**محــطة شـــــل مــــكرم عبيــــد و التانكات السيئة**
حبيت أنبه على الجميع من هذه المحطة رغم أنى كنت بنصح بيها قبل كده لأنى بتعامل معاهم بإنتظام بقالى ما يقارب عام و نصف مش بمون من أى محطة غيرهم يعنى زبون دائم (زبون فعلا)
المهم من حوالى إسبوعين أو 3 العربية حاسس إنها مش مظبوطة معايا خالص و السحب مش هو السحب ده غير إن بيجى و يروح تقطيع و تنتيش فى الموتور !!!
أنا بطبعى مابحبش الحال المايل ولا أستحمل حاجة تحيد عن الخط المستقيم يعنى أركب عربية لازم تكون تمام
أتفاجئ و أنا باخد غرزة أو بطلع من عربية أو مقطورة إن العربية أديها بنزين و أقولها يلا ....أتفاجئ إنها مش سمعانى أقولها إطلعى ماتردش ..... طبعا حاجة تكسف و تحرق الدم
المهم روحت أول حاجة على نصايح حبيبى أبو السباع و جبت منظف دورة البنزين و الرشاشات ....
فى الأول عمل نوعا ما تأثير و بعد كام يوم رجعت ريما لعادتها الذميمه....
كنت رايح التوكيل أعمل حبة حاجات خفيفه كده فطلبت منهم يبصوا على البوجيهات و على فلتر البنزين طبقا برده لنصايح أبو السباع
أتفاجئ إن فلتر البنزين نازل منه لما إتفك مش بنزين خالص حاجة كده مخلوط كوكتيل من الطين و البنزين و الماء و القرف و العكننه طبعا عرفت سبب إن السحب مكتوم - التقطيع كان فيه عامل مساعد إن كان فيه سلك من كابلات البوجيهات ال4 بيقطع و غيرولى ال 4
و الحمد لله دلوقت قبل ما أقولها يلا بتطلع لوحدها بجد الواحد بيكون متضايق أوى لما عربيته فيها حاجة أو تكسفه أو ماتردش عليه :)
المهم محدش يبقى يحط بنزين من شل مكرم عبيد لأن تانكاتهم واضح إنهم مش بيعملولها صيانة نهائى