الموضوع: سيارة مجهزة طبيا من بورسعيد

بص يا باشا
متعولش نجاحك فى شراء العربية على التاجر المضمون ، لان كلهم اسوأ من بعض
ان هقولك نصيحة اتعلمتها بعد 3 مرات شراء من بورسعيد واتحرق فيهم دمى مش عاوز اقولك اد ايه .
طول ما فلوسك فى جيبك انت ملك الموقف تقلب براحتك فى العربيات وتفاصل براحتك وتسيب ده وتروح لده لكن اول ما دفعت عربون بقى هو اللى ماسكك ، اتعامل معاهم كلهم على انهم حرامية ولازم تأمن نفسك كويس وماتصدقش كلامهم المعسول اللى كله دين وادب واخلاق ، بشكل اخر :
1- اتفرج كويس اوى ولو العربية واقفة فى مكان مظلم سيبك منها وقولله كده "انا مش عارف احكم على العربية الدنيا ظلمة ياما هو يخرجهالك فى النور لو عاوز يبيع يا اما سيبك منه ومنها
2- ماتتعبش وماتزهقش بسرعة لان هاتدفع فلوس مش قليلة
3- ماتتخليش اعجابك بعربية معينة يبان فى كلامك او نظراتك لان ساعتها هو هيتحكم اكتر وطول ما انت زاهد فى البيعة هتعرف تعمل بيعة كويسة.
4- اشترى عربية حالتها نظيفة جدا جدا لانها لسه هتقعد معاك 5 سنين وماتخدش عربية ناقصة حاجات مهمة ويقوللك هاضبطهالك وانت بتستلم ده كلاك كذب * كذب وهيطلع عينك وانت بتستلم
اخيرا السعر هيتراوح من 36 - 40 حسب الحالة ، انت طبعا هتسمع 45 وحاجات كده واصل الشحن غلى والجمارك واليورو والدولار ارتفعوا وكلامهم ملوش اول من اخر
اهم نصيحة خللى بالك من السماسرة وابعد عنهم ولو اضطريت انك تبات فى فندق عشان تدور تانى او حتى تسافر بعد شهر ولا حاجة يكون فى شغل جديد وصل مش مشكلة
وربنا يصلحلك الحال

أخى esabdc

شكرا جزيل لك
كلامك مظبوط عن التجار انا والدى فى العربية اللى فاتته غشوه بس السؤال هى الماتريكس بياجى معاها جميع الكماليات كأنى بشتريها من المعرض زيرو ؟
والعربية بعد ما تعجبنى واتفق عليه وادفع العربون ايه اللى يضملى انهم ما يلعبوش فيها او ياخدوا حاجه منها ؟
وهل لو فى معرفة موظف فى جمارك بورسعيد أو واحد من بورسعيد ممكن يعمل معايا خدمة

المشاركة الأصلية كتبت بواسطة eng.sameh

مشوار طيييييييييييييييييييييييي ييييين وملوش أي لازمة وكله خسارة وقرف رغم ان ظاهرة مكسب ، يا ريت ترجع عن الفكرة كلها ، دي نصيحة من واحد مر بالمشوار كله من اوله لحد اخره !

يا اخى انا والدى معاق فعلا وعلشان كده احنا عاوزين نستفيد من الاعفاء الجمركى اللى عليها

المشاركة الأصلية كتبت بواسطة yaserbasha2000

للاسف موضوع عربيات بورسعيد ده هتقابل فيه اسواء انواع البشر انا شخصيا بأكتئب لما افتكر المشوار ده

اوعي تامن لاي حد حتي اللي بتبقي واخده معاك سمكري او ميكانيكي بيحاولوا يظبطوهم من تحت لتحت
ابعد نهائيا عن السماسره و المستخلصين
در كويس وكسر كتير في السعر كون متأكد انه كسبان منك مش اقل من 10 الي 15 الف في العربيه
اتأكد كويس ان الموديل اللي هتجيبه منتشر في مصر علشان قطع الغيار
اتأكد ان العربيه مش هتبقي شكلها مميز علشان ممكن تسوقها انت مكان الوالد فالمرور ميوقفكش كل كمين (زي النوبيرا ون)
سجل كل حاجه في العربيه نوع الكاسيت الاصلي الجنوط الكاوتش الطاسات ممكن احسن تصور العربيه بالتفصيل
اي حاجه ناقصة لازم يجيبها ليك من اي عربيه واقفه
لازم يظبط ليك التكيف واي حاجه كهرباء او ميكانيكا واحجز الف او الفين معاك قولوا انك هتديهم للراجل بتاعه عند بتاع التكييف لانك متضمنش ممكن تلاقي حاجات تانيه وانت سايق
خد معاك نمر تجاريه و لو ممكن الوالد في الاستلام علشان غلاسات المرور


لو افتكرت حاجه تانيه هاكتبها

شكرا لك يا أخى على النصائح وبالفعل انا فى العربية اللى فاتت لما روحنا نجيبها انا ووالدى افتكرنى التاجر صنايعى جاى مع المعاق وحاول يظبطنى انا قلقان بالفعل من التجار ولكن الله المستعان عليهم وعلى امثالهم بس يا ريت ترد على فى الاسئلة التى سألتها لأخوناesabdc

المشاركة الأصلية كتبت بواسطة qenacity

أخى esabdc

شكرا جزيل لك
كلامك مظبوط عن التجار انا والدى فى العربية اللى فاتته غشوه بس السؤال هى الماتريكس بياجى معاها جميع الكماليات كأنى بشتريها من المعرض زيرو ؟
والعربية بعد ما تعجبنى واتفق عليه وادفع العربون ايه اللى يضملى انهم ما يلعبوش فيها او ياخدوا حاجه منها ؟
وهل لو فى معرفة موظف فى جمارك بورسعيد أو واحد من بورسعيد ممكن يعمل معايا خدمة