عايز مشورتكم في قرار مصيري ليا

سلام عليكم
انا حاليا دماغي هتفرقع من كتر التفكير
انا حاليا طالب في كلية تجارة سنة اولي
انا كنت عايز اخش حاسبات الاول بس قدر الله و ما شاء فعل فرقت معايا علي 1%
بعد مشاورات مع العائلة و الذي منة
وصلت لقرار اني هقدم في كلية خاصة
و الحمد لله الامكانيات المادية متوفرة و مفيش مشاكل
و فعلا قدمت في حاسبات الشروق و اتقبلت و كله تمام
لحد ما فضل الزن علي والدي من بعض المعارف و الذي منه " بصراحة ميتقلش عليهم كدة خالص " و الكلام الي هو " حرام يخش كلية خاصة بالشيء الفلاني و هو مش هيلاقي شغل "
و ان اسمي في الاخر هيبقي خريج معهد عالي مش كلية
و للاسف والدي مشي في التيار و حصلت مشكلة و اتغصب عليا ان اخش كليتي الحالية " تجارة "
و ان ان شاء الله هاخد كورسات في مجال ال it بجانب دراستي
و اني اقدم بعد التخرج في معهد ال iti
بس طبعا لازمة تقدير عام جيد
و رضيت بالامر الواقع فعلا و دخلت تجارة
بس حاليا بعد مرور ترم واحد مش لاقي نفسي في الكلية نهائي
مش طايق اقعد فيها و لا طايق اذاكر اي حاجة فيها بسبب اني مش حابب المجال دة
حتي محاضراتي جت عليا فترة من قرفتي من الكلية مكنتش بنزلها
حتي موضوع التقدير الي كان لازم اجيبة عشان اقدم في ال iti حاسس اني مش هقدر اجيبة لاني مش طايق اذاكر
حاسس اني مش هعدي اصلا التيرم دة
و الكورسات الي كنت محددها لنفسي مش عارف اخدها لاني خلاص حاسس ان كل حاجة اتسدت
حاسس اني اصلا مش هعرف اتخرج من الكلية
حاليا دماغي واقفة مش عارف اعمل ايه ؟
بفكر اعند و مخشش الامتحانات الترم دة
بس برضة لو حولت للي انا عايزة هبقي ضيعت سنة من عمري علي الفاضي
ارجع و اقول بس هبقي ارتحت و خدت المجال الي انا عايزة و فرصتي هتبقي احسن للكارير بتاعي
بجد ياريت المشورة لاني خلاص مش قادر استحمل الكلية الي انا فيها

يا استاذ انت لو الموضوع عند انت كده بتعاند نفسك
ركز شويه في دراستك وربنا معاك وتحقق الانت عاوزه لاكن انك تعيد سنه صدقني مش حلوه حتي لنفسك انت ربنا معاك

انا كان نفسي بعد الاعداديه اخش صنايع سيارات بس كانت الوقفه جايه من الحاجه ولدى قالي اعمل الانت عاوزه دى وفي الاخر دخلت ثانوى عام وفشلت فشل زريع ودخلت معهد سنتين
وخلصت المعهد واتخرجت واشتغلت في مكتب محاسب قانوني كان صاحب فضل عليا ياريت تركز في مذكراتك احسن وانت اهو حتاخد الكورس الانت عاوزه جنب الدراسه وربنا معاك ويؤفقك

اولا حاول تنجح وتعدي
ثانيا حول للمجال اللي انت عاوزه

عادي يا مان أنا كانت دماغي في كهربة باور دخلت مدني يعني حاجه تانية خالص بس هقول إيه متعرفش الخير فين

انت ممكن تستعوض ربنا فى السنة دى و ترجع تقدم فى حاسبات الشروق
علشان الموضوع ده حصل مع واحد قريبى و قعد فى الكلية 8سنين و لسه مخلصش

وبالنسبة للوالد حاول تقنعه انك مش قادر تكمل و نفسيتك تعبت و توضحله انك ممكن متعرفش تكمل فى الكلية و ممكن تتفصل منهاوفى الحالة دى هتلاقيه هو الى بيقولك روح كلية خاصة بس هيكون بعد ما فات الاوان و ضيعت كام سنة من عمرك

وبالنسبة للشغل دى حاجة بتاعة ربنا

عزت سيبك من حوار سنه من عمرك ولا الكلام ده

انا قدامك مثال طار تلات سنين من عمري اهوه وبدون اي فايده

لو رسيت علي سنه واحده بس حاسس نفسك السنه دي هتغير بيها منحني حياتك

يبقي السنه دي قدام عمرك ولا حاجه

كلم والدك وقوله انا وافقتك يا حاجه علي رايك بس انا مش حاسس اني همشي في الكليه

وروح للمكان الي انتا حابه هوا اولي بيك

وطالما حابب حاجه هتتفوق فيها احسن ما تدخل حاجه مش علي مزاجك وتضيع فيها ويادوب تبقي بتعدي بمقابيل

