محتاجه مساعده ل 128 بليييييييز

محتاجه مساعده ياجماعه انا معايا عربيه 128 موديل 1991 وكانت ماشية كويسع ومن 4 ايام لقيتها وهيا ماشية بتقطع بنزين يعني ادوس علي دواسة البنزين الاقي العربية فصلت خالص والكونتاك بس هو الي شغال ابطلها وارجع ادورها تدور تاني عادي وتمشي بتاع كيلو وتقف مني وهكذا نزلت بصيت علي فلتر البنزين لقيته فاضي وديتها لميكانيكي غير الفلتر وفضلت المشكله رجعت له تاني قالي يبقي العيب من الرداخ الميكانيكي غيره ومازالت المشكله ياريت حد يدلني اعمل ايه ولو حد من المنصورة يقولي علي ميكانيكي كويس انتوا متعرفوش لما بتقف مني ببقي عاوزه اعيط ومش عارفه اعمل ايه؟:shyy:

بصي قولى للميكانيكى يبصلك على وصلات البنزين من اول التانك (من عند العوامة) لغاية الفلتر
وخلية يتاكد ان الافزان بتاعت الخراطيم مربوطة كويس
جربي كدة وقوليلنا اية اللى حصل

واية اخبار العربية بعد لما بتدور بيقبي السحب كويس
وكمان لما تبقى واقفة والعربية دايرة بتحسي ان الموتور مرتاح ولما لاء

اقتباس:

---

المشاركة الأصلية كتبت بواسطة eng_mostafa_89

بصي قولى للميكانيكى يبصلك على وصلات البنزين من اول التانك (من عند العوامة) لغاية الفلتر
وخلية يتاكد ان الافزان بتاعت الخراطيم مربوطة كويس
جربي كدة وقوليلنا اية اللى حصل

واية اخبار العربية بعد لما بتدور بيقبي السحب كويس
وكمان لما تبقى واقفة والعربية دايرة بتحسي ان الموتور مرتاح ولما لاء

---

بص لي عليها كلها وكمان سد خرطوم الفايظ بتاع البنزين والعربية سحبها كويس والموتور كمان كويس حتي مفيش دخان بيطلع منه ولا حاجه بالعكس الشكمان بيطلع ميه لما بيدور والميكانيكي الي ده معناه موتور كويس هل ممكن يكون العيب من الكاربرتيير ؟

الموضوع ده كان بيحصل معايا وطلع في الاخر بيك السلانسيه روحت للميكانيكي نضفه ورجعت كل حاجة تمام حاولي مرة تاني تروحيله

بصى الموضوع ده فعلا جننى
هتعملى حاجتين
1-تروحى للميكانيكى وتخليه يغيرلك ترومبه بنزين هى سعرها 50 جنيه
2-تروحى لبتاع الكربراتيرات تخليه يفك الكربراتير وينضفه ويشوف لو عاوز اكس وباب يعملهم
وبعد كده كل حاجه هتبقى تمام ان شاء الله

اقتباس:

---

المشاركة الأصلية كتبت بواسطة enayat

بص لي عليها كلها وكمان سد خرطوم الفايظ بتاع البنزين والعربية سحبها كويس والموتور كمان كويس حتي مفيش دخان بيطلع منه ولا حاجه بالعكس الشكمان بيطلع ميه لما بيدور والميكانيكي الي ده معناه موتور كويس هل ممكن يكون العيب من الكاربرتيير ؟

---

طيب يبقى كدة تمام بالنسبة لدورة البنزين (كاخراطيم ووصلات)
انا مش بسألك عن الدخنة انا بسأل هل بتحسي ان العربية بتترعش جامد وهى وقفة ولا لاء
وكدة مممكن تكون فعلا مشكلة فى الكربيراتير قولى للميكانيكى ينظفة وينظف البيكات بتعتة
حاجة كمان اخبار طقم الكهرباء اية؟ واخر مرة اتغير امتى

انا لما جيت اقول للمكانيكي جايز المشكلة من الكاربراتير قالي لا ومبصش عليه ولما قلت له والحل قالي والله ماانا عارف علشان كده بقول اغيرالميكانيكي ولا ايه؟

