النظرة القاتلة

**M.Mosaad** · 27-03-2010 12:33 PM

المشاركة الأصلية كتبت بواسطة olaosman

حاجة بتحصل في أغلب الأوقات مع الناس اللي سايقة و بتحصل معايا أو مع سواق التاكسي لما أكون راكبة تاكسي.

أكون راكبة مع تاكسي مثلا.. و سواق التاكسي ماشي بالراحة شوية أو مش مركز.. أبص ألاقي اللي ماشي واره قام معلق له الكلاكس و لما سواق التاكسي يوسع له.. لازم لازم لازم صاحب العربية اللي كان وراه ييجي جنبه و يقوم مهدي و باصص له!! طيب أما من شوية كنت مستعجل و مش طايق نفسك عشان التاني ماشي بالراحة.. طيب ما تدوس بنزين و تعدي من غير ما تبص له البصة اللي مش هاتخليه يعرف ينام بالليل دي :b4_556:

نفس الموقف تقريبا حصل معايا من يومين.. ماشية ع الكورنيش و كان الطريق بعد أركاديا مول واسع و سالك.. إنما قبل كده كان زبالة و بعد كده انا عارفة إنه هايبقى زبالتين.. فواخدة شمالي و ماشية على 60 و مش عايزة أزود عن كده عشان عارفة إنها دقيقة بالظبط و هاتقفل تاني.. اللي ورايا قام مقلب لي نور عشان أجري.. و انا طبعا مش هاجري عن كده، قمت موسعة له.. هي و الله تقليبة نور واحدة، بصيت في مراية الصالون، وسعت له.. و هو معدي جنبي قام مهدي و باصص لي :b4_444:

انا مش عارفة هو منتظر إيه لما يبص لي!! يعني ماشي.. بص لي.. و بعدين؟ عايز خناقة يعني ولا عايز ايه بالظبط؟ متوقع إني هاقول له إيه لما يبص لي و لا هاعمل له ايه؟ انا شايفة ان الموقف انتهى من لحظة ما وسعت له.. النظرة القاتلة اللي بصها لي دي بأه لزمتها ايه؟ و عايزة أعرف كمان، بتريح الناس في إيه؟ يعني لما جه جنبي و بص لي أو اللي بص لسواق التاكسي و غيره حس براحة نفسية بعد ما عمل كده؟ و لا ايه؟ لأ بجد عايزة أفهم :m_yes[1]:

حد فاهم طيب يفهمني :b4_556:

ممكن بيبقي ناس مستعجله شوية و عايزة تمشي فحضرتك ممكن تاخدي اليمين و تمشي براحتك و لو قلب نور لحد الصبح متعبريهوش لكن بصرحه علي الشمال و ماشي 60 و الطريق مفتوح طبيعي الواحد بيبص نظرة ضيق و امتعاض من الشخص اللي قصادة

انا ساعات ببص بحب اعرف شكل الشخص اللي ماشي براحه و الطريق مفتوح يعني بتبقي علي كوبري اكتوبر و مفيش تقاطعات و واحد واخد الشمال و ماشي علي 60 مثلا فبحب اشوف نوعيه الشخص دة ايه يعني هو مولود بطيء و لا الزمن جه عليه و بقي كدة و بصراحه دايما بيبقوا نفس الشكل و نفس القالب باصص لقدام و ماسك الدركسيون بايديه الاتنين احسن يهرب منه دة طبعا غير الاخوة المهمين جدااااااااااا اللي بيتكلموا في الموبيل او الاخوات المهمات جدااااااااااااا اللي بتبقي حاطة الموبيل في الطرحه يعني ايديها الاتنين حريين و مع ذلك ماشينن ببطء

فاسمحيلي اعذري الناس لان فعلا اللي بيبقي ماسك الشمال و ماشي براحه و الطريق مفتوح ممكن بنرفز اللي وراه و صدقيني 60 قليل شوية علي الكورنيش لو الطريق مفتوح