ده راي من واحد المفروض كان اتخرج من سنتين ولسا في سنه تانيه بسبب دكتور ربنا ما يكسبه ولا يوعد حد يشوف الي انا شايفه

A.Yakout

للاسف التجارة بقيوا كتير جدا انت لو دخلت it افضل مليار مرة عن تجربة

وسيبك من اللي بيقول ان العملية محصلة بعضها وكله مش لاقي شغل ... للاسف اللي ملهمش فيها بيقولوا اي حاجة انت لو it بكل سهولة بتلاقي شغل محترم جدا وفي شركات محترمة جدا جدا

بس الشركات دي بيهمها في المقام الاول انك تكون خريج it مينفعش كورسات لانهم مش عاوزين حد خبرة وخلاص لا عاوزين حد معاه مؤهل فني جامعي في مجال الشبكات او الحاسبات

عندك الجامعة البريطانية طالبة والجامعة الالمانية شركة المطارات المصرية ... وغيرها وغيرها

نصيحتي اوعى تغلط غلطة عمرك وتكمل تجارة .... انا وقعت في غلطتك دي وسمعت كلام العيلة وان لو عاوز مجال معين خد كورسات حرة ومش عارف ايه وطلع كله كلام للاسف وفي الواقع لقيت الفرصة قدامي بس بتروح لان مؤهلي غير مطابق لشروط الوظيفة

لدرجة اني كنت خلاص همضي العقد في احد الشركات ونجحت في جميع المقابلات والامتحانات والذي منه وفي الاخر اتقطع العقد لان الجهاز المركزي للمحاسبات مطلع قرارات ان كل وظيفة لابد ان يكون لدى شاغلها المؤهل العلمي اللي مناسب ليها ولذلك التعيين وقف لانهم علطول بيعملوا متابعة للتاكد من الموضوع ده

فخلي بالك من ان معظم الاماكن المحترمة لازم مؤهل جامعي في المجال ومش بيخدوا بالكورسات او المنح حتى لو ماخد اعلى الكورسات والخبرة ملهاش اي قيمة بدون مؤهل في المجال

اثبت على موقفك سنة مش مهمة بدل ما تندم طول عمرك ... كلم باباك كراجل لراجل وحاول تفهمه وجهة نظرك بس باحترام كامل مش باسلوب فيه استفزاز وضغط وممكن توسط خالك عمك عمتك اي حد ممكن يكلم ولدك وولدتك ويقنعهم .... وان شاء الله تحقق اللي في بالك

انا حصلي كده بس مش زيك اوي
جبت مجموع زباله ( 80 % ) و كان نفسي اخش كليه معينه ( تجاره ) و مجموعي يجبيها بس والدي دخلني كليه تانيه ( كليه اداره اعمال ) عافيه و كنت كاره الكليه دي زيك بس مفكرتش احول عشان مضيعش سنه من عمري فعملت كذا حاجه :

1- اندمجت مع الشباب جد جدا و مع البنات برضه
2- طنشت المحاضرات تماما الا المحاضرات المهمه
3- حضرت السكاشن كلها في ما عدا السكاشن اللي ملهاش لزمه
4- قضيت السنه رحلات و خروجات و كورسات
5- قعدت اذاكر قبل الامتحانات ب 10 تيام

و في النهايه عديت ال 4 سنين علي خير بدون ملحق واحد و جبت مجموع جيد مرتفع و عديت الحمد لله

و يعدين انت في تجاره يعني خيره ....* بلدنا فيها و فيها شباب زي الفل و الله لو عملت زيي هتستمتع بال 4 سنين و هتجيب المجموع اللي نفسك فيه و تعيش حياتك بعد كده

طبعا متتنازلش عن انك تدرس في التخصص اللي انت عايزة حتي لو وصلت انك تقولة هنزل اشتغل وادفع اللي اقدر علية من المصاريف أو حتي قولة هقسطهملك .. بايخة انا عارف بس المهم توصل لوالدك انك مستعد تعمل أي حاجة في سبيل انك تدرس التخصص اللي انت عايزة

ولو كملت في تجارة واشتغلت في الit في فرص كتير جدا هتبقي ضايعة منك بسبب ان المؤهل في مجال تاني غير شغلك

