الموضوع: اتسرقت قبل كدة !!!

المشاركة الأصلية كتبت بواسطة magyver

دة حراامي خوااف قوي
طيب ماتقلنا قلك اية وقلتلوا اية

اول مرره كنت في ثانوي وكنت ماشي انا وواحد صاحبي في حته مقطوعه ومبيعديش فيها ناس غير قليل وفجأه طلعلنا واحد شارب وسكراااان ومعاه مطوه مقفوله وطلعو اللي في جيوبكم يا ولاد الـ........ ساعتها قعدت افكر اني لو طلعتله حاجه مش هسامح نفسي وانه ممكن ياذيني كده كده المهم دعيت ربنا انه ميقربش من وشي
وصاحبي كانت ركبه بتسقف مش بتخبط
وقعدت اتكلم معاه على امل ان في حد ييجي ينقذنا واقوله انت مش عارف انا ابن مين والحوارات دي ،وهو اصلاً كان شكله مش قادر يتحرك من كتر ما هو سكران
المهم مكملتش ثواني وجه واحد بسم الله ما شاء الله جته ومعاه واحده وطبعاً دي فرصته يعمل فيها ابو تريكه قام قايله انت بتعمل ايه ياض
واول ما الواد شافه طلع يجري ودا جري وراه لحد ما مسكه وجابه وقالي اخد منك حاجه قلتله لأ راح قايلي وسايبني اجري وراه ليه ،وانا واقف قلتله معلش يا باشا والف شكر وجري عالبيت انا والواد اللي معايا ومن ساعتها مروحتش من الطريق ده تاني

المرره التانيه كنت جايب n95-8gb جديد وكان لسا منزلش مصر وكنت ماشي في شارع العشرين -فيصل وكان فيه ماتش للاهلي شغال والشارع فاضي والحته دي كان متقلب فيها واحد قريبي عن طريق ان واحد يقولك خد يا كابتن ويكلمك وبعد ما تسيبه تكتشف ان موبايلك اتنشل وكان لسه حاكيلي عالموقف ده
المهم قابلني واحد وقالي كابتن فانا نفضتله ومشيت قام قالي خد هنا مش بكلمك قلتله خير قالي تعالى مش تسلم طيب فافتكرت الحوار بتاع قريبي قمت حاطط ايدي على جيبي اليمين ومسلم بايدي الشمال قام قايلي متسلم زي الناس قلتله معلش انا اشول قام قالي انت ضربت اخويا الصغير ومش عارف ايه وقعد يحور عشان اشيل ايدي من على جيبي وانا مفيش في الآخر قام مطلع موس وقالي شيل ايدك من على جيبك يا ابن الـ..... رحت قايله على جثتي مش هتاخد مني حاجه قام قايلي كده ماشي يا اسطى ومشي وسابني

والحمد لله اني طلعت من الحوارين دول على خير وربنا ما يورينا حاجه من الحاجات دي تاني