اعتذار واجب ......ياريت الكل يشارك

**eng.octooo** · 02-04-2010 04:52 PM

الموضوع دة مش عاوز اعتبرة موضوع عابر...ياريت نعتبرة اعتراف بالحق لاى عضو عابر

يعنى عاوزين كل واحد يدخل يقول اعتراف بالحق و اعتذار لاى عضو هو حاسس انة يستحق الاعتذار والموضوع مش مكان لتوجية الاتهامات او الانتقادات او التجريح النفسى باى من اشكالة او اثبات البرأة ..واى مشاركة مخالفة ياريت الادارة تحذفها فورااا ...

وانا اول واحد ها ابداء فى الموضوع :

اعتذارل Rembrandt

لانى وصلتلة كلامى بشكل غلط وشكرا لانة تفهم الموضوع ...وان شاءالله تكون فاتحة خير

اعتذار ل
K!ShO
لسمسم لانى بجد اكتر من مرة وعدتة بانى هاكلمة وماتصلتش ووعدتة باكتر من مرة اننا هانرتب معاد لمقابلة بس للاسف كنت مشغول جدااا الفترة دى ...سورى يا سمسم

اعتذار ل
shnory

لانى كنت فاكرة شخصية مش لذيذة وكنت حاسس انة بيتصرف على غير طبيعتة بس لما رحنا مقابلة اليكس بجد لقيتة من الطف واظرف الناس الى قابلتهم فى حياتى وفضلت انا وعمرو واحنا مروحين نتكلم عن شنورى وانة طلع عكس ما كنا متوقعين وطلع شخصية اجتماعية وحبوبة جداااا وكنا مبسوطين جدااا اننا اتعرفنا بية ....اسف شنورى بك

اعتذار ل
كابوس الليل

لانة الراجل كلمنى كتيير على الميل وانا ولا مرة بدأت الاتصال بية ...ان شاءالله هاكلمة قريب وربنا يوفقة فى امتحاناتة

ان شاء الله ما اكونش نسيت حد

وياريت باقى الاعضاء يشاركوا هما كمان

**3ateef** · 02-04-2010 05:23 PM

انا مش حعتذر لعضو...
انا حعتذر لأبويا لانى قعدت سنين كتير اوى مش فاهمه...وكنت بتصرف من دماغى.....

**م.محمد علاء** · 02-04-2010 05:33 PM

انا الحمد لله..
أول مبحس ان حد فهمنى غلط..
أو أن حد وضحلى مدى خطأ كلامى فى المنتدى
بعتذرله على طول..
اللى عايز أعتذرله
هو ..انا..
لانى ضريت نفسى

**الغزالى** · 02-04-2010 08:02 PM

المشاركة الأصلية كتبت بواسطة eng.octooo

اعتذار ل
كابوس الليل

لانة الراجل كلمنى كتيير على الميل وانا ولا مرة بدأت الاتصال بية ...ان شاءالله هاكلمة قريب وربنا يوفقة فى امتحاناتة

هههههه عشان انت ولا مرة بدات تتصل بية حتى لو بدأت تتصل دة ندل ولما اكلمة يقولى معلش اصل مشغول معلش اصل مش فاضى
لو شفتة ابئى صبحلى علية

**A7MED_PHARMA** · 02-04-2010 08:51 PM

إعتذار واجب
لمدام نور..عن أول إحتكاك عنيف
في موضوع الأدوية المخدرة ..من زماااااااااان أوي الموضوع ده

بس طالما باب الإعتذارات مفتوح ..أديني بقدم إعتذار

.

**hazoom2006** · 02-04-2010 11:21 PM

مش عارف اعتذر لمين ولا مين بس الحمد لله محدش بيزعل منى ولو حصل بعتذر فورا

بس الموضوع جميل فكرته حلوه كل واحد يقول هو غلط فى حق حد ويعتذرله

**نور القمر** · 02-04-2010 11:26 PM

المشاركة الأصلية كتبت بواسطة A7MED_PHARMA

إعتذار واجب
لمدام نور..عن أول إحتكاك عنيف
في موضوع الأدوية المخدرة ..من زماااااااااان أوي الموضوع ده

بس طالما باب الإعتذارات مفتوح ..أديني بقدم إعتذار

.

ياه انت لسه فاكر
تصدق بالله كتير اوي الاقي حد بيعتذر لي وسط الكلام عن موقف عدى وببقه مش فاكرة ايه الموقف اصلا وبرجع للموضوع عشان افتكر
انا صحيح مرجعتش للموضوع بتاعك دلوقت بس فعلا اللي فاكراه ان كان في سوء فهم موصلش لدرجة الاحتكاك العنيف اللي يتوجب اعتذارك عليه
عموما في كل الاحوال حصل خير وانا قلت لك قبل كدة انت اخ ومن الاعضاء اللي ليك في معزة في قلبي
وبالمناسبة المدامات هناك بنسبة 99% اشمعنه انا بتقولولي مدام

.. انا مش كبيرة اوي كدة

ده حتى انا اصغر منكم كلكم

اما بقه بالنسبة لموضوع اكتو بحييك عليك
والحمد لله رغم اني شعنونة مش بسكت لحد على حاجة

بس بصفي الامور بيني وبين اي عضو اول باول قبل ما نسى الموقف عشان لا حد يشيل مني ولا اشيل من حد