سواقة بنات

**speedy** · 13-01-2008 07:04 PM

السلام عليكم ورحمة الله
انا عضوة جديدة لسة النهاردة اول مشاركة
انا عندى مشكلة غريبة شوية (غريبة كتير)
انا عندى عربية ماروتى 2008 و العربية كويسة الحمد لله و انا بعرف اسوق (ذى كل البنات اللى فى مصر يعنى )
دى اول عربية ليا و انا بسوق من شهر واحد بس و نرجع للمشكلة انا السواقة عندى تجربة مش ظريفة
خد عندك اول و تانى و ثالت .دبرياج و فرامل و دبرياج لوحده وبنزين من غير فرامل انا تعبتتتتتتتتتتت و المشوار كل يوم طويل موووووووووووووووت
ده غير المواقف المحرجة مرة فصلت و مرة بتقع و مرة داخلة على الرصيف
ممكن حد يقولى اذاى اتحكم احسن فى الماروتى اللى لسة عليها اقساط و كمان اذى اتعامل مع ابعاد العربية فى الركنات الضيقة انا و اللهى بخاف على العربيات الراكنة و الناس الماشية حتى الناس اللى فى البيوت :)
و كمان سوال معلش لو مفيش فايدة خالص ممكن ارقام بتوع الانقاذ؟

شكرا

**badblood** · 13-01-2008 07:24 PM

الف مبروك بس ربنا يستر

**hero** · 13-01-2008 07:52 PM

متهيألي في حالتك دي....كان الافضل تجيبي عربية اوتوماتيك...علي الاقل هاتركزي اكتر في الشارع وتريحي دماغك من النقلات والدبرياج ...

**analyzer** · 13-01-2008 08:05 PM

بداية لازمى تمشى على مهلك وده هيزود تركيزك اكتر
ثانيا السواقه ممارسه كل المشاكل دى مرينا بيها فى الاول يعنى مع الممارسه هتزول كل الاخطاء بس المهم تكونى مركزه انك تتعلمى من اخطائك
ثالثا عنيكى تبقى على احرف الرفرفين اليمين والشمال وده هيظبط الابعاد معاكى
ومتنسيش مرايات الجانب مهمه جدا يعنى متحوديش يمي او يسار الى لما تلمحى بعينك فى جزء من الثانيه حد بجواك ولا لا
ولما تيجى تركنى تخلى كبوت عربيتك عند الباب الاول من الامام للعربيه الى انتى هتركنى وراها وبعدين تحودى الدركسيون وترجعى
ومرة على مرة هتتظبط معاكى
وربنا يديكى خيرها ويكفيكى شرها

**aboalm** · 13-01-2008 09:09 PM

انتى متوتره و خايفه و عمر الواحد لما يكون قلقان او خايف ما حا يعرف يسوق كويس
يعنى انا باسوق من حوالى 20 سنه و لحد النهارده لو خايف على لاعربيه اللى أنا سايقها اعك فى السواقه
اهدى خالص و ركزى بشويش انتى بتقولى بقالك شهر واحد يعنى لسه جديده فامش تخافى و ان شاء الله كلها شويه صغيرين و تلاقى نفسك زى الفل

**Xpert** · 13-01-2008 09:28 PM

مبدئياً زي ما قال انالايزر السواقه ممارسه .. كل ما تسوقي اكتر هاتسوقي احسن ..
تاني حاجه .. انا باسوق من و انا عندي 9 سنين ... (اتعلمت البدايات يعني و انا عندي 9 سنين .. حرك العربيه ورا و قدام .. و شويه شويه ادخل علي الغيارات اول و تاني و هكذا .. الي ان وصلت النهارده مابقتش فارقه حتي لو عربيه حته حديه هاسوقها ) ..
المهم بقي .. بصي ..
حركه الرجلين ...دبرياج و فرامل دي .. هاتتعلميها و هاتاخدي عليها .. لحد ما تلاقي رجليكي بتلعب علي الدواسات اوتوماتيك كده من غير ما يبقي في دماغك .. و هيا دي الممارسه .. المشكله بقي في الجزء التاني و التالت ..
الجزء التاني : القلب الجامد .. و ده بيفرق بين الواد و البنت .. و دي بصراحه ماشفتش بنت قلبها جامد في السواقه .. بس دي برضه ليها حل .. (طبعاُ القلب الجامد مهم في السرعات العاليه ... و حلها انك كده كده مابتسوقيش سرعات عاليه)
الجزء التالت .. و ده الاهم بقي بين الكل .. "تقدير المسافات" .. لازم لازم تكوني بتعرفي تقدري المسافات كويس .. ازاي ؟ يعني .. لو عربيتين واقفين و بينهم مسافه .. المسافه دي هاتدخلك بالعربيه ولا لاء ؟ ... طب لو انا ماشي بسرعه شويه .. المسافه اللي قدامي تكفي اني افرمل ولا لاء ؟ .. و كمان .. لو مثلاً باعدي واحد .. و فيه مقابل جاي .. المسافه هاتجبني و تخليني اعدي اللي قدامي و افادي المقابل ولا لاء ؟ ... المسافات اهم من ده كله ... للأن اي حد هايعرف يغير الغيارات .. انما المسافات باشوف ناس بتعمل حوادث عشان مش عارفين المسافه هاتجيبهم ولا لاء !.. (انا باشوف العجب .. انا شفت كمان واحد سواق تاكسي مش عارف يمشي ريفيرس ! ) ..
مميزات الماروتي بقي .. موتور صغير و حجمها صغير .. و هاتسهل مواضيع المسافات و كده..
و نصيحه بقي .. بلاش تستخدمي مرايات .. لو عاوزه ترجعي لورا .. لفي وشك و امسكي الكرسي اللي جنبك و بصي ورا .. من جوه العربيه كده .. مش عيب .. انا يالل باسوق بقالي كتير ماعرفش استخدم مرايات و مش عايز ..
اخوكي
جون اكس

**Mrs.Cherokee** · 13-01-2008 11:02 PM

اول حاجة متخافيش من السواقة ومالكيش دعوة من الا حاوليكى هية فى الاول عايزة تركيز ما تستعجليش عليها كلنا فى الاول كنا ذيك

**OlaOsman** · 28-04-2008 07:10 PM

موضوع هام جدا لكل اللي جديد في السواقة و فيه نصايح مفيدة.. يا ريت يا جماعة نكتر من المواضيع دي أو اللي عنده حاجة يضيفها ما يبخلش بيها علينا.. أخوكوا مزنووووووووووق :o

**thegoodhacker** · 28-04-2008 08:46 PM

طب ايه رايك ما تاخدي حصتين ولا تلاتة تدريب سواقة في الزحام حتي لو كانت علي عربيتك ......... اهم حاجة ان حد يكون جنبك بيفهم في السواقة و يكون صبور بحيث يقولك ازاي تتصرفي في المواقف الصعبة و يعلمك الركنة وبالتالي يديكي ثقة في نفسك اكتر .......... و علي فكرة فيه مدربات سيدات دلوقتي كمان

**aif** · 28-04-2008 08:55 PM

انتي محتاجة 3 او 4 حصص تتمرني علي السواقة وتتعلمي الركن مع مدربة
لو حضرتك تحبي ممكن ابعتلك نمرة السيدة اللي بتعلم زوجتي علي الخاص
ربنا يوفقك

الموضوع: سواقة بنات

LinkBack

أدوات الموضوع

عرض

-

-

-

المواضيع المتشابهه

هو ليه مفيش بنات في مصر؟

يا بنات ....

ياترى ده شجاعة ولا عبط بنات؟

ازاي تعلق بنات

سواقة بنات

الكلمات الدلالية لهذا الموضوع

المفضلات

المفضلات

ضوابط المشاركة