1- بعد ما اخدت رخصة السواقه بسنتين كنت سايق الساعه 2 الصبح في شارع القصر العيني رايح المطار و الطريق كان فاضي و ماشي على 70 او 80 و على التقاطع اللي جنب صيدله بصيت لقيت اوتوبيس خاص قاطع الطريق طياره و الدنيا ضلمت. كل اللي انا فاكره ان الربع الامامي بتاع العربيه غطى على الازاز و العربيه و هي بتلف حوالين نفسها لمحت الاوتوبيس و هوه بتنقلب على جنبه و بيزحف بتاع 10 متر قبل ما يطلع على الرصيف . و ده يدل على السرعه اللي كان ماشي بيها. بس الحمد لله بفضل الله سبحانه و تعالى و بفضل حزام الامان كان زماني مسحت الشارع بوشي بعد ما كنت حأعدي من الازاز الامامي.
2- كنت ماشي على الدائري يوم الجمعه الساعه 11 قبل الصلاه و ماشي على 90 و قريب من العربيه اللي قدامى و فجأه لقيته حدف يمين جامد علشان ابص الاقي قدامي شنطة سفر صعيدي من الحجم الجامبو قدامي بالضبط طبعا مكنش يبفع افاديها لأن العربيه ممكن تتقلب و مينفعش اعديها في النص ممكن تخبط في حاجه من تحت تفرمل العربيه او تقلبها رحت كاسر و دايس عليها بالجنب الشمال. عدت على خير بس بوظت المقصات و المساعد.
3- كنت ماشي على الدائري راجع من الشغل و المدام معايا و اتاري مره قلتلها افتحي الشنطه و احنا واقفين راحت فتحت الكبوت من جوه و انا مخدتش بالي. ابص الاقي الكبوت اترفع و فرتك الازاز الامامي و الدنيا ضلمت و كنت ماشي على الدائري على 100 و مفيش اي امل تشوف اي حاجه, كنت واخد فكره العربيات اللي حواليا ايه مينفعش تقف فجأه يا اما حتروح في داهيه, رحت اديت انتظار و فضلت اهدي شويه شويه و احضن يمين شويه شويه لحد ما ركنت و طبعا انتوا عارفين الخسائر ايه بس الحمدلله ان جت على كده.
4- مره كنت في شارع في المعادي و ماشي على 60 و الطريق فاضي و مفيش امامي الا تاكسي ماسك اقصى اليسار و مهدي على الاخر قلت اعدي منه في اليمين و الطريق كان حارتين و التالته سيارات مركونه, المهم انا بعدي منه اتاريه بيشاور اللي راكب معاه يدخل منين راح قاله خش في الفتحه يمين راح من غير اشاره او يبص في المرايه راح كاسر مره واحده يمين و انا ماشي 60 من يمين و كنت تقريبا جنبه , المهم مع كسرته رحت كاسر يمين انا كمان افاديه مع فرمله و كلاكس جامد رحت لبست في عربيه راكنه على اليمين و هوه راح عدل نفسه و طلع يجري لما شاف عمل ايه ولا نزل يبص ايه اللي حصل ولا دخل اليمين اللي كان عايز يدخله!
5- مره كنت في التجمع الخامس ماشي 6 الصبح على 90 و مستعجل على شارع التسعيني قبل ميحطوا فيه المطباتو الطريق طالع نازل و انا طالع في مطلع فيه اخره يوتيرن و اوتوبيس مهدي على الاخر على اقصى اليمين ابص الاقيالاوتوبيس راح كاسر شمال على الاخر علشان يلف اليوتيرن مرتاح, من غير اشاره او يشوف ايه وراه واللي ميعرفش التسعيني شارع عرضه 5 حارات البيه راح قفلهم كلهم في مطلع يعني متداري من اللي جي وراه المهم وقفت على الفرامل حرفيا راحت العربيه صرخت جامت و حدفت يمين جامد و كانت حتتقلب او حتلبس في الاوتوبيس بجنبها و هي بتزحف رحت شيلت رجلي من على الفرامل و كاسر يمين و دوست بنزين مع دخلته اليوتيرن كان فتح حاره من ال 5 حارات رحت معدي منها بالعافيه و كان بيني و بينه 5 سم او اقل.
6- كنت ماشي على الدائري بعد الشغل و ماشي على 100 و بيني و بين اللي قدامي بتاع 5 او 6 متر بس و بتكلم في الموبايل المهم راح اللي قدامي مهدي علشان الطريق اتزحم شويه , جيت اهدي بدوس فرامي لقيت مفيش فرامل خالص, راح قلبي وقع في رجلي, رميت الموبايل من ايدي و قعدت اكاريك فرامل بحس ان العجله اليمين ادام بس اللي بتمسك شويه و تسيب الحمدلله العربيه اللي قدامي مشيت تاني و الطريق فتح و اللا كنت لبست لا محاله رحت اديت انتظار و بدأت امسك يمين و اعتقد الناس اللي جنبي خدوا بالهم ان عربيتي مش مظبوطه راحوا هدوا و عدوني اركن لقيت خرطوم الفرامل الامامي شمال مقطوع و مفضي زيت الباكم في الكارتيره .
دا غير الحوادث الصغيره و الاحتكاكات و التصادمات البسيطه و اغلبها ان الشعب المصري معندوش ثقافة احترام الغير بانه يدي اشاره بسيطه انه حيدخل شمال او يمين ينبه بيها اللي ماشي وراه و ياخد باله او يهدي. و برضه سببها عدم الوعي بفكرة الصيانه الدوريه و في حالة وجودها سوء خدمات صيانة السيارات في مصر و جهل و اهمال فنيين الصيانه و عدم ادراكهم انهم بيلعبوا بارواح ناس باهمالهم و استهتارهم.
الحمدلله على كل شيء
المفضلات