السلطه العادله سبب فى التزام الجميع ,, ده فى استراليا مش مصر !!
موقف بيحصل عشرات الالاف المرات يوميا فى شوارع المحروسه , سواء كان فى حاره 3 متر قصاد كوافير عزيز يوم حنه مدحت على صفاء , او كان قصاد استوديو رمضان العسكرى فى شارع رئيسى يوم خطوبه عماد على صفاء , او حتى قصاد مركز شباب الامل يوم فرح ابراهيم على صفاء
او مش دايما افراح ,, ممكن قصاد مكتب عم حلمى المأذون بعد خناقه كبيره على اثرها مصطفى اخو صفاء اخد اخته وطلع امريكانى بالعربيه علشان يعرف اللى واقفين انه ولا فارق معاه طلاقها من حسين جارهم
ويمتد الموضوع لأستعراض لابد منه فى طلعه كل اشاره علشان كل الناس تعرف ان العربيه دى خلفى , او قصاد باب مدرسه الثانوى التجارى علشان يلفت نظر البنات او اعتراضا على حاله الزحام بزمجره موتور يتبعها برده طلعه امريكانى مش عارف هيروح بيها فين بصراحه !! , او اخيرا بدون اى سبب فى اى حته فى الشارع فى اى وقت
كلها تعبيرات وانفعالات السواقين فى مصر من ذوى القدره على النط فجأه من على دواسه الدبرياج بيوصلوها لنا فى صوت صريخ العجل والدخان الابيض على مرأى ومسمع من رجال الشرطه والقانون بدون اى تصرف او تدخل , وان حصل وكان فى ظابط خدته العزه وكرامه المهنه على استيقاف السائق المخالف لن يتعدى الامر حدود مخالفه قياده برعونه او ان الموضوع يعدى فى سكه سليمان مرسى سليمان رجل الاعمال الشهير ووسايطه اللى فى كل مكان
الموضوع ده انا عملته تحديدا علشان موقف قد يكون شوفناه الف مره بس المره دى يخص عالم السيارات أوى وعجبنى قوى قوى قوى
لويس هاميلتون بطل العالم للفورميلا 1 عام 2008 وسائق فريق مرسيدس - ماكلارين اللى يعتبر تانى اكبر فريق فى عالم الفورميلا اتمسك فى استراليا من كام يوم بشكل مهين جدا من الشرطه واتعرض لموال كبير اثر حركه اى حد فينا اكيد عملها ولو مره فى حياته قصاد رجال الشرطه ولم تلقى منهم اى رد فعل
لويس كان فى استراليا علشان السباق واثناء تجوله فى الشوارع بعربيته ال C63 AMG بالبلدى فصّل بالعربيه وطلع امريكانى , بس لا اكتر ولا اقل
طبعا فى مصر كان سياده اللواء هيسقف له , هناك تم ايقافه وحجز العربيه وتغريمه غرامه كبيره جدا لم يعلن عنها حتى الان ( على حد معلوماتى ) واتقبض عليه بشكل يعتبر مهين جدا لشهرته ومكانته كأحد افضل السواقين فى العالم واحد اهم مشاهير عالم الرياضه مع انه لو نزلناه يعمل استعراضات بأتوبيس رحلات فى ميدان لبنان يوم الاحد صباحا هكون واثق انه مش هيرمى على حد ولا يقرب منه ولا يعرض حد للخطر
طبعا الاخ لويس اتعرض لتعليقات واعتراضات كتير جدا على تصرفه الطفولى والغير مسؤول وتعريضه حياه الابرياء للخطر
فنصيحه يعنى لو حد منكم رايح استراليا العب بالعربيه فى باركنج المطار هنا كتير علشان ميبقاش عندك اى طاقه تطلعها هناك لحسن الناس دى واضح ان عندهم حاجه اسمها عداله ولسه محصول الكوسه البلدى موصلش عندهم
ده فيديو تم تسجيله وهو بيتقبض عليه
YouTube - Hamilton 'caught hoon driving'
تعليقاتكم بقا :36_1_35[2]:
