صفقه زى المينى كوبر أية رأيكم فى الفكرة دى !!؟
بسم الله الرحمن الرحيم
السلام عليكم و رحمة الله و بركاتة
كنت قاعد على الكافيتريا كالعادة زى العواطلجى لكنى غيرت الكافيتريا المرة دى و قعدت على كافيتريا جمبها معرض عربيات لقيت عربية مينى كوبر داخله كدة لونها أصفر و السقف و الأبواب من فوق من عند الأزاز سودا فأستغربت قولت هوا هيبيع مينى كوبر ولا أية دا بيبيع ماروتى وحاجات عاديه يعنى المهم ركزت فيها كدة و ضربت عينى كدة على الماركة ملقتهاش مينى كوبر قولت يبقى أكيد ليفان الصينى ملقتهاش برضة ليفان قولت ياض أية دة إلى هناك دة
المهم العربيه نفس شكل المينى كوبر بطريقة مستفزة جدا لكنها أطول شوية فقولت بص عليها بصه كدة كانوا لسه بيدخلوها و إلى عجبنى أوى التابلو منور أزرق و الجنوط كانت بصراحه تزغلل العين قولت دى أكيد صينى المهم أستنيت لحد مارفعوها على الرصيف و دخلوها جوة المعرض
و أنا خلصت القهوة و رحت داخل عليهم زى أمين الشرطة كدة لقيت واحد لابس بدله كده و شكله محترم قولت يا سلام دا محترم
قولتله : أية دى
راح بصلها كدة بأستغراب كدة أوى و أبتسم كدة راح قالى دى حضرتك عربيه صينى جديدة
قولتلة : يعنى أسمها أية و ماركتها أية يعنى و كام سى سى و الماتور أية و العفشه أية نظامها و مانيوال ولا أوتوماتيك و قطع غيارها أية
قالى بأبتسامه مستغربة : حضرتك ممكن تيجى بكره و تسأل الأستاذ مش عارف مين كدة عشان دى لسه جايه إنهاردة و أنا معرفش عنها حاجة خالص
قولتله : دى سعرها كام دى يا باشمهندس
قالى : معرفش والله بس اكيد هتكون زى الماروتى فى حدود الأربعين و كمان هيبقى فيه تقسيط ليها
قولتلة : طيب و قطع غيارها
قالى : حضرتك لما تشرفنا بكره هنقولك على كل حاجة عنها و هيبقى لها قطع غيار منتشرة قريب و أنت عارف دايما الجديد كله بيخاف منه بس احنا عمرنا ماشتغلنا فى حاجة الا لما كان فيه قطع غيار ليها و اكيد عربيه زى دى بأمكانياتها هتبقى منتشرة و ممكن تبقى اغلى فى يوم من الأيام
قولتلة : طيب كويس و أية أمكانياتها
قالى : الورق بتاعها جاى بكره حضرتك ممكن تشرفنا و تشوفه
روحت سايبه و ماشى و أنا مبتسم و مستغرب جدا
المهم انا خوفت بقى يا أخوانا من كلمة لما تشرفنا دى وبالأخص أن الماركة دى شكلها أصلا مش معروفه نهائى و شكلهم هما إلى جايبينها ولا أية مش عارف ولا فيه حاجة فعلا شبه المينى كوبر و صينى غير الليفان ؟
يا ترى انتوا أية رأيكم ؟ فيه تلاعب ولا مفيش ؟