المهندس سبعاوى والاخوه الافاضل برجاء الافاده
عندى شاهين 1400 موديل 2004 بكاربراتير وانا خبرتى فى العربيات ضعيفه ... باسوق بس .... وابتديت السواقه بره مصر على سيريون وكوروللا فلما رجعت للشاهين (كنت شاريها قبل السفر وماركبتهاش) جالى صدمه حضاريه طبعاً!! العربيه كان صاحبها مهمل فيها شويه من حيث الصيانه والخامات (يعنى بنزين 80 وزيت تعبان كده وفلاتر نص كم بعد ميعادها بـ 5000 كيلو وكلام كده) وطبعا وانا بره كانت مع المدام والمدام برضه ماغيرتش اى حاجه دوريه لغايه ماآجى اعملها انا وماحدش يسألنى ليه !!!؟؟ المهم انا عندى شويه ملحوظات ومشاكل وماليش حد هنا غيركوا أثق فى رأيه. ارجو كتابه تفاصيل على قد ماتقدروا لانى ماليش قوى فى الموضوع
1) عايز كهربائى كويس ... عندى شويه شغل كهرباء وعايز اعرف يتكلف كام (لمبه التابلوه ضعيفه جدا رغم انى غيرتها، الكلاكس مش متثبت كويس، فوانيس شبوره، الفانوس الإضاءه بتاعته ضعيفه قوى...)
2) عايز برضه سمكرى كويس وابن حلال ... العربيه مافيهاش جنب سليم (مش مدمره انما خدوش ورزعات وكده) انا حتى مش عارف احسن اسمكر البيبان وللا اغيرهم؟ وبكام؟
3) العربيه السحب بتاعها ضعيف (او هى ممكن تكون ده طبيعتها وانا بيتهيألى انه كده ضعيف) بس انا بانقل لما عداد الار بى ام يبقى 3000 .... لقيتنى جبت 100 وانا على الخامس!!! طيب العداد اخره 200 ... بالنسبه للـ 100 الفرق دول ظروفهم ايه؟!! هل ده طبيعى؟
4) النهارده رحت اغير الفلاتر والزيت ... جبت فلتر الزيت الايطالى والهوا مصرى علشان مافيش تركى من شارع دمشق بـ 28 و15 ده سعرهم؟ وهل فى احسن؟ ومنين؟
5) غيرت الزيت فى شل الراجل لقى الزيت اللى نازل بودره صوتلى فى المحطه وكان فاضل يتهمنى بالكفر (رغم انى مظلوم والله) المهم قالولى بدل ما نغسل الموتور خد زيت وسط يتضمن فى خواصه غسيل الموتور ويتغير على 7000 ودفعت 139 جنيه (ماعرفش برضه اتحسبت ازاى) ايه رأيكوا؟
6) العربيه كان فيها حدفه يمين ... النهارده فى شل عملت زوايا الراجل قاللى ان العجل كان مقفول لجوه انما الزوايا مظبوطه .... وقاللى انا ربطت العفشه (انا شفته شغال قدام بس ... ماعرفش العفشه دى مافيهاش ورا وللا لأ) ولوحسيت بحدفه تانى خللى بتاع الكاوتش يبدل العجلتين اللى قدام .. دى مكان دى علشان الكاوتش اتاكل من العوجه دى .... هل ده صح؟ وبعد كده انا حاسس ان العربيه مرات تحدف يمين ومرات شمال وانا بقيت مش عارف من العفشه وللا الزوايا وللا الكاوتش وللا الدركسيون !!!! اى مقترحات؟
7) ساعات الفتيس على التانى يتنطر لوحد على المور!! كمان لما مثلا اكون على التالت وباهدى ... وانا دايس دبرياج وانقل على التانى ومن غير ماشيل رجلى من الدبرياج اسمع صوت كده "وححححححح" ده ايه ده؟
8) العربيه مرات مابتدورش بسهوله ... امبارح بعد مادارت وانا كابس بنزين شويه بطلت كده بالراحه زى واحد بيموت رغم ان رجلى كانت لازقه فى الدواسه اعمل ايه؟
9) بعد ده كله انا مش عارف اشد العربيه (يعنى زى ما قريت المساعدين والمقصات والتكييف والكاسيت والكلام ده) وللا ابيعها على كده واجيب حاجه تانى (رغم انها عاجبانى بصراحه خصوصا حكايه انى شايف حدودها كلها وانا سايق غير الكوروللا تماما) ولو بعتها تجيب كام دلوقتى؟
معلهش انا آسف على كتر الاسئله لكن انا مش عارف اعمل ايه ووقتى ضيق فى الاجازه وعايز اسافر وهى متظبطه ... منتظر ردودكم وجزاكم الله خيراً