مش مهم السنة اللي ضاعت المهم باقي مستقبلك ، ربنا يوفقك

طب انت لية نزلت لتجارة
طب ما كان قدامك انك تدخل علوم
اهي كلية حكومية
وفيها بردة قسم علوم الحاسب ومتفرقش عن حاسبات ولا هندسة الحاسب
انا بردة كنت عايز ادخل حاسبات بس بردة وقفت معايا علي حاجة بسيطة
ودخلت علوم وقسم جميل وحلو وهتقدر تكمل تخصصك بردة

ادرس اللي بتحبه ولاقي نفسك فيه
ايه يعني سنة هتضيع
اعتبر نفسك دخلت المدرسة كبير سنة
مهو ممكن تخرج من تجارة وتقعد سنة واتنين مش لاقي شغل

معلش انا راى مخالف لاراء الناس التانية
انت ليه عايز تبقى اى تى؟ وايه الفرق بالنسبة لك وبين تجارة؟
مانت مدرستش ده ولا ده
لو بتحب الاى تى كمل فى تجارة واتعلم اى تى ومع احترامى لاراء الزملاء لكن نسبة كبيرة من الاى تى بيبقوا خريجين كليات تانية
وبعدين انت فاكر يعنى لو دخلت المعهد حتخرج خبير فى الاى تى؟

والاى تى اى مش نهاية المطاف خليك مرن وحط احتمالات كتيرة

ورغم ان راى حيزعل ناس كتيرة

لكن بكالوريوس تجارة افضل من معهد

اقتباس:

---

المشاركة الأصلية كتبت بواسطة mero_love

طب انت لية نزلت لتجارة
طب ما كان قدامك انك تدخل علوم
اهي كلية حكومية
وفيها بردة قسم علوم الحاسب ومتفرقش عن حاسبات ولا هندسة الحاسب
انا بردة كنت عايز ادخل حاسبات بس بردة وقفت معايا علي حاجة بسيطة
ودخلت علوم وقسم جميل وحلو وهتقدر تكمل تخصصك بردة

---

لا علي حظنا الهباب كان الي علمي رياضة مالوش في كلية العلوم الا قسم رياضة فقط

اقتباس:

---

المشاركة الأصلية كتبت بواسطة ahmed4000

معلش انا راى مخالف لاراء الناس التانية
انت ليه عايز تبقى اى تى؟ وايه الفرق بالنسبة لك وبين تجارة؟
مانت مدرستش ده ولا ده
لو بتحب الاى تى كمل فى تجارة واتعلم اى تى ومع احترامى لاراء الزملاء لكن نسبة كبيرة من الاى تى بيبقوا خريجين كليات تانية
وبعدين انت فاكر يعنى لو دخلت المعهد حتخرج خبير فى الاى تى؟

والاى تى اى مش نهاية المطاف خليك مرن وحط احتمالات كتيرة

ورغم ان راى حيزعل ناس كتيرة

لكن بكالوريوس تجارة افضل من معهد

---

حضرتك هي مش مشكلة افضل و مش افضل
هي عبارة عن انك حابب انهي مجال و تقدر تادي في اي مجال
انا ممكن اكمل في تجارة و اجي علي نفسي
و هتخرج و هيجيلي شغل في مكان محترم
بس ليه اخد شغل انا مش هبقي حبة ؟
ليه اخنق علي نفسي بقيت عمري و ابقي رايح شغلي تحصيل حاصل في حين اني ممكن في مجال تاني ابقي creative
اتمني انك تكون فهمت وجه نظري

ان شاء النهاردة هتكلم مع والدي باليل و احاول اوصل معاه لحل

بص من الاخر
حتى لو دخلت الكلية اللى كنت بتحلم بيها وبتحب مجالها ماكنتش هتلاقى نفسك فيها

انا قدامك اهو بحب برضه الكمبيوتر والاي تى
ودخلت هندسة الكترونية والسنة دى بقيت قسم حاسبات
والله حاجة تقرف
الكليات اصلا كلها عقيمة ولو بتحب حاجة هتخليك تكرهها

فاصبر شوية وكلها اربع سنين وبعد كدة عيش حياتك بعيد عن شهادتك واي حاجة وانت كنت بتفكر صح انت تدخل اي تى اي وتاخد كورسات وتبقى تمام

انما الكلية ماكنتش هتديك حاجة وده عن تجربة

اقتباس:

---

المشاركة الأصلية كتبت بواسطة ezzat-fayek

حضرتك هي مش مشكلة افضل و مش افضل
هي عبارة عن انك حابب انهي مجال و تقدر تادي في اي مجال
انا ممكن اكمل في تجارة و اجي علي نفسي
و هتخرج و هيجيلي شغل في مكان محترم
بس ليه اخد شغل انا مش هبقي حبة ؟
ليه اخنق علي نفسي بقيت عمري و ابقي رايح شغلي تحصيل حاصل في حين اني ممكن في مجال تاني ابقي creative
اتمني انك تكون فهمت وجه نظري

---

مهو ده كان سؤالى بالظبط
ليه بتحب مجال الاى تى؟ هل درسته؟ هل جربت تشتغله؟ اكيد لا
طيب ليه بتقول انا نفسي ابقى اى تى
يعنى طبيعى نسمع نفسي ابقى ظابط ابقى دكتور لكن ابقى اى تى جت على اساس ايه
وده حيوصلنا لنقطة ان ليه انت عندك انطباع ان شغل الاى تى حيبقى حاجة جميلة اوى وبالتالى تضحى بسنة من عمرك وتتنقل لمعهد بدل الكلية علشان توصله؟

بص أنا هقولك نصيحة من واقع شغلى فى مجال ال IT بقالى حوالى 8 سنين دلوقتى و من قبل ما اتخرج كمان.. و انا متخيل تماما انت ازاى بتبص لمجال ال IT و مجال المحاسب.

معظم الناس اللى شغالة فى مجال ال IT دراستهم الأكاديمية ملهاش علاقة بال IT لكن خدوا كورسات و تفوقوا فيها و بذلوا مجهود لحد ما حصلوا على وظيفة كويسة و بمرتبات عالية جدا .. و أنا أعرف ناس كتير جدا كدة .. لكن ده ميمنعش ان الدراسة الاكاديمية نقطة فى صالح اللى بيشتغل فى المجال ده.

بس هقولك على حاجة لما بتبص لمجال ال IT من بره هتلاقية فعلا ممتع و لذيذ .. عشان الكمبيوتر مجال جديد و كده و الناس شايفه انه سهل و لذيذ .. لكن لو فكرت انك تدرسه هتدخل فى حاجات مش سهلة و لذيذة زى مانت متخيل و محتاجة تركيز و مذاكرة و سهر بجد .. ده لو انت عاوز تتميز فعلا فى المجال مش مجرد تنزل ويندوز و أوفيس و برامج (مع احترامى للمجال ده).

حاجة كمان كونك فى كلية ده أحسن من معهد أو حاجة مساوية للمعهد .. و دايما الشركات بتفضل خريج الكلية عن خريج المعهد .. حتى لو كان أقرب للتخصص.

كمان انت ممكن تدرس تجارة و بعدين تشتغل حاجه لها علاقة بالتجارة و ال IT حاجه ليها علاقة بالبيزنس مثلا زى أوراكل و كده و متتخيلش دراستك للتجارة هتفيدك أد ايه.

أخيرا مهما كان قرارك أو مهما كان المجال اللى هتدرسه .. ركز أوى فى اللى انت دخلته .. ومتفكرش فى حاجه تانيه .. الا فى الأجازة أو فى وقت الفراغ .. بكده هتوصل للى انت عاوزة و أكتر كمان و افتكر الكلمتين دول:

• ليس علينا أن نتطلع الى أحلام تلوح لنا باهتة فى الأفق و لكن علينا أن ننجز ما بين ايدينا من عمل واضح بين.
• Start by doing the necessary, then the possible, and suddenly you'll find yourself doing the impossible.

و ربنا يوفقك لما فيه الخير

والله يا احمد انا كنت زيك كدة وكان نفسى اخش سياحة وفنادق قسم ارشاد سياحى
بس فرقت معايا على 0.2 او 3.0 تقربيا المهم
انا كان اخر امل فى حياتى انى اخش كلية تجارة بس مجموعى جاب كدة
وعلى فكرة رحت ساعتها عملت تصحيح فى سنة 2 وطلعلى اكتر من 2 درجتين فى الفرنساوى بس مختش غير درجة واحدة وفى 3 مردتش اروح
وحسيت ان تجارة دى قدرى
فا قعدت مع جوز خالتى قالى انا كمان دخلت الكلية دى مجموع (علية مبختة احنا)
المهم قالى انت دحلت حاجة مش بتحبها بس بقت قدرت خلاص
دى شهاتك بس قالى طالما داخلت فى حاجة ومتعلقة بمستقبلك فلازم تتفوق وتتميز فيها
وهوا على فكرة كان المفروض كان يتعين معيد بس انتوااا عارفينن شغل الوسايط
والكلام دة بس بعد كدة فى المجال او المكان الى هوا شغال فية دلوقتى
كلة يعرف مين هوا (احمد رافت ) بيقولى انا عايزك تبئى زى عايز الناس لما تشوفك تشاور عليك
(مش تفاخر منة بس حقة انا كنت بشوفة بيقعد يزاكر واهواا كبير كدة بال 7 وال8 ساعات )

اقتباس:

---

المشاركة الأصلية كتبت بواسطة kareemhamed

حاجة كمان كونك فى كلية ده أحسن من معهد أو حاجة مساوية للمعهد .. و دايما الشركات بتفضل خريج الكلية عن خريج المعهد .. حتى لو كان أقرب للتخصص.

