يا بتاع المبيعات ......أنــــــــــــــــــــ ــــــــــا مش خرنج

**Ahmed Samy** · 04-04-2010 10:57 PM

الحقيقة انني ما كتبت هذا الموضوع الا من فرط ما استفزني اسلوب تعامل التوكيل مع المستهلك و السوق
فلأنني مستهلك و زبون للتوكيل شاء أم أبى ...قد أكون زبونا ربحه التوكيل أو أخرا خسره هذا الأخير
قد أكون زبونا اشترى من الوكيل سيارة جديدة و "كيشت" الافات من المكسب الفوري عند الشراء و قد أكون زبونا ممكن يكيش بشكل دوري عند الصيانات و شراء القطع .

المهم اني زبونك .....

نيجي للفكرة الأساسية
طبعا كلنا شفنا الإعلانات السخيفة اللي عملوها بتوع المبيعات و أنا متأكد ان الحركة دي بتاعة المبيعات مش بتاعة الصيانة لأن مستواها متطابق مع مستوى تفكير و سياسة أشاوس المبيعات اللي خسروا الشركة دي ملايين
واضح جدا ان الناس دي عمرها مالعبت شطرنج قبل كده أو كانوا بيلعبوا مع ناس "خرنجات" طول عمرهم
لأن التهديد بعدم صيانة أو خدمة الخليجي هو ببساطة حركة قرعة ...مكشوفة و مالهاش أخر يعنى العسكري ده راجع راجع يإما يتاكل .لأن غصب عن الوكيل لازم يصون أي تكتك كيا صنعته و يخدمه . وده كلام معروف ومثبت مش من دماغي .
و طبعا الإعلان عن عدم المسؤلية عن ضمان الخليجي لا يستحق حتى ثمن طباعته لأنه معلوم للجميع

أمال ده إيه !!

دول ببساطة يا سادة بيخضوا قليلي الخبرة و كبار السن و السيدات علشان يجروا يترموا تحت رجل مسؤول المبيعات "اللي غالبا بيكون تنك و رزل و قليل الذوق زي البهوات بتوع روكسي , أو غبي مش فاهم راسه من رجله زي بتوع الكول سنتر

و كمان بينافس عربية ما تنقصش عن عربيته حاجة و يمكن تزيد

طب ليه !!!

ما في فكره أحسن

ما توفر عربياتك و حسن معاملتك و اضبط مواعيدك و استفيد من الضمان المحترم اللي انت حاطه و سوق كويس
بدل ما تعمل اعلان تخوفني فيه .....ما تشدنى أكتر

بس هم أحرار و نتيجة السياسة ان الخليجي مدغدغ الدنيا و طايح في السوق

نيجي للمهم

انا زبون
اشتريت خليجي و اللي حصل حصل
ليه يا ناصح تقوللي انا مش عايزك !
وبلاش طقم الكلام بتاع الزحمة و عربياتي أولى من الغريب لأن ده كلام أخلاقي شويتين و احنا راكنين الأخلاق في السوق على جنب.
العربية الخليجى بتدفع 30 المية زيادة
العربية الخليجي ما بتتلككش على الضمان لو سمع صوت و لا طقة و لا حدفة
وكله بتمنه

يبقى مين في الصيانة الزبون المربح أكتر للوكيل !!

الخليجي طبعا
يبقى ليه بتاع المبيعات يكدب و ينصب و يبقى شكله عرة قدام الناس اللي فاهمةعلشان عايز يكسب زبون يبيعله
وممكن في نفس الوقت يطفش 10 من أصحاب الخليجي اللي كانوا ممكن يعملوا صيانات تكسب الوكيل بيع عربية جديدة ....ماهو زي ما في زبون معلوماته على قده و الإعلان خوفه و اشترى وكيل ...ممكن برضه صاحب خليجي كان ناوي يصون عربيته في الوكيل يغير رأيه لأنه صدق الكدبه

يعني واحد ما عرفتش تكسبه مشتري ...تقوم بمنتهى الجهل ...تخسره كعميل ما بعد البيع ...

اتعلمتو كده في أنهي داهية

بس هي أنانية وخلاص

المبيعات تشتغل ...و الصيانة تتحرق بجاز
هم مبيعات كيا دول دارسين مبيعات فعلا ...ولا كانو تجار عربيات ولا موبايلات و ربنا كرمهم

لأنهم الحقيقة عاملين زي العيال الصغيرة اللي بييجي على بالهم بيعملوه من غير حسابات ولا حساب تقريبا
و تقريبا اتعودوا على لعب الشطرنج مع الناس اللي قلنا عليهم

بس عموما ....أنا مش كاتب الكلام ده علشان زعلان اني مش هادخل الصيانةلأني هادخل الصيانة بعربيتي الخليجي

لأني سألت التوكيل و خدت ضمان لدخول الصيانة من المحترم مدير الصيانة شخصيا

و مش هاتنازل عن الحق اللي اشتريت العربية على أساسه

أنا بس كاتب الموضوع ده لبتوع المبيعات

انهم لازم يفهموا ان أنا و ناس كتير زيي

مش خرنج

**hugan** · 04-04-2010 11:16 PM

ممتاز يا باشا تحليل دقيق اللي ها يكسبه من الصيانه يفوق اضعاف اللي ها يكسبه من مجرد البيع فهو اجباري لازم يعمل الصيانه لان تسويق قطع الغيار اللي هو المستورد الوحيد ليها افضل بكتير

**Col. Eng. Khaled** · 04-04-2010 11:40 PM

وكيل كيا هو نفسه وكيل رينو eim-eit

الغريب فعلا إن نفس الوكيل بيقبل عربيات رينو القادم أصحابها بضمان من الخليج .

فهل المقصود تحديدا محاربة تجار كيا الخليجي داخل مصر ؟