت معايا في حتة مقطوعة في المريوطية ولقيته فجأة نطلي في وسط الطريق المهم انا مكترتش في الكلام و اللي حصل كالتالي سحب الرخص الجوز قيادة و سيارة و قالي بكرة هتلاقيهم في مرور فيصل تروح النيابة طيب يا سيدي دي حته مقطوعة و الكلام الكتير ده قالي متحاولش ده انا هاخدمك عشان شكلك محترم و هاعملها دوران عكس الاتجاه و دي بـ 75 جنيه طيب عايز وصل قالي مفيش وصل ده انا المفروض احجز العربية و اطلع بيك على القسم و طبعا قلت خليها على ربنا ورحت تاني يوم المرور و لقيت الرخصة و طلع ابن حلال فعلا و عملها دوران عكس الاتجاه طبعا مش بالسهولة دي و كان فيه انتظار بس الحمد لله عدت
اسف على الاطالة بس انا رأيي انه طالما سابك ممكن يكون خبطك مخالفة دوران عكس عشان اعتقد السير عكس الاتجاه دي لازم يسحب رخص بس المتابعة مش هاضر و ربنا معاك
-
شكرا اوى
شكرا اوى يا جماعة بجد لكل من شارك على الاقل اتطمنت شوية و انا هروح اسأل ان شاء الله و ربنا يستر و تطلع بسيطة
-
يا خوفى يا بدران احسن يكون عملها سير عكس الاتجاه والمخالفة تروح براحتها بعد ال3 ايام السماح ودى فيها اقصى عقوبة فى الزفت قانون المرور الجديد يعنى 3 شهور حبس وغرامة 1500 جنيه او احدى العقوبتين
ربنا يستر عليك وعلينا جميعا
وانصحك تشوف واسطة معاك و حبذا ان تكون الواسطة قضائية وتتابع الموضوع ده بمنتهى السرعة والاهمية
........................*
محمود عينو
-
ولا تروح المرور و لا حاجة و سيبها على الله
-
طالما مسحبش الرخص و العربية يبقى مافيش حبس و لا حاجة
لو عملها عكس الاتجاه فعلا هترسى على غرامة 1000 ج تدفعهم مع التجديد
غير كده يبقى حسب ماهو عمل المخالفة ايه
وممكن تعمل معارضة عند التجديد
احمد ربنا انه مسحبش العربية على القسم كده كان هيبقى فيها حبس
-
يا اخوانا كان فى كلام قبل كده ان مخلفة السير عكس الاتجاه لازم تكون فى حالة تلبس.... مش كده و بس لأ لازم اللى يسحب الرخص يكون ظابط مش اى عسكرى و لا امين...... و كمان ان المخالفة دة بالتحديد بتتشال من النيابة لما مبيكونش فيها الشروط دى يعنى التلبس و الظابط..... يا ترى ايه الصح
Content Relevant URLs by
vBSEO 3.6.0 PL2