كمان انت ممكن تدرس تجارة و بعدين تشتغل حاجه لها علاقة بالتجارة و ال it حاجه ليها علاقة بالبيزنس مثلا زى أوراكل و كده و متتخيلش دراستك للتجارة هتفيدك أد ايه.

---

الكلام ده مهم جدا جدا ومن واقع الحياة

لازم تذاكر ولازم تنجح...لانك لو لا قدر الله سقطت انت لوحدك اللى حتشيل...وحتبقى متأخر فى الدراسة وصدقنى دا اسوأ احساس ممكن تحس بيه وانت فى الكلية....

معلش مع احترامي الشديد, هي الشركات الكبيرة و الفرص اللقطة في مجال الIT حيسيبوا خريجي هندسة و حاسبات و معلومات و ياخدوا خريج المعهد؟؟ خد بالك ان دلوقتي مفيش أكتر من المعاهد بتاعت ال IT. و في الأخر الشغل ده رزق من عند ربنا سواء في ال IT او التجارة.

و بعدين انا عايزاك تفرق بين حاجتين مهمين, بين انك حابب تشتغل في مجال معين و بين انك تحب دراسته. يعني اتحدى ان 90% من الناس اللي في كليات القمة مثلا مش طايقين الدراسة مع انهم غالبا داخلينها بارادتهم. و مش بس عشان كليات صعبة لأ, لو بصيت على أي كلية حتلاقي الناس بتشتكي و طلعان عينها. اللي أقصده انك متحطش في بالك انك في كلية مش عايزها و مش طايق تذاكر و الكلام الفارغ ده. بالعكس ذاكر و انجح وتفوق كمان.بص لكليتك على انها طريق لازم تعدي منه عشان تبتدي تبني مستقبلك بالشكل اللي بتحلم بيه, مش مهم تكون بتحبها المهم تجتهد فيها. أعتبر نفسك لسة في ثانوية عامة, يعني انت في ثانوي كنت بتحب كل المواد؟؟ أكيد لأ بس كنت عارف انك لازم تذاكر و تنجح.

و ابتدي دور على كورسات في المجال اللي انت عايزه في ال IT, و حاول دايما انها تكون حاجة Certified عشان تبقى ليها قيمة في المستقبل. و حاول كمان يبقى هدفك بعد ما تخلص انك تعمل دبلومة في ال AUC أو ال GUC في ال IT و دي ممكن تبقى بتعملها و انت بتشتغل لو ربنا رزقك بشغل بعد التخرج ان شاء الله. ابتدي خطط و ارسم عايز تعمل ايه في مستقبلك و اسعى انك تنفذ اللي بتحلم بيه ده. و لازم تبقى فاهم ان مفيش حاجة بتيجي سهلة و بسيطة لازم الواحد يتعب و يكافح عشان اللي بيتمناه. مش كل حاجة الواحد بيعملها لازم يكون بيحبها و مستمتع بيها. مش معنى كدة ان الواحد يكون تعيس, لأ الواحد لازم يركزفي كل مرحلة في حياته على الجانب الحلو. يعني الجامعة دي انطلاق و حرية و مفيهاش هموم. عيش اليومين بتوع الكلية و انت مستمتع بيهم و متشغلش بالك بحكاية حاببها ولا لأ دي. و ان شاء الله ربنا يوفقك و تحقق كل اللي بتتمناه في حياتك.

اقتباس:

---

المشاركة الأصلية كتبت بواسطة kareemhamed

بص أنا هقولك نصيحة من واقع شغلى فى مجال ال IT بقالى حوالى 8 سنين دلوقتى و من قبل ما اتخرج كمان.. و انا متخيل تماما انت ازاى بتبص لمجال ال IT و مجال المحاسب.

معظم الناس اللى شغالة فى مجال ال IT دراستهم الأكاديمية ملهاش علاقة بال IT لكن خدوا كورسات و تفوقوا فيها و بذلوا مجهود لحد ما حصلوا على وظيفة كويسة و بمرتبات عالية جدا .. و أنا أعرف ناس كتير جدا كدة .. لكن ده ميمنعش ان الدراسة الاكاديمية نقطة فى صالح اللى بيشتغل فى المجال ده.