اه اخر مره لطقم الكهرباء من شهرين تقريبا

لو ممكن تخلي الميكانيكي يبص علي معدل تدفق البنزين من التانك للرداخ ولو ممكن خلية ينفخ الماسورة دي في اتجاة التانك باستخدام كمبريسور..ممكن يكون شوائب متجمعة علي ماخذ البنزين داخل التانك

اقتباس:

---

المشاركة الأصلية كتبت بواسطة enayat

خرطوم الفايظ بتاع البنزين

---

المشكله من خرطوم فايظ الهواء
مع عشان كده حضرتك تلاقى المشكله تبان بعد مشوار معين.
يعنى مع نقص البنزين فى التانك.
البنزين بيفضى ولا يوجد هواء بيدخل لتعويض النقص فيه
و بالتالى بيتحول التانك لعلبة عصير.
تكاد تتشفط جوانب التانك للداخل
عشان كده الرداخ بيحاول يسحب بنزين من التانك.والتانك فيه ضغط سحب من الجانب الاخر.و النتيجه ان الرداخ بيفشل فى سحب البنزين.فبيبان كما لو كانت العربيه بتشطب بنزين تمام
المشكله دى حلها التأكد من خراطيم هواء التانك.
أو لو حصلت و حضرتك مسافره.إفتحى غطاء التانك

انا بتكلم من واقع تجربه مريت بيها قبل كده
غيرت الرداخ
و عملت صيانة كهرباء
و نضفت الكاربيراتير
وكل ما يمكن تخيله
والمكله دى فضلت كتير
و مكنتش بسافر بالعربيه و فضلت مسافرش بيها كتير بالسنين
لحد مره والدى كان بيمون العربيه فى البنزينه
الراجل بيفتح التانك..أول مفتح الغطاء سمع صوت زى ميكون حد بيشرب بشفاطه فى ثانيه
على طول قاله راجه فايص هواء التانك
وروحت للميكانيكىورانى الخرطوم مسدود بغباااااااء
انا مش من المنصوره للاسف انا من المحله.بس أى واحد ممكن يعملها لحضرتك

النهارده الجمعه بكره ان شاء الله اروح شغلي الصبح وبعد الضهر اعدي علي الميكانيكي واقولكم ايه النتيجة وميرسي جدا علي اهتمامكم وردودكم

اقتباس:

---

المشاركة الأصلية كتبت بواسطة enayat

النهارده الجمعه بكره ان شاء الله اروح شغلي الصبح وبعد الضهر اعدي علي الميكانيكي واقولكم ايه النتيجة وميرسي جدا علي اهتمامكم وردودكم

---

بإذن الله يكون زى مقولت لحضرتك.
ياريت بس حضرتك تقوللنا اللى حصل..
بس أكدى على الميكانيكى أن يشوف فايص هواء التانك
لانهم ساعات بيعملوا اللى فدماغهم
و ان شاء الله خير

ممكن فعلا يطلع خرطوم الفايظ

بصوا ياجماعه الاول انا متشكره جدا علي تعبكم معايا لكن الي حصل النهارده حاجه غريبه جدا تخيلوا العربية مبطلتش وانا ماشيه خالص الظاهر انها خافت منكم ههههههههه وبالتالي مرحتش للميكانيكي
بس الاغرب بقي ان لقيت سحب العربيه عالي جدا عن الاول في لحظه الاقيها جابت معابا 110 احاول اهدي لاني غالبا بسوق علي 90 ( علي قدنا ياجماعه انتوا عارفين الستات) وفيه سؤال ممكن اساله لكم هل الرداخ خو طلمبة البنزين ولا ده حاجه تانيه اعذروني سواقه جديده عمر 4 شهور بس

الرداخ هو هو طلمبه البنزين.
بس خدى بالك.
مش معنى ان المشكله محصلتش يبقى انها اتحلت..
لأ
زى مقولت لحضرتك.
المشكله دى حتبان مع حضرتك لما المشوار يكون طويل.
ديعنى فيه إستهلاك للبنزين.راجعى كلامى وحضرتك تعرفى انا البنزين لو نقص فى التانك وخرطو م تعويض الهواء مسدود.حتحصل المشكله دى.