هل ممكن تتحول ال128 الي عربية محترمة ؟

**kokmedo** · 12-01-2008 04:29 PM

السلام عليكم ورحمة الله وبركاتة
أنا عندي عربية فيات نصر 128 موديل 1979 ,1100cc
حالتها وحشة بس مش أوي بجد كنت بفكر أبيعها وأشتري عربية أخري
بس بعد ما شفت هذا القسم قررت أظبطها وخليها عروسة أخليها بي أم دبليو علي رأي موضوع في المنتدي قرأتة
بس عندي مشكلة معرفش أي حد يظبطلي العربية من ميكانيكا لسمكرة لعفشة لكهرباء لبتاع دوكو لكل حاجة عايز ناس يظبطوها صح الصح ويروشنوها وتبقي شكلة أحسن من الشكل دة اللي عامل زي المستطيل المعفن دة فياريت اللي يعرف ميكانيكي أو سمكري أو كهربائي أو مركز خدمة يقوم بكل هذا ويخليها شكلها حلو يقول لي بس أهم حاجة يكون حلو وميكنش حراء
أنا اسف للأطالة عليكم
وأرجو المساعدة منكم
والسلام عليكم ورحمة الله وبركاتة

**kokmedo** · 13-01-2008 09:11 AM

السلام عليكم ورحمة الله
محدش رد علية لية كدة
أنا منتظر ردكم بفارغ الصبر
والسلام عليكم ورحمة الله

**Hossam_Hassan** · 13-01-2008 10:00 AM

لو أنت مش (هاوى) أو (غاوى) تعديلات و معندكش خبرة (كبيرة) فى التعامل مع الصنايعية، يبقى الأفضل انك تبيع و تجيب عربية تانية فيها المواصفات اللى انت عاوزها، لأنك ممكن تخسر كتير فى تظبيطها و فى بيعها لو فكرت تبيعها بعدين علشان كل ما تعدل فى العربية كل ما المهتمين بشرائها عددهم يقل.

**eng / AhmeD** · 13-01-2008 10:15 AM

لو أنت مش (هاوى) أو (غاوى) تعديلات و معندكش خبرة (كبيرة) فى التعامل مع الصنايعية، يبقى الأفضل انك تبيع و تجيب عربية تانية فيها المواصفات اللى انت عاوزها، لأنك ممكن تخسر كتير فى تظبيطها و فى بيعها لو فكرت تبيعها بعدين علشان كل ما تعدل فى العربية كل ما المهتمين بشرائها عددهم يقل.

بس ممكن تظبطها لو اهم حاجة عندك التميز و تبقي ماشي بعربية مفيش زيها

**Khalid_Mostafa** · 13-01-2008 10:30 AM

انا من رأيي انك تبيعها وتجيب عربيه جديدة او إستعمال خفيف لأن مهما حتعمل العربية عجوزه و تكنولوجي قديمه جداً ..وفر فلوسك احسن لأن حتي لو ظبطها ...بعد شوية مش كتير حتلاقي الحاجات الفبر بتفصل و العربية يبقي شكلها اوحش من الأول وتبقي دفعت فلوس علي الفاضي بالإضافة إلي ان قيمتها بتقل

**kokmedo** · 13-01-2008 10:25 PM

السلام عليكم ورحمة الله
شكرا لكم علي ردكم
طيب ما رأيكم ماذا أجيب أنا هبعها وأدفعها ثمنها مقدم عربية جديدة وأقسط الباقي
ما رأيكم أجيب أية بس تكون رخيصة وجميلة
ما رأيكم
والسلام عليكم ورحمة الله

**Khalid_Mostafa** · 14-01-2008 08:33 AM

المشاركة الأصلية كتبت بواسطة kokmedo

السلام عليكم ورحمة الله
شكرا لكم علي ردكم
طيب ما رأيكم ماذا أجيب أنا هبعها وأدفعها ثمنها مقدم عربية جديدة وأقسط الباقي
ما رأيكم أجيب أية بس تكون رخيصة وجميلة
ما رأيكم
والسلام عليكم ورحمة الله

ده يتوقف علي عدة عناصر :
-ميزانيتك كام
-انتا متجوز ولا لأ (يعني عايزها عائلية ولا لوحدك)

**ibrahimsaad** · 14-01-2008 08:58 AM

حرام تدفع فلوس فى كلام فارغ اسمه تضبيط لان كل ده كلام مؤقت ومش حلو مهما عملت هيبقى وحش بعد فتره بسيطه جدا ومش هتلاقى زبون يشتريها

رأى تبيعها وتجيب ماروتى لو انت لوحدك او لادا 2107 لو عيله

**Xpert** · 14-01-2008 11:38 AM

بص يا سيدي باختصار لو العربيه بتاعتي ..
لو ضايعه سمكره .. هاطلع اجيب صااج جديد (لو يتفع بتاع التوكيل) .. بتاع النصر الجديده ..
دوكو .. لوون ميتاليك ظريف كده قريب للونها الاصلي ..
فوانيس و شبكه جديده (من التوكيل برضه) ... اكصدامات اوريجينال ..
كهربا لو ينفع دفيره جديده بتاع المصنع اللي في اكتوبر ده يبقي تمام .. بلاش اللي بيعملوها الصنايعيه دي ..
التابلوه يتروق كده و تمام .. و الفرش علي اونكل حربي ...
الماتور تمبرا 1400 -1600 ... عفشه تتجدد بالكامل .. و طقم صوت لذيذ و كل عام و انتم بخير ..
يعني : تتجدد بالكامل .. مع الاحتفاظ بمعالم العربيه زي ما هيا .. بلاش بقي فايبر و الكلام ده ..
بس .. اللي يتعمل يتعمل مظبوط و هاي كواليتي .. هاتطلعلك في الاخر عربيه كلاسيك تمام ... و اللي يشوفها يقول احسن من الزيرو .. و ماتنشاس ميزه ال128 انها لسه بتتصنع جديد ..