انا عايز كل واحد عندة هيونداى ماتريكس من الاعضاء يعملها تقييم شامل
عرض للطباعة
انا عايز كل واحد عندة هيونداى ماتريكس من الاعضاء يعملها تقييم شامل
لدي هيونداي ماتريكس مانيوال موديل 2005 Trim:LT
السياره عملية الي أبعد الحدود .. المحرك ذو تكنولوجيا جيده جدا و ذو قدرة تحمل ممتازه ... نظام التعليق متطور يأتي بما يسمي ( Multi link ) في الخلف أي متعدد الوصلات و هو ما يتيح الثبات علي السرعات العاليه و أنا استطعت أن أذهب بسيارتي الي سرعة 195 كلم\س و التكيف شغال و الثبات مفيش بعد كده ...
المساعدين خدمه شاقه و السوست ناشفه شويه عشان مصممه لتحمل أوزان ثقيله ( MPV - MiniVan ) ....
ارتفاع السقف بيتيح الدخول و الخروج منها أمر سهل جدا ...
صاج العربيه متين ( و عن تجربه ) و الدعامات الفولاذيه في الأبواب و في التابلوه و في السقف تجعلك و كأنك جالس داخل قفص من الفولاذ ... و هو ده سبب تقل وزنها ( فوق ال 1300 كيلوجرام ) تسارع العربيه مش وحش بالنسبه لوزنها ... الشركه المصنعه بتقول انها بتحقق من سرعة 0 الي سرعة 100 في 12.7 ثانيه و أنا حققتها في 12 ثانيه بالضبط !!!
طبعا حوامل الأكواب و الصواني و الأماكن المتعدده للتخزين و الأماكن المختفيه لحفظ الأشياء القيمه تحت الكرسي الأمامي و الكنبه الخلفيه تضيف للعربيه ميزه أخري ...
ارتفاع مستوي كرسي السائق و طول لوح الزجاج الأمامي و انخفاض مستوي الكبوت يتيح للسائق أفضل رؤية بزاويه تزيد عن 30 درجه من مستوي نظره للأسفل ...
فرامل العربيه فعلا أكتر من ممتازه و لو مضبوطه صح من أول لمسه العربيه هاتقف ..
مميزتها كتير بس أكيد أنا ناسي حاجات تانيه ...
أما عيوبها اللي متعايش معاها تماما و مش مسببالي أي مشكله :
صوت المحرك عالي , صوت ضوضاء الكاوتش عالي , صوت ضوضاء الرياح عالي , تميل في الملفات المنحدره لذا يجب عليك أن تتجنب الانحرافات القويه علي سرعه عاليه , يمكن في حاجات تانيه أنا مش فاكرها ...
خدمة ما بعد البيع أكتر من ممتازه مع غبور و أسعار قطع الغيار تعتبر قليله جدا لو قارناها بالالنترا مثلا أو اللانسر أو الكوروللا أو حتي البروتون ...
أخيرا أنا بعشق العربيه دي و في بيني و بينها قصة حب و غرام و هيام !!! .
اضيف .. انها واسعة جدا .. و مناسبة للمطبات اللي في شوارعنا علشان عالية
العربية عملية الى اقصى الحدود
الفرامل مش ممتازة لكن معقولة .. و برضو ساعات صوت الموتور بحس انه مزعج حبتين
سعر اعادة بيع مذهل و قطع غيار متوفرة و مش غالية اوي
و باختصار صفقة رابحة
ممكن يكون الفرامل عندك مش مضبوطة كويس .... بمعني :اقتباس:
المشاركة الأصلية كتبت بواسطة الريس
الفرامل ليها حاجتين لازم يبقوا مضبوطين صح ...
1 - الفرامل الخلفيه تكون مضبوطه ( يعني مترجلش عليها كويس ) و ده تلاحظه اذا كانت فرامل اليد تقيله ده معناه ان الفرامل الخلفيه مضبوطه أما لو كانت خفيفه يبقي الفرامل الخلفية محتاجه ضبط ...
