-
رحلة الي شرم الشيخ
ان شاء الله سوف أذهب الي شرم الشيخ بعد اسبوع بالسياره أريد النصح في:
1- الطريق من القاهرة واماكن الاستراحات المفضله ومحطات البنزين
2- ما يجب فحصه في السيارة قبل السفر
3- كيفية قضاء اسبوع في شرم الشيخ (الاماكن المقترحة والمطاعم واي اشياء اخري) حيث انني لم اذهب الي شرم الشيخ منذ7 سنوات
4- هل الجو حاليا في شرم يسمح بالنزول الي الياه؟
ولكم جزيل الشكر
-
هو حضرتك حاجز فين؟
الطريق سهل انشاء الله تأخذ الدائري حتي نزلة طريق السويس0 ومن طريق السويس تمشي حتي نقطة تفتيش السويس ثم اول U Turn ثم اول يمين الي نفق الشهيد احمد حمدي0بعد النفق تمشي علي طول الطريق اخر الطريق حتلاقي شمال ويمين حضرتك حتاخد يمين ثم علي طول لحد شرم الشيخ0حيقابلك في الطريق عيون موسي وراس سدر وحمام فرعون وابو زنيمة وابو رديس واخيرا الطور ودي قبل شرم ب100 كيلو0فيه بنزينات كتير واستراحات كتير برضه بالطريق0يعني عند النفق ريح في بنزينة وطنية0الكافتيريا كويسة وكمان حتمون0في راس سدر خد استراحة في فانتازيا دي احسن واحدة هناك وممكن تريح كمان في ابو زنيمة لو مريحتش في راس سدر وبعد كده علي شرم علي طول0حابعتلك تليفوني علي الخاص ولو احتجت اي حاجة في شرم اطلبني وانا تحت امرك0في الفنادق المفروض فيه حمامت سباحة بها تدفئة فالمفروض انك حتنزل الميه0واسيب لباقي الاعضاء يردوا علي الباقي
-
بصراحه أستاذ أشرف ما سابليش حاجه أقولها عن الطريق,
فهكامك عن المطاعم هنا فى شرم
-أشهر مطعم سى فوود......red seaفى السوق القديم
-يليه اونيون وده له فرعين واحد فى نعمه باى والتانى فى المركاتو على الهضبه.
-أشهر مطعم فول وفلافل .....الشيخ فى السوق القديم.
-أحسن مطعم شرقى ........فى نعمه باى أبو السيد فوق هارد روك.
-أشهر مطعم شرقى......... فى السوق القديم (المصريين).
وتحت أمرك يا ريس فى اى إستفسار.
-
شكرا جزيلا يا جماعه
أنا حاجز في جاردينيا شارم (تايم شير) بس دي اول مره اروح هناك
انا حاجز من 18/1 الى25/1 ان شاء الله
أستاذ اشرف هل يمكن ايضاح المسافات بين الاماكن التي ذكرتها؟
وهل هناك اي خرائط يمكن الاستعانه بها؟
ما هي امكانية عمل رحلات كسفاري او الي سانت كاترين؟
وجزاكم الله خيرا
-
حضرتك يا دكتور ممكن تطلع تبع القرية سفارى وسانت كاترين وكمان جلاس بوت وممكن تروح مع نفسك قرية الف ليلة وليلة ممتازة بتقدم برامج مسلية ده موقعها على منطقة اسمها الهضبة على فكرة انا برده ليا اسبوع فى نفس القرية لما بنزل مصر بروح سنويا هو حضرتك حاجز كام فرد عشان اقللك على مكان او رقم شاليه مميز تنزل فيه وتطلبه منهم وفيه ميزة فى القرية ان هناك يوجد حمام سباحة للسيدات فقط وبالنسبة للمطاعم عندك بيتزا هت فى شارع امير مملكة البحرين فى خليج نعمة اتوبيسات القرية بتنزل حضرتك هناك ليها مواعيد يوميا لخليج نعمة وكذلك للشاطئ وانا تحت امر حضرتك فى اى استفسار
-
شكرا استاذ شريف
اتا حاجز شاليه 4 افراد
-
النفق حوالي 130 كيلو من القاهرة وراس سدر 60 كيلو بعد النفق وابو زنيمة بعد راس سدر بحوالي 80 كيلو ويوجد هنال ملفات شديدة جدا خللي بالك منها يعني مش اكتر من 60كم/س وابو رديس بعد ابو زنيمة ب20 كم والطور بعد ابو رديس بحوالي 120 كم وشرم بعد الطور بحوالي 100 كم دي طبعا مسافات تقريبية الاختلاف حيكون في حاجات بسيطة0يبقي لو حضرتك حتريح يبقي عند النفق ثم ابو زنيمة وكفاية كده
-
طالما حضرتك حاجز 4 افراد اطلب الشاليهات الى بتبدأ برقم 34 او 36 ده بطل على حمام السباحة الرئيسى فى القرية وعلى اول القرية بس لو حضرتك عندك اطفال خلى بالك من الشاليهات الدور الارضى عشان باب البرنده بيطل على طول على الجنينه ومنها على حمام السباحة فياريت تطلب الدور التانى مميز وتكشف من فوق المكان والشاليه مجهز بمطبخ ممكن يتعمل فيه وجبات سريعة عشان حضرتك فى نهاية الاسبوع هتمل من الاكل الجاهز كمان ممكن تكلم الولد بتاع الهاوس كيبنك يجب لحضرتك ميكرويف يساعدك فى عمل وجبات سريعة وفى سوبر ماركت جنب القرية ممكن حضرتك تشترى منه اى حاجة تكون محتاجها
-
شكرا لكم جميعا
بالنسبة للملفات الصعبة هي في المسافة بين راس سدر و ابو زنيمة فقط ام كل الطريق؟
Content Relevant URLs by
vBSEO 3.6.0 PL2