الموضوع: الفرق بين الجنوط الاسبور والعادي

المشاركة الأصلية كتبت بواسطة weka_sa

انا من راى هات طاسة بلاستك ال شبه الجنوط وحطها وسيبها على الله ومش هتحس بفرق خالص وهتريح دماغك

ونعم الرأى والله

المشاركة الأصلية كتبت بواسطة medo980

لتصحيح معلوماتك عكس كلامك هو الصحيح الجنط الأسبور اثقل من العادى بتاع الفبريقه غير انه هو المقاس المظبوط للعربيه وما افتكرش انه بيضر العفشه وإلا كان المصنع محطهوش فى العربيه من الأساس تانى حاجه الجنط الأسبور دائماً بيكون اثقل فى الوزن من الجنط الحديد وده الى بيدى ثبات للعربيه ولكن على حساب العفشه لأنه بيضر جلب المقصات والمقصات ولو عريض زياده عن اللزوم بيصف عمر علبة الدريكسيون ونادراً لما تلاقى جنط سبور بنفس وزن العادى

على العكس تماماً - الجنوط السبور أخف وزنأً من جنوط السيارة الفابريكة وأسمها light alloy وهذا يؤدى إلى أنة يكون خفيف على العفشة . على العكس من الحنوط المعدنية الأخرى

هناك سيارات بتنزل نوعين العادى و السبور ولكن بتكون تكلفة السيارة بالجنوط السبور أغلى طبعأ ومثال على ذلك الانسر

اقترح حاجه
شوف عربيتك لو ليها اصلا جنوط سبور الفابريقة (اوبشن اختيارى) لو ليها اشتريه
لو مالهاش وعايز ثبات يبقى ممكن تعرض الكاوتش فى حدود الابعاد المسموح بيها اللى ما تاثرش على استهلاك البنزين والعفشة
لو عايز شكل ممكن تشوف برضه الطاسات اللى شكلها يعجبك فى منها الاصلى بيبقى استيراد وفى منها العادى الجديد وموجود عند بتوع الاكسسوار بصفة عامه

رأى شخصى عرض الكاوتش(فى حدود المسموح بيه) وركب طاسات اصلى نضيفه هيدى قيمة للعربية اكتر

وفى الاخر احنا مش هنعدل على اللى صنعها مش كده ولا اييييييييييييييييه؟؟؟؟؟؟

المشاركة الأصلية كتبت بواسطة wael6

جزاكم الله خيرا
عربيتي اكسيل مو 95
جنط 13 *175*70
معرفش هل ده الاستاندرد ولا متغير
ومعرفش هل كان بينزلها جنوط اسبور ولا لأ
هل فيه مشكله لو ركبت جنط 14*185*60
ولو حبيت اعرض الكاوتش من غير ما اغير الجنط واخليه 13 زى ما هو اجيب مقاس ونوع ايه
ولكم جزيل الشكر

شوف يا باشا عشان تبقى عارف (من باب العلم بالشىء) ازاى تغير مقاس الكاوتش او الجنط بما لا يتعارض مع الابعاد الاصلية لكاوتش وجنط الفابريقة
اولا الجنط الحديد الاسبور اعرض من الجنط العادى يعنى بيقبل كل عروض الكاوتش
الجنط الحديد العادى عرضة اقل من الاسبور يعنى هييجى عند عرض معين وهتلاقى الكاوتش بقى اعلى من سطح الجنط (بارز على خفيف كده)
بطبيعة الحال الجنط الاسبور اقسى(انشف ) من الجنط الحديد(مرن شوية عن الجنط الاسبور) فا ممكن تحس بنشوفية فى العفشة مع الجنط الاسبور بس الفرق ده ماعتقدش هيبقى مؤثر (ده بالنسبة لفرق الخامة) لسه ماجيناش للمقاس



هتلاقى المقاس الاستاندرد بتاع الفابريقة فى حلق الباب الشمال بتاع السواق او إسأل اى صاحب اكسل هيقولك مكانه(لانى مش فاكر بالظبط فى اى مكان فى الباب) ماشى؟؟؟
حضرتك بتقول المقاس اللى عندك جنط 13 *175*70
13 بوصة: ده قطر الجنط الحديد سواء سبور او عادى وبالتالى يلزمة قطر كاوتش بنفس المقاس
175 مم: عرض الكاوتش اللى هوه بيبان كاوتش عريض او رفيع
70 %: نسبة مئوية من عرض الكاوتش=ارتفاع الكاوتش من اقطر الداخلى حتى سطح الكاوتش وفى النهاية بتتحسب بالمم وفى حالة حضرتك هتقى ال70% =122.5مم يعنى حوالى 12.25سم والحجم الكلى للكاوتش ده =575مم تمام؟؟؟

يبقى عايزين لما نغير الجنط او الكاوتش نوصل لاقرب رقم بالنسبة للحجم الكلى اللى هو 575مم وينصح بعد التغيير ان الفرق ما يزيدش ومايقلش عن 2.5% بالنسبة للحجم الكلى وهنعرف ازاى دلوقتى
لغاية كده كويس؟؟؟
حضرتك عايز تحط كاوتش + جنط (لانه بم انك هتغير فى قطر الكاوتش من 13 الى 14 يبقى لاااااازم تغير الجنط نفسة من 13 الى 14) وحضرتك عايز تغير للاتى
(هل فيه مشكله لو ركبت جنط 14*185*60)
14 يعنى جنط حديد 14 بوصة قطر اكبر من الاصلى وطبعا هتجيبله الكاوتش اللى قطره 14
185مم ده العرض
60% نسبة ارتفاع الكاوتش ودى =111مم
يعنى مبدئيا العربة هتوطى تقريبا 122.25-111=11.5 يعنى 1.15سم
الحجم الكلى بعد التغيير=578مم

نيجى لفرق الحجم الكلى
الحجم بعد 578-الحجم قبل 575=الفرق 3مم (ده فرق ممتاز جدا جدا جدا وغير مؤثر بالمرة)
ونسبة التغيير هتبقى حوالى 0.5% يعنى فرق لا يذكر

النتيجة : 14*185*60 يعتبر مقاس مثالى بالنسبة للاستاندرد ومافيش اى مشكله ان شاء الله

معلش انا طولت عليك لكن حبيت وانا بقولك رأيى اعرفك ازاى بنحسب الحسبة للعلم فقط
المرجع:TYRESAVE: Tyre Size Calculator
ده الموقع اللى هتحط فيه الابعاد الاصلية والابعاد المقترحة وهيديلك فرق الابعاد بين الاصلى والمقترح وخلى بالك من فرق الحجم الكلى لان ده اللى بيحدد مدى ملائمة التغيير بالنسبة للعربية (عفشة-استهلاك بنزين-قراءة عداد سرعة)
اتمنى اكون قدمتلك معلومة

هيبقى مظبوط ان شاء الله
بس خد بالك كويس جدا جدا جدا من تجويف العجل اللى هوه تجويف الرفارف ورا وقدام( لانك هتركب جنط اكبر فا بالتالى هيملا التجويف ده المهم قبل ما تركب تجرب احسن الجنط الكبير يحك فى فى العربية او عند لف العجل يمين وشمال وإسأل عفشج ثقة الاول ثم اسأل بياع الجنوط
فى ناس كتير بتغير مقاسات جنوط وكاوتش ومابياخدوش بالهم من النقطة دى او بيكبروا دماغهم والنتيجة ان بتاخد شكل حلو لكن تأثير ضار على العفشة مع الوقت
وربنا يوفقك