بس هقولك على حاجة لما بتبص لمجال ال IT من بره هتلاقية فعلا ممتع و لذيذ .. عشان الكمبيوتر مجال جديد و كده و الناس شايفه انه سهل و لذيذ .. لكن لو فكرت انك تدرسه هتدخل فى حاجات مش سهلة و لذيذة زى مانت متخيل و محتاجة تركيز و مذاكرة و سهر بجد .. ده لو انت عاوز تتميز فعلا فى المجال مش مجرد تنزل ويندوز و أوفيس و برامج (مع احترامى للمجال ده).

حاجة كمان كونك فى كلية ده أحسن من معهد أو حاجة مساوية للمعهد .. و دايما الشركات بتفضل خريج الكلية عن خريج المعهد .. حتى لو كان أقرب للتخصص.

كمان انت ممكن تدرس تجارة و بعدين تشتغل حاجه لها علاقة بالتجارة و ال IT حاجه ليها علاقة بالبيزنس مثلا زى أوراكل و كده و متتخيلش دراستك للتجارة هتفيدك أد ايه.

أخيرا مهما كان قرارك أو مهما كان المجال اللى هتدرسه .. ركز أوى فى اللى انت دخلته .. ومتفكرش فى حاجه تانيه .. الا فى الأجازة أو فى وقت الفراغ .. بكده هتوصل للى انت عاوزة و أكتر كمان و افتكر الكلمتين دول:

• ليس علينا أن نتطلع الى أحلام تلوح لنا باهتة فى الأفق و لكن علينا أن ننجز ما بين ايدينا من عمل واضح بين.
• Start by doing the necessary, then the possible, and suddenly you'll find yourself doing the impossible.

و ربنا يوفقك لما فيه الخير

---

+1
و أنا موافق بشدة على الكلام اللي تحته خط
دلوقتي اصبح في زي تداخل بين الـIT و البيزنس
خلص تجارة (زيي كدا) و بعدين ادرس كورسات لها علاقة بالبيزنس.. زي ORACLE e-business
طبعاً مجالاته كتير:
financial-HR-Purchasing/Inventory, etc

و بالتوفيق

بص ياباشا انت بتفكرني بنفسي بالظبط...
أنا خريج معهد خدمة اجتماعية .... دخلت المعهد غصب عني زيك كده بمجموع زي الزفت ، وأنا كان نفسي أخش Computer Science ووالدي كان مستريح لكن ما تفهمش الظروف أجبرتني إني أدخل المعهد المنيل بنيلة ده. المهم ، دخلت المعهد وأنا كارهه كره العمى ومش عايز اعرف ناس وبحضر وانا مش طايق نفسي ، إلخ. لكن بفضل الله ماستسلمتش للواقع وابتديت أتعلم حاجة جديدة في الكمبيوتر. ربنا وفقني لتعلم البرمجة من خلال كتاب مدرسة بتاع اعدادي.
هي دي كانت البداية بتاعتي من خلال الكتاب الصغير ده ، وبعد كده اشتريت كتاب تاني أكبر منه شوية واتعلمت ، وبعد كده رحت اخد كورس ، طلع كورس أي كلام وسيبته ، وبعدها الحمدلله ماستسلمتش برضه.
بعدها قلت جوايا أنا مش هتعلم برمجة صح إلا من خلال كتب أجنبية وعلشان أتعلم من كتب أجنبية لازم أتعلم لغة الأول.
رحت أتعلم لغة في مركز كده وربنا وقعني في أساتذة ربنا يبارك فيهم يارب حطوني على الخطوات الأولى ووروني الطريق ازاي وكملت مع نفسي في البيت نزلت كتب وملفات mp3 واديت لنفسي كورس انجليزي في البيت :wink:.
بعد كده اشتريت كتاب برمجة (كبير المرة دي) واتعلمت منه. وأخيرا اتخرجت من المعهد النيلة ده واشتغلت مبرمج بفضل الله أولا وأخيرا.

الخلاصة: اصنع نفسك بنفسك ولا تدع الحياة هي التي تصنعك.

وبالتوفيق إن شاء الله.

