المشاركة الأصلية كتبت بواسطة Khaled_Al_Nowaihy
يا جماعة لازم برضه نحترم اللغة القومية بتاعتنا ونغير عليها
انا قرأت كثير جدا جدا عن تجارب مصريين سافروا فى الخارج وكانوا مابيعرفوش يتكلموا غير انجليزى فقط، وكانوا لما يكلموا أى حد من اهالى البلاد اللى بيزوروها بالانجليزى كان رد فعل أهالى البلاد دى محرج جدا للمصريين.
عن نفسى تعرضت للمشكلة دى مرتين فى ايطاليا وفى فرنسا
وحسيت بمدى احترامهم وتعصبهم والغيرة على لغتهم الأم.
وفاكر مرة قابلت 2 جزائريين مقيمين فى امريكا وكنا قاعدين ندردش فى احوال بلادنا وبلادهم ... وحدث ان الاخوة الجزائريين اختلفوا مع بعض فى النقاش على نقطة معينة ,,,, قام واحد منهم قال للتانى (ابقى روح علم ولادك عربى الأول وتعالى اتكلم معانا)
لاتتخيلوا مدى الخجل والحزن اللى اصابوا الرجل التانى من الكلمة دى.
الخلاصة يا جماعة زى ما قال الأخ اللى فتح الموضوع ده : مفروض نحترم اللغة الأم بتاعتنا لأن دى هويتنا
اللى عاوز يستخدم الانجليزى براحته ... بس اللى مش قادر افهمه ازاى بيقرا عربى ويفهمه وبعدين يكتب الرد بالانجليزى !!!!