بجد انا اتقرفت من العربيه دي ... اصلها ناقصه

**romeo_6887** · 02-04-2010 11:52 PM

العربيه دايو جوليت 99 مانيوال عامله 137000 كيلو ( انا حاسس انهم كتير اوي )

قولت النهارده نزل امشي بالعربيه شويه لاني ممشتش بيها بقالي اسبوع
المهم بدور الحمد لله دارت من اول مره بس طولت ( قولت عادي من الركنه )
اخدت وقت طويل شويه عشان تسخن ( برضه عادي كبر دماغك يا عم احمد )
بدأت اتحرك اتلاقي ان السحب بقي مش تمام و صوت المكنه بيعلي اول ما اخش علي 2000 ار بي ام ( من ايه ده بقي ؟ ) و كمان الفتيس شويه يبقي ناعم و شويه يبقي فيه عضه ( يا مساء الاشتغالات ) العجيب بقي بجد ان العربيه مبترضاش تاخد الغيار الاول الا لما تقف تقريبا اتلاقيتها بتاخد الغيار الاول عادي زي بقيه العربيات الطبيعيه و بسمع صوت حديد بيحك في بعضه ( كبر دماغك و عدي الليله يا عم احمد ) و برضه لسه السحب مش تمام ( في الاول اول ما اهمس الدواسه تبتدي تشد دلوقتي لا لازم اتقل رجلي سنه علي الدواسه عشان تبتدي تشد معايا ) و كمان اول ما ادوس علي الدواسه اتلاقي رجرجه كده كأن بيض الطرف فيه خشونه ( مجرب انا الموضوع ده ) مع انه لسه مكملش 3000 كيلو في العربيه ( اعمل ايه يا ناس ؟ ) و كمان ساعات اول ما ادوس علي الدواسه اتلاقي كده سنتي ملوش تأثير و كأن العربيه مموره ده غير احلي كركره عشان البوجيهات عايزه تتحرق بجاز لان الاري بي ام بينزل بسرعه ( و الله ما كملوا شهرين في العربيه ) لما جيت اركن اتلاقي ان المارشدير في عضه كده مش و لا بد ( بجد بقت حاجه تقرف ) المهم ركنت بعون الله و طفيت العربيه قلت اجرب احرك الفتيس كده و العربيه مطفيه اتلاقاه بيعصلج قمت دايس دبرياج فاسمع صوت حديد بيحك في بعضه ( تقريبا في اي بس اس بس بيشتغل و هي واقفه ههههههههه )

حاله العربيه العامه :
السيور مكملتش 3000 كيلو
الفلاتر متنضفه و برضه مكمتلش 3000 كيلو
زيت المكنه مكملش 300 كيلو بس
فلتر الزيت متغيرش مع انه محتاج يتغير
زيت الفتيس تمام من اخر كشف عليه من حوالي شهرين كده
العفشه لسه متربطه برضه من 300 كيلو و معمول ظبط زوايا

قولولي بالله عليكوا اعمل ايه عشان خلاص انا اتخنقت و بفكر جديا اني ابيعها

**samirayad** · 03-04-2010 12:59 AM

مش عارف يارميو

أنت كاتب الموضوع متداخل مع بعضه

وحاسس أنه عامل زى طبق الكشرى

فحاول تفصلنا كل نوع من أنواع الحبوب عن التانى

يعنى خللى المكرونه لوحدها

والعدس لوحده وهكذا بالنسبه لباقى أنواع الحبوب التى يتكون منها طبق الكشرى

علشان الواحد يعرف يفرق بين الحبوب كويس

أصلى حاسس أنى تايه فى صلصة الكشرى

قولولي بالله عليكوا اعمل ايه عشان خلاص انا اتخنقت و بفكر جديا اني ابيعها

وخليك طويل البال
فكل حاجه وليها حل

بس أنت رتب الحبوب كل حاجه لوحدها

وأوعدك ....حظبطلك الطبق تمام

**romeo_6887** · 03-04-2010 01:30 AM

حاسس أنه عامل زى طبق الكشرى
اصلى حاسس أنى تايه فى صلصة الكشرى

ههههههههههههههههههه حرام عليك موتني من الضحك

بص يا هندسه المشاكل كالتالي :
السحب مش كويس خالص
الفتيس تقيل علي جميع الغيارات
صوت المكنه عالي
رجرجه من العفشه في بدايه الدوسه علي دواسه البنزين
مع حركه الفتيس في صوت حديد بيحك في بعضه

حاله العربيه
فلتر البنزين و الهواء متنضفين من شهر كده و مكملوش 3000 كيلو
فلتر الزيت المفروض احس علي دمي و اغيره
السيور جديده لسه بشوكها و راكبين مع الفلاتر
البوجيهات المفروض تتغير عشان مرطبه
زيت المكنه جديد و لسه مكملش 300 كيلو
زيت الفتيس تمام و اطمنت عليه ساعه ما غيرت زيت المكنه