أخى اعمل الحاجة اللى انت مقتنع بيها ولو سنة راحت مش مشكلة المهم ما يبقوا سنتان او ثلاث
رأى اتوكل على الله واستخير ربنا وادخل امتحان الترم الثانى وشوف النتيجة لو تمام كمل لو مش تمام حول من الكلية

ان فى حاسبات ونظم مجموعى فى السنوى مجبهاش فدخاتها خاص
انا بحب حاجه اسمها كمبيوتر وميكانيكه بس كنت متاكيد انى مشحجيب مجموع هندست ميكانيك فدخات تانى مجال بحبه والى يقولك ان حاسبات ونظم او علوم ملهمش شغل اوله روح بص على كميت الى مطلوبين فى اعلانات الوظاءف زمان كانو بيخدو خريجين التجاره عشان مكنش فى كمبيوتر لكن دلوقتى بيخدو تخصص حاسبات ونظم لان طبيعت درسته بيدرس مواد التجاره ومعاها مواد علوم فبيطلع احسن من الاتنين وده مطلوب دلوقتى بكثره
تانى حاجه شهادت المعاهد العليه متعدله من المجلس الاعلى للتعليم العالى يعنى شهادت اكديميت الشروق لم حتخدها حتبقه متعدله من جمعت عين شمس وروح اتاكد من شءون الطلبه او من وظارت التعليم العالى
تالت حاجه ودى نصيحه شخصيه .... ان من سكان مدينت الشروق واكديميت الشروق لمت لمه وحشه اوى اوى اوى وبقا معظمها ديلارات وخنقات بسلاح لو عاوز حاجه زيها تنبصط فيها فى اكاديميه جمب اكوا بارك دى زيها بظبط بس انضف ولو عاوز اى استفسار تانى برجاء مراسلتى على الخاص

اقتباس:

---

وظارت التعليم العالى

---

:L_bhuhhh[1]::36_1_35[2]:

اقتباس:

---

المشاركة الأصلية كتبت بواسطة M.Osman

اقتباس:

---

وظارت التعليم العالى

---

:L_bhuhhh[1]::36_1_35[2]:

---

يعني شوفت دي ومشوفتش دي

اقتباس:

---

مشحجيب مجموع هندست ميكانيك

---

ودي

اقتباس:

---

كميت الى مطلوبين فى اعلانات الوظاءف

---

ودي

اقتباس:

---

شهادت اكديميت الشروق

---

ودي

اقتباس:

---

شءون الطلبه

---

ودي كمان

اقتباس:

---

مدينت الشروق واكديميت الشروق

---

كل ده ماخدتش بالك منه ...؟؟؟؟.. !!!

ومعلقتش غير علي دي بس؟؟؟

A.Yakout

اقتباس:

---

المشاركة الأصلية كتبت بواسطة nabaster

كل ده ماخدتش بالك منه ...؟؟؟؟.. !!!

ومعلقتش غير علي دي بس؟؟؟

a.yakout

---

ههههههههههه

أ/ أحمد ياقوت
حضرتك متابعني... انا فعلاً اخدت بالي من دا كله ... بس اللي لفت نظري كلمة وظارت+تعليم عالي ..جنب بعض كدا شكلهم يفرح !!

و الله هم يبكي و يضحك فعلاً !!
:b4_556:

شوف انت عاوز الكارير بتاعك ازاى ، انت الأول تجارة ايه؟ لو انجلش أو تجارة خارجية يبقى أفضل بكتير طبعاً عدد أقل وهتبقى مطلوب فى أماكن نضيفة ولو حبيت تعمل دراسات عليا فى الجامعة الأمريكية مش هتقول لأ ، إنما لو تجارة عربى يبقى كبر دماغك.

عامة يعنى مش تفتكر مثلاً حاسبات ومعلومات دى اللى خلاص ! التعليم فى مصر أصلاً كله محصل بعضه ، روح أى كلية حاسبات هتلاقى دفعة التخرج نسبة فوق ال 40% مبيعرفوش يكتبوا سطر كود! انت متخيل؟ ، العملية التعليمية كلها بظرميت من الآخر ، لأنك فى الآخر بتدفع 300 جنيه فى السنة فبتاخد تعليم على قد ما بتدفع.

حاجة كمان مش عشان انت بتحب الكومبيوتر والانترنت يبقى هتلاقى فى حاسبات الدنيا وردى! لا دة انت هيطلع روحك من ديجيتال ديزاين لألجوريزمز لجرافيكس لالكترونيكس .. الخ يعنى هتلاقى من ال 10 كورسات اللى بتاخدهم فى السنة مثلا كورسين تلاتة بيعلموك لغة برمجة جديدة ، وطبعاً لأن العملية بظرميت فانت مش بتتعلم برضه بتاخد اساسيات وكلام فارغ لا يمت للواقع العملى بصلة.

طبعاً فيه استثناء للمتفوقين انا مش هتكلم عنهم ، الأغلبية أو الواقع العام هو اللى بتكلم فيه.