2 - هناك ما يسمي بال ( Proportioning Valve ) أي صمام التناسب و هو المسؤول عن توزيع ضغط الفرامل الأماميه و الخلفيه و المفروض انه بيكون مضبوط علي 75% للفرامل الأمامية و 25% للفرامل الخلفية و لو مش مضبوط كويس علي النسبه دي هاتحس ان الفرامل زي الزفت ...
و طبعا الصمام ده مش موجود في العربيات القديمة ده حاجه جديده في العربيات الجديده اللي مافيهاش ABS ولا EBD كبديل عنهم مع الاعتراف بالفارق طبعا ...
تأكد ان الحاجتين دول مضبوطين عندك و بعد كده شوف الفرامل أخبارها ايه ...
اولا شكرا لمحاولتك المساعدة
بس انا عندي 3 ماتريكس في العيلة .. 2006 و 2007 و 2008 منهم عربيتي و عربية خطيبتي
ده غير اصحابي
الماتريكس اقدر اقول ان فراملها معقولة ... بس مش روعة
ممكن ده يكون سببه تقل العربية او الايروديناميكس بتاعها ... لكن مش عيب ميكانيكي اكيد
و مازلت باقول العربية دي صفقة رابحة
شكرا على المعلومات الغاليه دى
بس عندى اضافه انا معايا ماتريكس كنت جايبها زيرو 2006 العداد عامل دلوقتى 40000 و الحمد الله العفشه ناعمه جدا على المطبات مابترزعش ولا حاجه يعنى انا اخويا معاه كورولا 2004 تعتبر نفس المساعدين و تعتبر نفسه العفشه
يعنى مش كانى راكب لادا مع احترامى للعربيه الادا و ملاكها
احب اسمع رد احبائى
شكرا على المعلومات
انا عندى سؤال بس و ياريت حد يساعدنى فيه
انا زى ماقولت ان معايا ماتريكس 2006 هى مانيوال و كنت عايز اجيب ماتريكس الجديده بس اوتوماتيك ايه رايكم
و ياريت الرد يكون من الى فعلا جرب الماتريكس اوتو وقعدت معاه قتره
مستنى الردود
هل حد عندة الوان الماتركس الجديدة 2008؟؟ لأنها تغيرت و منها الجديد أيضا ؟؟
السلام عليكم;
انا اخويا عنده matrix 2006 و عاملة حوالى 35000 و ملاحظ صوت الموتور أخشن و استهلاكها زاد عن الطبيعى فالبنزين تفتكروا أيه السبب أرجو الافادة و شكرا
ياريت حد تاني يضيف أي معلومات عنده
أنا معايا ماتريكس 2008 أتوماتيك هى عربيه ممتازه وبالنسبه لزيادة إستهلاك البنزين عن المعدل الطبيعى فى العادى بيكون بسبب تشغيل التكيف
هى الماتريكس 2009 مانيوال كام سى سى
انا معايا ماتريكس 2009 اوتوماتيك
العربيه ثابته جدااااااااااااااااااا
فراملها سيئه جدااااااااااااااااا
حاسس انها بطيئه في السحب
وكمان بتشد بنزين زياده عن الازم
أنا معايا ماتريكس 2006 اللعربية ممتازة الفرامل جيدة جدا سحب العربية ممتاز
العيب ان صوت الوتور مزعج
انا معايا ماتريكس 2008 و مميزاتها اكتر من عيوبها بكتير
و اكبر عيب ان من ساعة ما اشترتها و في عضة بايخة في فتيس الاولاني و المرشدير وفي صيانة ال 1000 ك قالولي ان دي شكوى عامة و كل صيانة ببلغ التوكيل بنفس المشكلة و العربية بتخرج زي ما دخلت بدون حل للمشكلة
لو عاجبك شكلها مش حتلاقى أحلى منها فى سعرها
السلام عليكم
المتركس الاوتو جميلة وممتعة خصوصا فى مصر دلوقتى لان كل حتة زحمة وكفاية بقى وجع رجلين
غير البنزينه وحط بنزين 92 وبلغني
