رحت مركز صيانة قليوب و يا رتني مارحت!

رحت الساعة عشرة عشان اعمل زبط زوايا و اشيك على الفرامل تخيلوا خلصت الساعة كام؟
الساعة 3 ونص ؟؟!!ليه مع ان زبط الزوايا ما يخدش اكتر من نص ساعة والكشف على الفرامل برضه ما يخدش نص ساعة
مش 6 ساعات
المهم شفت الفني قاعد يطلع بالعربية و يخش بيها سألته انتا بتعمل ايه قلي بجربها قلت كويس شغل تمام
تاني و تالت قلي بجربها قلت يبقى أكيد بقى بيهتموا بشغلهم أوي

المكان هناك مش قد كده , الحمامات ما تطيقش تدخلها, و تحس ان ما فيش نظام عكس تماما توكيل دايو اللي لما تروحه تحس ان رحت المريديان مش التوكيل

أخيرا طلعت بيها عشان أجربها الدركسيون كان في النص بقى معووج يمين و الفرامل لسه زي ماهيه يعني 120 جنيه في الأرض
جيت أرجعلهم تاني لقيت نفسي على كبري قليوب قلت اخد اول يو ترن, طلع ان اول يو ترن عند الدائري و الجهة التانية زحمة جدا فا اكتفيت بكده وقلت عوضي على الله لأن من خبرتي في العربيات عمري ما زبطت زوايا و زبطت و أيضا الفرامل لما تقل شويه عمرها ما بترجع زي الأول

يا باشا الـ 120 جنيه مراحوش على الأرض حضرتك بتتعامل مع توكيل مش مع ورشة الاسطى بلية واكيد سمعة الشركة تهمها اكتر بكتير من مكسب 120 جنيه بدون رضا العميل


ـ1ـ بالنسبة للتأخير طبعا 6 ساعات كتير انما فيه ضغط شغل كبير سواء في قليوب او في فرع جسر السويس (فرع جسر السويس الحجز فيه بعد أكثر من شهر كامل)


ـ2ـ بخصوص المكان في قليوب فهو مركز قديم من عام 1985 جرى له بعض التحسينات والتجديدات لكن هناك مركز جديد تحت الانشاء باحدث المواصفات بجوار كارفور المعادي على الدائري (قبل كارفور بحوالي 500 متر) يعني باذن الله المركز الجديد اللي هيكون معرض ومركز خدمة وبيع قطع غيار يكون احسن من المريديان كمان.


ـ3ـ بخصوص ان العمل اللي تم لم يتم بشكل صحيح او لك عليه ملاحظات فمكتوب على الفاتورة ان الأعمال التي تمت اذا لم تكن راضي عنها فمن حقك مراجعة المركز خلال اسبوع لاعادة الاصلاح

فياريت تشرفنا في المركز وانا هاكون منتظرك في الوقت اللي تحدده علشان نشوف موضوع ظبط الزوايا والفرامل مشكلتهم ايه


ـ4ـ ظبط الزوايا وظبط الفرامل ده موضوع بسيط مش مشكلة ليس لها حل زي ما انت فاكر

وطبعا انا هاعرض الموضوع ده على مدير الصيانة لاتخاذ اللازم نحو من قام بتنفيذ العمل

وفي انتظار اتصالك
مهندس / طارق زويل

:mad::mad::mad::mad:

والله يا بشمهندس طارق اخلجتني بتواضعك الكريم ده و متشكر جدا على اهتمام حضرتك

وان شاء الله حبقى روح يوم السبت واكلم حضرتك
مرة تانية شكرا لحضرتك وانا آسف لو كنت تكلمت بشدة شوية اصل العربية عاملة 5 الاف كيلو بس

الاخ الفاضل nobody مع احترامى و تقديرى ليك واحترامى للاخ الفاض الباشمهندس طارق انا رحت مركز صيانه قليوب مرتين الاولى علشان صيانه الالف و التانيه علشان صيانه ال10 الاف كم وفى المرتين الصراحه كانت المقابله و المهندسين زى الفل و كل الملاحظات اللى قلتلهم عليها عملوها وهوا فعلا المكان تحس انه قديم شويه بس زى المهندس طارق ماقال هما بيعملوا مركز جديد ونصيحه اخويه لما تحب تروح تعمل الصيانه لازم تروح بدرى علشان تخلص بدرى يعنى فى المرتين اللى روحتهم كنت هناك على الساعه 8 الصبح وبتلاقى لسه الضغط مش كتير .