تحذير من الغسيل في محطة وطنيه اللي في الأوتوستراد
السلام عليكم ورحمة الله وبركاته،،،
أنا عاوز أحذر الناس اللي بيغسلوا العربيه في محطة وطنيه اللي في الأوتوستراد. الوصله اللي ما بين طريق السويس وشيراتون. المحطه اللي فيها رياضكو بتاع الأثاث المكتبي.
المحطه دية مشهوره ومتميزه في الغسيل وأسعارهم كويسه - 20 جنيه غسيل جوه وبره.
بس أنا حبيبت أنبهكم لحاجه:
أنا رحت أغسل العربيه هناك إمبارح، وفي آخر مرحله اللي هي التنشيف ومسح التابلوه، الولد اللي شغال في العربيه قال لي:
التابلوه عاوز يتلمع، معاك إسبراي تلميع؟ قلت له لأ
قال لي خلاص أنا ممكن أجيبلك سبراي تلميع من الكار كير بعشره جنيه ونلمع بيه
قلت له: والإسبراي ده بيكفي مره واحده ولا إيه؟ قال لي لأ هالمع بيه وهارجعلك الباقي.
قلت له ماشي، هات.
مع العلم إن المحطه فيها ماركت وفيه كل أنواه الإسبراي، بس هو قال لي إنه هايجيبه من الكاركير.
المهم أنا قلت له تحب أجيبه أنا على ما إنت تخلص ولا إنت هاتجيبه ؟ قال لي لأ أنا هاجيبهولك
هو راح وغاب شويه وجاب معاه إزازه بيضاء كده مالهاش معالم وقعد يلمع، وبعد أما خلص قال لي شايف الفرق يا بيه؟ قلت له الله ينور.
ومشيت وإديته إكراميه كويسه وإتجهت على البيت.
بس بعد أنا مشيت بشويه إكتشفت إني ما خدتش باقي الإزازه! ا قلت أرجعله ولا لأ؟ وقعدت أتسائل يا ترى هو نسيها بحسن نيه ولا بسوء نيه؟ المهم قررت إني ألف وأرجع مع إني كنت على بعد 8 كيلو ورجعت ودورت عليه ولقيته.
قلت له: فين بقية الإزازه؟ راح إرتبك شويه وراح مطلعها من جيبه! تخيلو لقيت إيه بقى؟
الإزازه واضح إنها قديمه لدرجة إن كل الإستيكرات اللي عليها متقطعه، وواضح إنها إتملت قبل كده خمسين مره. والواضح كمان إنها ما كانتش مليانه أصلاً قبل ما يستعملها معايا عشان اللي باقي فيها كان حبه صغيرين وأنا شفته وهو بيلمع ما خدش كميه خالص.
الخلاصه: إشتري إنت أي سبراي عاوز تستخدمه في التلميع وما تخليش حد يجيبلك حاجه من عنده.
أنا إن شاء الله كمان ناوي أروح لمدير المحطه وهاوريله الإزازه وهاحكيله الموضوع.