الموضوع: لكل اللي بيفكر يشتري كيا..بعض العيوب المتكررة واسبابها واصلاحها

صباح الخير للاخوة الاعضاء
من واقع شغلي في مركز لصيانات كيا الخليجي "مش هاقول اسمة علشان ما يبقاش اعلان" هالخص لكم بعض المشاكل اللي اتكررت خصوصا ان العربية الشكل الجديد تقريبا بقالها سنة نازلة.

1- ال USB بيفصل احيانا عند الضغط علي الكلاكس او تشغيل النور العالي ودا شيء متكرر وسببة رداءة صنع الجزء المسئول عن قرائة الفلاشة مش حاجة في العربية.

2- نور الفوج لايت لا يعمل. وبتكون المشكلة في ذراع الانوار اللي بيتغير بالكامل علشان المشكلة تتحل ودي اتكررت في كذا عربية

3- في العربيات الاتوماتيك الفتيس مش بيطلع من علي ال P عند الضغط علي الفرامل. وبتكون المشكلة في البودي كونترول اللي راكب ورا الكاسيت في اي سي بيفصل ارضي ومش بيشغل سولونويد العصاية ودا بيتغير برضة بس لازم يتفك الاول وتشوف رقمة لانة بيفرق من عربية للتانية حسب الكماليات

4- الكلاكس بيفصل ولمبة الايرباج بتنور احيانا. المشكلة بتكون في ال spring اللي راكب علي التارة وهو عبارة عن شريط سلك بيوصل بين الدركسيون والكلاكس وباقي ضفيرة العربية وبرضة بيتغير ومتوفر.

5-السيارة فجاة مش بتدور وكل اللمبات داخل التابلوة فاصلة ماعدا لمبة البطارية وكأن بطارية العربية باظت. دي بتبقي مشكلة ماكس فيوز في علبة الفيوزات الرئيسية لحامة بيفك ولازم يتفك ويتعاد علية لحام ويتركب والمشكلة بتختفي.

المشاكل اللي اتكتب دي مش حالات فردية لكنها حالات تكررت في اكثر من 50 عربية حتي الان وسيتم تحديث الموضوع تباعا بالمشاكل الموجودة.

انا مش مستغرب ان اغلبكم ما سمعش علي المشكلة رقم 5 لانها بتحصل للعربيات وهي لسة في المعرض وبيتم اصلاح العيب قبل تسليم العربية للعميل اساسا