ممنوع استخدام اللون الاحمر في المداخلات او التوقيع حيث إنه مخصص فقط للمداخلات الادارية من قبل الاشراف والإدارة
يرجى مراجعة قوانين المنتدى
مشرف 12 أ
ياجماعة الماتريكس عربية مش وحشة بس المعلم غبور شال حامل الاكواب من الصالون والمخدع اللى فى النص
معايا ماتريكس 2005 اتوماتيك العربية واسعة و مريحة بس زيرو ثبات علي الطريق يعني مفيش ثبات نهائي في العربية ديه
و استهلاكها للبنزين كثير جدا و السحب ضعيف قوي
من الاخر هي عربية عائلية من الدرجة الاولي و ليست لمثل سني اطلاقا يعني عائلية مش هيشد ولا هيجري بيها يعني مش هيحس بالثبات الضعيف ولا بطئ السحب و كده انما الوسع هو المطلوب في العربية العائلية و العربية المنافسة ليها حاليا و حققت نجاح جميل جدا هي الكيا كارينز
مين اللى قال ان الماتريكس مش ثابته؟؟؟؟؟؟؟؟؟؟؟؟؟؟؟؟؟
الماتريكس مش وحشه بالدرجه دى فى الثبات
على العكس أحسن من غيرها كثير
والله 160 معظم المشوار وأنا راجع من مرسى مطروح
ولم يصبر معى الا سيراتو مشمشى حوالى نصف الطريق أخر ما زهق منى نفخ وعدانى ومشفتوش تانى
انا جبت بيها 180 وكنت حاسس ان العربيه ثابتها عادى مش وحش للدرجه دى وكنت باخد ملفات صعبه على 130 والعربيه كانت ثابته الحمد لله واللى بيساعد على كده وزن العربيه تقريبا 1300 كجم
ولا مرة فكرت اخذ ملف بالعربية علي سرعة عالية لأني لما باخد الملفات علي سرعة قليلة بحس انها هتريح علي جنبها شوية فمفكرتش اخد بيها ملفات بسرعات نهائي و الثبات فعلا كان عيب عندي من الكاوتش ولما غيرته من فترة و طلعت بيها مسافات العربية لذيذة في الثبات مش ممتازة للدرجة اللي هي بس بقت افضل بكتير
اصدقائى مقتنى الماتريكس
انا عندى ماتريكس ذهبى م 2008
العربية مناسبة ليا جدا خصوصا وانا لدى عائلة احس بالخصوصية وذلك لعلوها عن الارض مش اى حد بيكشفها
ما جربتيش احطلها كماليات لانها من وجهة نظرى مش محتاجة
مشكلتى مع الكلاكس مجننى بالرغم من نغييرى له 4 مرات فى غبور
الانذار برضه قلق ,,,,
العربية بجد الله اكبر عليها
طب لو حابة اعرف الماتريكس العادى افضل ولا الخليجى
ولا النترا افضل منها ولو الالنترا اجيب موديل سنة كام
معلش هو الرد متأخر بس لسه شايف الموضوع بالصدفة ... و ردي ده مقتبس من موضوع ليا مشابه لسؤالك فان شاء الله يفيدك اذا ما كنتيش لسه جبتي عربية ...اقتباس:
المشاركة الأصلية كتبت بواسطة uyuyu
صاحب
معرض نصحني اركب ماتريكس خليجي لما عرف اني بشتم في الماتريكس 2006 اللي معانا
من حيث انها عربية تقفيل زبالة بمعنى الكلمة و عفشة بتخبط من ورا لان الجزء الخلفي في الماتريكس
فاضي كما هو معروف فتحس انها عفشة خفيفة فضلا عن عدم الثبات في مطبات الهوا ...
المهم ... سمعت كلامه و دخلت على موقع كنتاكت كارز قسم المستعمل في الماتريكس الخليجي
و وقعت واحده حالة شاذه من بره و جوه و اول يد و رخصة ل2014 و اتصدمت لما شوفت الحاجات
اللي هبور " غبور " شايلها من المصري !!!!!!!!!!!!!!!!!!!