فى النهاية ظروفك انت اللى تحكم ، بناء على الكارير اللى انت راسمه لنفسك ، مش مهم سنة تضيع أحسن من انك تضيع باقى عمرك فى حاجة مش ليك! أنا أعرف واحد خريج هندسة بترول قعد 5 سنين واتخرج مهندس بعدين دلوقتى بيشتغل SAP Consultant ، لما سألته قالى انت سن التقاعد 60 سنة ، يعنى 60/5 فيهم ال 12 ، يعنى المدة اللى قضتها فى الكلية = 1/12 من عمرك ، مش أحسن انك تضيع ال 11/12 الباقيين فى حاجة انت بتحبها؟.

البيزنس على فكرة حلو جداً ولو انت دماغك فيه هتجيب فلوس بالهبل ، لأن الفلوس الكتير مش بتيجى غير بالبزنس ، انما لو طموحك IT وحابب المجال أوى يبقى حول من غير تفكير.

Wages get you by, but profits grow a fortune!

وبالتوفيق.

اولا لازم تعرف ان 80% من اللي في كليه تجاره داخلنها غصب عنهم

ثانيا انا كمان حصلي نفس الموقف و كان نفسي ادخل حربيه جدااااااااااااااا او هندسه ميكانيكا سيارات و دخلت تجاره في الاخر

ثالثا رأيي الشخصي خليك في الكليه لانها الكليه الوحيده اللي ممكن تشتغل منها اي حاجه يعني لو نفسك تشتغل اي تي متقلقش انت في كليه تجاره يعني ممكن تشتغل اللي انت عايزه

رابعا لازم تاخد بالك من الايه دي {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة: 216]}

اقتباس:

---

المشاركة الأصلية كتبت بواسطة ahmed4000

مهو ده كان سؤالى بالظبط
ليه بتحب مجال الاى تى؟ هل درسته؟ هل جربت تشتغله؟ اكيد لا
طيب ليه بتقول انا نفسي ابقى اى تى
يعنى طبيعى نسمع نفسي ابقى ظابط ابقى دكتور لكن ابقى اى تى جت على اساس ايه
وده حيوصلنا لنقطة ان ليه انت عندك انطباع ان شغل الاى تى حيبقى حاجة جميلة اوى وبالتالى تضحى بسنة من عمرك وتتنقل لمعهد بدل الكلية علشان توصله؟

---

لا حضرتك
انا قعدت فترة بدرس IT مع نفسي يعني Self study
و بتابع دورات بتنزل ع النت
يعني الموضوع مش جي من فراغ

اقتباس:

---

المشاركة الأصلية كتبت بواسطة m.osman

+1
و أنا موافق بشدة على الكلام اللي تحته خط
دلوقتي اصبح في زي تداخل بين الـit و البيزنس
خلص تجارة (زيي كدا) و بعدين ادرس كورسات لها علاقة بالبيزنس.. زي oracle e-business
طبعاً مجالاته كتير:
Financial-hr-purchasing/inventory, etc

و بالتوفيق

---

ممكن معلومات اكتر عن المجالات دي و كورساتها

دلوقتي يا شباب الردود متنوعة ما بين اني افضل في كليتي
و ما بين اني احول الي انا عايزة
و في ناس بتقول ان شهادة المعاهد و الاكاديميات غير معترف بيها في سوق العمل
و ناس بتقول اني لو خدت كورسات برضة فرصتي ضعيفة جدااا في سوق العمل و ناس بتقول العكس ؟
انا لسة دماغي لفت اكتر ما بين الاراء
يا ريت لو معلومات موكدة من الي في سوق العمل

اقتباس:

---

المشاركة الأصلية كتبت بواسطة ezzat-fayek

ممكن معلومات اكتر عن المجالات دي و كورساتها

---

اما اشوفك فى الكلية ها عرفك وخليك كمان تعرف كل حاجة عنها من عندنا فى الكلية تبع غرفة التجارة الامريكية كمان

اقتباس:

---

المشاركة الأصلية كتبت بواسطة mgazaly

اما اشوفك فى الكلية ها عرفك وخليك كمان تعرف كل حاجة عنها من عندنا فى الكلية تبع غرفة التجارة الامريكية كمان

---

نازل امتي طيب يا معلم
انا حدد وقت و اجيلك

اقتباس:

---

المشاركة الأصلية كتبت بواسطة ezzat-fayek

نازل امتي طيب يا معلم
انا حدد وقت و اجيلك

---

انا نازل بكرة يا برنس ولو انت شم نازل بكرة يبئى يوم الاحد اليوم الرسمى بتاعنا