**samirayad** · 03-04-2010 01:45 AM

بص يا هندسه المشاكل كالتالي :
السحب مش كويس خالص
الفتيس تقيل علي جميع الغيارات
صوت المكنه عالي
رجرجه من العفشه في بدايه الدوسه علي دواسه البنزين
مع حركه الفتيس في صوت حديد بيحك في بعضه

أيه نظام العربيه معاك

منطقه حره طبعا

فهل شاريها من بره الجمرك (باب عشرين )

ولا من جوه باب عشرين .........؟

وعامله كام كيلو للآن ..........؟

لأننى رايحين فى سكة عمرة دبرياج تقريبا

بس خلينا ماشيين فى السكه
أما نشوف الطريق حيوصلنا لفين

عمرة دبرياج ..........ولا حاجه تانيه

**romeo_6887** · 03-04-2010 02:20 AM

منطقه حره طبعا

منطقه حره ان شاء الله

عامله كام كيلو للآن ..........؟

137000 كيلو و انا عارف انهم كتير جدا جدا

لأننى رايحين فى سكة عمرة دبرياج تقريبا

يا نهار اسود ... طب طقم الدبرياج بكام ؟

انا تاني ايد و صاحبها شاريها تقريبا استثمار بس مش متأكد بس هي استيراد طبعا ... بس ده هيفرق في حاجه ؟

**samirayad** · 03-04-2010 02:33 AM

يا نهار اسود .

ليه كده ياروميو

دا روميو صبر كتير علشان كان بيحب جولييت

( وأنا كده عرفت أنت ليه مسمى نفسك روميو )

فحتفرط فى جولييت ( علشان طقم دبرياج )

فمهما يحدث للأنسان من أحداث قد لاتوافق هواه

فثق تماما بأن هذا خير من عند الله

وهو أنت عاوز تركب عربيه ومتصرفش عليها مثلا............؟

أنت خلتنى زعلت منك من الكلمه دى

وتفكيرى تجمد خلاص معاك فى أى نقاش آخر ( حول هذا الموضوع )

**romeo_6887** · 03-04-2010 03:05 AM

المشاركة الأصلية كتبت بواسطة samirayad

ليه كده ياروميو

دا روميو صبر كتير علشان كان بيحب جولييت

( وأنا كده عرفت أنت ليه مسمى نفسك روميو )

فحتفرط فى جولييت ( علشان طقم دبرياج )

فمهما يحدث للأنسان من أحداث قد لاتوافق هواه

فثق تماما بأن هذا خير من عند الله

وهو أنت عاوز تركب عربيه ومتصرفش عليها مثلا............؟

أنت خلتنى زعلت منك من الكلمه دى

وتفكيرى تجمد خلاص معاك فى أى نقاش آخر ( حول هذا الموضوع )

لالالالالالالالالالالالال الالالا
اوعي تزعل مني يا هندسه
هو احنا لينا مين غيرك ؟
عموما انا كنت بهزر و الله
بس انا زهقت من كتر المصاريف
و خصوصا ان مفيش شغل حاليا
و الفلوس قربت تفنش
انا اسف يا هندسه لو كنت زعلتك مني

**dr_mak** · 03-04-2010 03:22 AM

كل الي انت حكيتة دة ...عايز طقم دبرياج ...هو الي بيتعبك في النقل ومقلل سحب العربية

**eng_ahmedryad** · 03-04-2010 04:07 AM

المشاركة الأصلية كتبت بواسطة samirayad

وحاسس أنه عامل زى طبق الكشرى

ههههههههههههههههههههههههه هه

**eng_ahmedryad** · 03-04-2010 04:10 AM

المشاركة الأصلية كتبت بواسطة romeo_6887

لالالالالالالالالالالالال الالالا
اوعي تزعل مني يا هندسه
هو احنا لينا مين غيرك ؟
عموما انا كنت بهزر و الله
بس انا زهقت من كتر المصاريف
و خصوصا ان مفيش شغل حاليا
و الفلوس قربت تفنش
انا اسف يا هندسه لو كنت زعلتك مني

عموما ياروميو باشا ، ماتقلقش قصة الدبرياج دي من أولها لأخرها 500 جنيه بالمصنعية - 150 جنيه - وبيكون جديد مش استيراد طبعا ، وهاتحس انك جبت عربية تانية خالص .

ولو أنت مش مستعجل يبقى مش لازم دلوقتي ، خصوصا أنك مش بتحركها كتير ، والحالة المادية مش تمام معاك ، لما تشتغل وربنا يفتحها عليك ، وقتها تغير الطقم ياسيدي ، ومتزعلش نفسك كل حاجة هاتيجي في وقتها .