**eino666** · 27-03-2010 12:40 PM

انتى تعرفى ان حصل معايا موقف اسمحى لى احكيهولك
كنت طالع من اسكندرية متوكل على الله عندى مشوار فالقاهرة وفى اول الصحراوى بعد كوبرى مرغم تريلة محملة عربيات وماسك شماله وانا جاى من وراه قلبتله نور وكلاكس يقوم عاطى اشارة يمين يعنى هيوسع لى واستناه يوسع مفيش رحت انا طالع منه من يمينه وجيت قدامه وهديت خالص لغاية لما بقيت ماشى تحت سرعة 20كم وهو من ورايا هيتجنن ويدينى رعاش وكلاكسات وانا ولا انا هنا اما جننته علشان يحس بلى بيعمله وطبعا معرفتش اديله البصة المتينة علشان هو قاعد فوق وانا مش طايله
........................
محمود عينو

**mohamed_kta** · 27-03-2010 12:45 PM

اعتقد هناك سببين رئيسيين يجعلوا معظم الناس تفعل هكذا :

1 - الناس مساكين ضغوط الحياه و المسؤليات و الغلاء جعلنا نعيش فى جو مغلف بالعصبيه تجاه الآخر .

2 - بعض الاشخاص بينظروا لسائق التاكسى على أنه أقل و للمرأة بالضعف و كثرة الأخطاء فى القيادة و ده بيخليهم متحفزين دائماً ضد الاثنين.

**eslam_wega** · 27-03-2010 12:45 PM

المشاركة الأصلية كتبت بواسطة eino666

انتى تعرفى ان حصل معايا موقف اسمحى لى احكيهولك
كنت طالع من اسكندرية متوكل على الله عندى مشوار فالقاهرة وفى اول الصحراوى بعد كوبرى مرغم تريلة محملة عربيات وماسك شماله وانا جاى من وراه قلبتله نور وكلاكس يقوم عاطى اشارة يمين يعنى هيوسع لى واستناه يوسع مفيش رحت انا طالع منه من يمينه وجيت قدامه وهديت خالص لغاية لما بقيت ماشى تحت سرعة 20كم وهو من ورايا هيتجنن ويدينى رعاش وكلاكسات وانا ولا انا هنا اما جننته علشان يحس بلى بيعمله وطبعا معرفتش اديله البصة المتينة علشان هو قاعد فوق وانا مش طايله
........................
محمود عينو

يا قلبك يا شيخ بتهظر مع تريلة

**romeo_6887** · 27-03-2010 12:51 PM

ساعات البصه دي بتعني" انت بتهزر يعني ؟ " او لو يبص لبنت ممكن تكوم معاكسه او شئ من هذا القبيل

**OlaOsman** · 27-03-2010 12:57 PM

المشاركة الأصلية كتبت بواسطة mohamed_momi88

ممكن بيبقي ناس مستعجله شوية و عايزة تمشي فحضرتك ممكن تاخدي اليمين و تمشي براحتك و لو قلب نور لحد الصبح متعبريهوش لكن بصرحه علي الشمال و ماشي 60 و الطريق مفتوح طبيعي الواحد بيبص نظرة ضيق و امتعاض من الشخص اللي قصادة

انا ساعات ببص بحب اعرف شكل الشخص اللي ماشي براحه و الطريق مفتوح يعني بتبقي علي كوبري اكتوبر و مفيش تقاطعات و واحد واخد الشمال و ماشي علي 60 مثلا فبحب اشوف نوعيه الشخص دة ايه يعني هو مولود بطيء و لا الزمن جه عليه و بقي كدة و بصراحه دايما بيبقوا نفس الشكل و نفس القالب باصص لقدام و ماسك الدركسيون بايديه الاتنين احسن يهرب منه دة طبعا غير الاخوة المهمين جدااااااااااا اللي بيتكلموا في الموبيل او الاخوات المهمات جدااااااااااااا اللي بتبقي حاطة الموبيل في الطرحه يعني ايديها الاتنين حريين و مع ذلك ماشينن ببطء

