ليه الناس بتزعل لما حد ينتقد عيوب سيارة

**N.a.j.d** · 06-04-2010 12:42 AM

ناس كتير ببتكلم عن عيوب ف عربيه واللى عنده العربيه دي بستغرب اوي

**human** · 06-04-2010 01:09 AM

انا حاجتى احسن حاجه و عربيتى ديه انا منقيها من 100 عربيه يبقى انا بفهم احسن منكم و اللى بيقول العربيه وحشه مش بيفهم و اى حد بيعيب فى العربيه يبقى حقود او ماعندوش نور البصيره اللى نور طريقى فى الليالى القاتمه و هدانى انى اشترى العربيه ديه تقوم تيجى انت و تقولى العربيه فيها مشكله لأ المشكله عند حضرتك و بس انا الوكيل بتاعى احسن وكيل انت فاكرنى عبيط زى التانيين و بعدين انا عملت دراسه مستفيضه للسوق و عارف انا بقولك ايه سيبك من الكلام ده
انا عربيتى احسن عربيه
و الكاسيت اللى عندى احسن كاسيت
انا الافضل انا الاطول
انا الارفع انا الاتخن
انا الاسرع انا التنين

الفل احلى ولا الياسمين؟

**eng_ahmedryad** · 06-04-2010 01:38 AM

المشاركة الأصلية كتبت بواسطة human12

انا حاجتى احسن حاجه و عربيتى ديه انا منقيها من 100 عربيه يبقى انا بفهم احسن منكم و اللى بيقول العربيه وحشه مش بيفهم و اى حد بيعيب فى العربيه يبقى حقود او ماعندوش نور البصيره اللى نور طريقى فى الليالى القاتمه و هدانى انى اشترى العربيه ديه تقوم تيجى انت و تقولى العربيه فيها مشكله لأ المشكله عند حضرتك و بس انا الوكيل بتاعى احسن وكيل انت فاكرنى عبيط زى التانيين و بعدين انا عملت دراسه مستفيضه للسوق و عارف انا بقولك ايه سيبك من الكلام ده
انا عربيتى احسن عربيه
و الكاسيت اللى عندى احسن كاسيت
انا الافضل انا الاطول
انا الارفع انا الاتخن
انا الاسرع انا التنين

الفل احلى ولا الياسمين؟

ههههههههههههههههههههههههه

لأ دا أنا مره قريت واحد بيقول لواحد أنت بتنتقد عربيتي علشان منفسن منها ، في حد في الدنيا بينفسن من شوية حديد وبلاستيك وكاوتش وزيت وبنزين ، فعلا كانت جديدة عليه .

**doctor_eid** · 06-04-2010 01:40 AM

المشاركة الأصلية كتبت بواسطة human12

انا حاجتى احسن حاجه و عربيتى ديه انا منقيها من 100 عربيه يبقى انا بفهم احسن منكم
..........

الفل احلى ولا الياسمين؟

التمر حنة

شكرا على التعليق الذكي
و الف سلامة لآدم
مع تحياتي
د.عيد

**mr_sameh** · 06-04-2010 01:44 AM

ياباشا الموضوع ده طبيعه بشريه

**M.Mosaad** · 06-04-2010 10:01 AM

الحكم المطلق علي الاشياء دة طبعنا ياما احسن حاجة ياما اوحش حاجة و مينفعشي حد يعدل علي رأي حد او يعيب في حاجة حد

العربيه الناس في مصر بتجيبها بصعوبه بالغه زي الشقه كدة يعني معظم اللي بيجيب عربيه بيغيرها بعد 10 او 15سنه فمعني ان حد يوقله انها وحشة او اضحك عليه فيها معناها انك بتقوله انك هتقعد 15 سنه مضحوك عليك

**Eng.Sameh** · 06-04-2010 10:18 AM

الفكر الديموقراطي ووقبول الآخر والأعتراف بالعيوب الخاصة بك او بما تمتلك .. قيم غير متأصلة في حياتنا كشعب بصفة عامة !!!

**أشرف العدوي** · 06-04-2010 10:54 AM

قسم شيفروليه العكس تمامأ و خصوصاً السيارة الأفيو
الي بيدافع عنها بيتهاجم من ملاكها زي حلاتي كدة
لان الي بيدافع يا اما مش عنده يا اما لسة جايبها جديدة مامشيش بيها 2000 كم على بعض

**ahmed-moga** · 06-04-2010 10:57 PM

فعلا انا شوفت الموضوع ده كتير هنا في المنتدي في عده أقسام

ومش كده كمان اللي يقول ويطلع عيب في عربيه معينه يبقي عدو النجاح

ويبقي جاي من توكيلات تانيه علشان يشوه سمعة العربيه

يعني فالنفرض ان شخص فعلاً اشتري عربيه وطلع فيها مشكله

وعايز ينصح الآخرين بكل صدق من العربيه دية ومن هذه المشكله

الزملاء الآخرين بيقوموا بمهاجمة بكل ماأوتوا من قوه ويطلعوه

عدو النجاح وهو الغلطان ومش بعيد يعملوا مواضيع يتريقوا

علي اللي بينقض العربيه بأسلوب ساخر ومستفز جدا بس

بيكون بصوره غير مباشره زي مثلا في قسم من الأقسام

واحد عامل موضوع ساخر عن ان شبكه الموبيل بتفصل

وده نتيجه سوء المقصات والمساعدين في العربيه وخد سخريه

من كل عضو يخش علي الموضوع ليضيف لمسة السخريه الخاصه به علي الموضوع

ياجماعه مش كده ربنا يباركلكم في عربياتكم ويبعد عنكم كل شر

بس أعلموا جيدا زي ماأصباعكم مش زي بعضيها كذلك السيارات مش زي بعضها

ديما بيبقي فيه أختلاف في المنتج الواحد يعني لو عندك عربيه

مفهاش مشكله فده ميمنعش ان ممكن يكون في مشكله في عربيه

تانيه نفس موديل وماركة عربيتك وصاحبها بيشتكي منها

فنصيحه أخويه سيبوا اللي عايز يتكلم يتكلم طالما ان عربيتك

كويسه وعجباك ومتخليش حاجه زي كده تزعلك وتخليك تكتب اللي يزعل منك الآخرين

وربنا يباركلكم في عربياتكم وفي شقي عمركم