محتارة بين موبايلين

**shery103** · 02-04-2010 11:09 PM

انا عندى sony ericsson P1i بقاله سنتين و نص و مريحنى جدا و حمال اسية و احسن تليفون جبته لحد دلوقتى

الفكرة بقه انى عايزة اغير ، و عايزة اجيب sony ericsson برضو

بفكر فى موبايلين X1, X2

السبب هو انى على طول بكتب مسجات او ايميلات او ملاحظات على التليفون ، و موضوع الكيبورد اللى على الشاشة التاتش ده مينفعنيش، محتاجة تليفون بكيبورد حقيقية من الاخر ، ده اللى خلانى اختار للاتنين دول

انا عارفة ان X2 اجدد من X1 ، بس هل فرق السعر يستاهل

محتارة جدا و ياريت اى حد جرب اى موبايل فيهم يقولى رأيه

و شكراااا

**Imhotep** · 03-04-2010 12:32 AM

بصى يا ستى..... اللينك ده فى مقارنة بين الاتنين
Sony Ericsson XPERIA X1 vs. Sony Ericsson XPERIA X2 - GSMArena.com

اللى انا شايفه ان الفروق بين الاتنين مش كبيرة اوى لان البروسيسور واحد و نظام التشغيل يعتبر برضه واحد و هو كده كده الويندوز 7 نازل قريب و بالتالى كل ما سبقه من ويندوز 6.1 او 6.5 مايكروسوفت هتبتدى تشيل ايدها من الدعم الفنى ليه شوية بشوية و دى انا شايفها نقطة سلبية بالاضافة لنظام ويندوز نفسه اللى ممكن- فى نظرى- ميكونش احسن الاختيارات فى انظمة التشغيل من نواحى عديدة..... الحاجة اللى فيها فرق يعتبر كبير شوية لو يهمك هو الكاميرا لانها 3فى تليفون و 8 ميجابيكسل فى التانى..... ممكن لو عايزة تطلعى بره السونى هتلاقى اختيارات تانية كويسة زى و سعرها برضه كويس زى النوكيا e75

**yoko** · 03-04-2010 12:35 AM

أنا معايا الx1 ومنزلة ويندوز ٦.٥ وقريب هنزلة ال٧ أول ما ينزل
ولو عندك أي سؤال أنا تحت أمرك

**yoko** · 03-04-2010 08:08 AM

المشاركة الأصلية كتبت بواسطة shery103

انا عملت المقارنة دى ، و شايفة ان فعلا مفيش فروق كبيرة

بالنسبة للكاميرا انا اصلا لما بصور بصور بكاميرا ديجيتال و مش بعتمد على كاميرا الموبايل الا نادرا ، فدى مش مشكلة

الفكرة ان انا فعلا مبحبش نوكيا و بحب سونى اريكسون جداااا

يوكو ، انا لقيتك و مش هسيبك

كام سؤال كده بما انى لقيت واحد معاه التليفون

1- ايه اخباره كجهاز عامة ( سريع ، بطىء )
2- بالنسبة لل browsing ، حجم الشاشة مناسب و مريح و لا صغيرة
3- بالنسبة للكيبورد ، مريحة فى الكتابة عليها ؟
4- فى اى مشاكل فيه عموما ( بيهنج ، صوته واطى ....)؟
5- بالنسبة للبرامج ، هل متوفرة و لا مش بتلاقى ؟
6- هل سهل اعمله Update ، يعنى انت نزلت 6.5 بدل 6.1 ، الموضوع سهل و لا متعب ؟
7- اى حاجة تانية عايز تقولها بقى

معلش اسئلتى كتيرة بس عايزة اطمن قبل ما اشتريه

براحتك وفعلا الكاميرا بتعته في الصور الثابته أوحش من الk800 (أصله معايا برده

) لكن الفيديو أحسن كتير
١) سريع ويعتبر كويس جدا (أسرع من الP1)
٢) الشاشه معقوله ووممكن تعملي زووم في صفح النت
٣) هي زرايرها صغيرة سنه بس أول ما تتعودي عليه هتلقيها سهله جدا
٤) المشكله الوحيدة إن صوته واطي شويه
٥) كل برامج الويندوز موبيل شغاله عليه(فيه حاجات بالهبل)
٦) هو هاك بس سهل جدا وأنا كمان منزل واجهة تالhtc وأسرع من صحابي الي معاهم htc
٧) إتوكلي على الله وجبيه وأنا هظبطك هاكات وبرامج
والفرق بينه وبين الx2 مش كبير فشوفي أنهي واحد الي سعره مناسب بالنسبالك وتوكلي على الله

**جمال** · 03-04-2010 02:10 PM

انا معايا الاكس ون من حوالى سنة
الفرق بينه و بين الاكس2 مش مستاهل
لو مش مستعجلة انتظرى الاكس 10 هيكون افضل بكتير و سينزل فى خلال كام شهر ( نزل فعلا فى انجلترا )
لو حابه تبيعى ال بى ون انا اشتريه ( كتلفون ثان )