فاسمحيلي اعذري الناس لان فعلا اللي بيبقي ماسك الشمال و ماشي براحه و الطريق مفتوح ممكن بنرفز اللي وراه و صدقيني 60 قليل شوية علي الكورنيش لو الطريق مفتوح

هو بس يا محمد مافيش عند الناس صبر.. ماهي هاتقفل كمان شوية صغيرين اصلا! طبعا ده مش معناه إني مع إن حد يمشي ببطء السلحفاه و مش عايز يعدي الناس و كمان يبقى مش عاجبه.. إنما انا عن نفسي بتحصل معايا إن حد يبقى ماشي بطئ و باقلب له نور أو اديله كلاكس و ما يعبرنيش، أقوم انا اللي طالعة من وراه و بعدين أطلع قدامه.. لا باهدي بأه و ارزعه البصة التمام ولا حاجة.. لإنها مش تلكيكة لخناقة و السلام.

**OlaOsman** · 27-03-2010 12:59 PM

المشاركة الأصلية كتبت بواسطة eino666

وطبعا معرفتش اديله البصة المتينة علشان هو قاعد فوق وانا مش طايله
........................
محمود عينو

دي بأه فطستني على نفسي من الضحك

**OlaOsman** · 27-03-2010 01:00 PM

المشاركة الأصلية كتبت بواسطة mohamed_kta

اعتقد هناك سببين رئيسيين يجعلوا معظم الناس تفعل هكذا :

1 - الناس مساكين ضغوط الحياه و المسؤليات و الغلاء جعلنا نعيش فى جو مغلف بالعصبيه تجاه الآخر .

2 - بعض الاشخاص بينظروا لسائق التاكسى على أنه أقل و للمرأة بالضعف و كثرة الأخطاء فى القيادة و ده بيخليهم متحفزين دائماً ضد الاثنين.

كلام سليم

**pro_samir** · 27-03-2010 01:01 PM

هو البصة تفسيرها فعلا زي الناس ما قالولك

بس كون الموقف اللي حصل معاكي يستاهل ولا لأ في احيان الواحد من الزهق والزحمة بيبقي مش عايز يسيب قدامة اي متر الا ويدخل فية ، يعني لو قدامة عربية مثلا وقدامها خمسة متر فاضيين هيبقي متضايق منة وعايزة يتحرك ال يعني الخمسة متر دول هيفرقو بس هي فكرة ان في حتة فاضية واللي قدامك دة حاشرك وراة

والطبيعي اللي ماشي بطيئ او حتي بالسرعة القانونية يمسك الحارة اللي في النص علشان يتلافي الناس اللي بتجري اسرع منة او من القانوني

المشاركة الأصلية كتبت بواسطة eino666

انتى تعرفى ان حصل معايا موقف اسمحى لى احكيهولك
كنت طالع من اسكندرية متوكل على الله عندى مشوار فالقاهرة وفى اول الصحراوى بعد كوبرى مرغم تريلة محملة عربيات وماسك شماله وانا جاى من وراه قلبتله نور وكلاكس يقوم عاطى اشارة يمين يعنى هيوسع لى واستناه يوسع مفيش رحت انا طالع منه من يمينه وجيت قدامه وهديت خالص لغاية لما بقيت ماشى تحت سرعة 20كم وهو من ورايا هيتجنن ويدينى رعاش وكلاكسات وانا ولا انا هنا اما جننته علشان يحس بلى بيعمله وطبعا معرفتش اديله البصة المتينة علشان هو قاعد فوق وانا مش طايله
........................
محمود عينو

عملتها في واحد مرة وكان شايل كونتينر وفي منزل كوبري كمان بس كان اتغابي عليا جدا جدا وقفل عليا مرة واحدة وانا جنبة مع ان الطريق فاضي وكان شايفني وفضلت ذالل أنفاسة طول منزل الكوبري وهو مشالش ايدة من علي السارينة ،، وانا طبعا ايد علي قلبي والتانية علي الفتيس مستعد علشان اسقط نقلة واطير لو لاقيتة هيركب فوقي

اخويا الصغير دايما يقولي انت هتموت تحت تريلا مش عارف لية