و طبعا علشان معانا 2006 مصري فحافظ الفروقات مقارنة ب 2006 الخليجي اللي جبتها ..
مبدأيا الخليجي : فتحة سقف _ سبويلر خلفي _ مساحة خلفية _ تكييف خليجي جباااااااااااار جدا
ماشاء الله " و انسى اي حد يقولك ما تكييف المصري معايا حلو اهو " _ كرسي السائق بمخدع
و 2 بكره هيدروليكي لتغيير وضعية الكرسي _ دراع في جنب ضهر كرسي السائق لنفخه او تفريغه
من الاسفنج حسب ارتياح نهاية عمودك الفقري _ مخدع خلفي في الكنبة به 2 حامل كوباية _ ريموت
اصلي كوري مختلف عن المصري و به فصل كهرباء السيارة منعا من سرقتها و لو بالمفتاح الاصلي _
و جود اباجورة امامية مع زراير فتحة السقف مقسمة لاضائتين تفتح كل جنب لوحده _ بعد نزع المفتاح
من الكونتاك تظل كهرباء في السيارة لقفل الزجاج المفتوح بها ان نسيت _ مع فتح السيارة بالريموت
يضاء الصالون بالكامل بالاضافة لدائرة خضراء حول الكونتاك لتراه في الظلام _ ماكنة الخليجي غير تماما
عن غبور المصري حيث ان غبور اعتمد ماكنة الفيرنا والماتريكس واحده !!!!!!!!
عند نزولك من السيارة و ان كان الموتور ما زال ساخنا لا تنطفيء مروحة التبريد الا بعد تبريد المحرك
كما يحدث في الاسكودا و الالماني !!!!! و ده طبعا مش موجود في الكوري او الياباني !!!!!!!
بص انا مش عارف احصر ايه كمان بس ده اللي فاكره و و الله بتعامل معاها كاني معايا موبايل جديد
و كل يوم بكتشف اوبشن جديد مع نفسي ... طب استنى افتكرت حاجة كمان :
السنتر بتاعها بيقفل اتوماتيك بعد ال 45 من السرعة و استحالة لو العربية معدية السرعه دي
حد من العيال يعرف يفتح الباب او السنتر يعني !!!!!!!!!!!!!!!!!
فنصيحة من مجررررررررررب ربنا يبارك لك و فكر في اي موديل انت عاوزه بس خليجي خليجي خليجي
و كمان اخويا كان جاي اجازة من السعودية فلما شافها قالي تصور اني شوفت دكتور زميلنا في السعودية جاب ماتريكس اول ما نزل السعودية فما اتكلمتش معاه و قلت جايز جاي من مصر متأثر بالسوق المصري ؟؟؟ بس دلوقت انا عرفت هو مستمتع ازاي !!!!! و كان صعبان عليا علشان تكييفها مش هياكل معاه في حر الخليج و اتاري التكييف قصة تانية لوحده غير المصررررررررررررري
و حاجة افتكرتها : لو نزلت فرامل اليد مش للاخر بس العربية ممكن تمشي 5 ثواني و تلاقي جرس الباب مفتوح اشتغل و هو يعني تنبيه لاكمال تنزيلك لفرامل اليد كليا !!!!!
و في الخليجي كمان فيه زرار في الماكينة مقابل الدركسيون يفصل وصول البنزين للعربية لو لا قدر الله حصل صدمة قوية حفاظ على عدم حدوث حريق ... و لو كانت الخبطة تسمح لك تمشي بالعربية فما عليك الا انك تدوس على الزرار ده و العربية تشتغل فور !!!!
و العفشة الخليجي و الله تقيلة بشكل و بتبان و العربية فاضية في مطب هوا جامد ... بتحس ان في بلدورة اسمنت في الشنطة ,و لو حد راكب ورا ما تلاقهوش طار في السقف او حس بالمطب ....
و لما اكتشف و اتعلم حاجة جديدة هضيفهالكم في نفس الموضوع ده ان شاء الله :))
و ربنا يبارك و يرضي الجميع بما قسمه له :)