لمستخدمى القاهره - الاسكندريه الزراعى , احترس من الرادار الليلى !!
طبعا بما اننا بلد متقدمه ومتحضره وبنعالج مشكلاتنا بأسلوب وتكنيك رفيع المستوى حريق الدم صاروخ فى رفع الضغط امبارح الحكومه ولله الحمد ارسلتلى قرصه ودن وانا مبتسم وشفايفى من الودان للودان مش عارف من فرط الذهول ولا علشان الصوره تطلع حلوه !!
كنت راجع امبارح للقاهره من الطريق الملعون الواصل بين القاهره والاسكندريه والمسمى بالزراعى نظرا لأنه بالظبط زى الجسر اللى معدى الترعه اللى قصاد اى بيت فى اى كفر لا عليه مرور ولا نظام وبعد نصف ساعه من التوقف التام بعد كوبرى بنها نظرا لمش عارف ايه بس هو الطريق وقف وخلاص ونزلت ابص وعديت الزحمه وبرده مش شايف سبب !!
المهم طبعا الكل خرج من الزحام الكاوتش بتاعه بارد ومهندس السباقات بيكلمه على الراديو يقوله اجرى شويه علشان تسخن الكاوتش والثبات يزيد , وهو نفس الوقت اللى كانت فيه محاولاتى المستميته انى اتمسك بحد السرعه 90 كم فى الساعه بس لقيت انى بحاول الانتحار بالفزع وعاجلا او اجلا هبقى سبب تانى لوقوف الطريق فعلشان مصر ( اى والله ) علشان مصر أضطررت انى اجارى سرعه الناس كلها واللى وصلت ل 130 مع بعض العربيات النقل اللى يظهر عندها خلاف مع المقطوره لأن مشهد ان العربيه تبقى فى الشمال والمقطوره فى النص وبتحاول تسيب العربيه ده شوفته كتير جدا امبارح
ومن ثم انتهت الرحله بسلام ولله الحمد واستعدت اعصابى ولترات دمى اللى استقرت عند الدواسات فى محاوله للتغاطى عن ما يظهر من الزجاج الامامى لأجدنى فى حفله تكريم غير عاديه , الحفله كانت قبل المؤسسه مباشره قبل انقسام الطريق بين المتجه لعبود والمتجه للكورنيش لأجد الفلاش يا ناس ضرب فى وشى بكل عنف , طبعا انا ساعتها كنت ماشى بين 70 و 80 يعنى يعتبر على مهلى بالنسبه لكل الناس بس فى اللحظه دى كنت لوحدى على خط العرض للطريق وانا داخل على الكاميرا وحتما ولابد انى انا اللى اتصورت واعتقد ان المكان ده السرعه فيه 60 بأعتبارها يعنى بدايه حدود المدينه ونهايه الطريق السريع
السؤال بقا بعد كل الرغى اللى ملوش لزمه ده :E_braces[1]: , حد عنده فكره الفلاش ده هزار ولا اقيم الاحتفالات لأول مخالفه سرعه فى حياتى وثانى مخالفه بشكل عام ؟
الاولى كانت ركن ممنوع وراكن جنب الرصيف فى مكان راكن فيه 40 عربيه ومفيهوش يافطه ممنوع الانتظار :I_angr1[1]:
