الموضوع: ليه الناس بتزعل لما حد ينتقد عيوب سيارة

السلام عليكم
عايز اوضح نقطة مهمة. انا باشوف ناس هنا في المنتدى بتتكلم و تدافع عن العربية اللي هي راكباها و لو حد جاب سيرة عيب فيها يبقى مصيبة سودة و نرفزة و ردود قاسية و عصبية و الموضوع مش مستاهل. انا مقدر كويس ظروف اللي اشتري عربية و يا سلام لو جديدة و دفع دم قلبه فيها و فرحان بيها و بعدين ييجي واحد من الناس يتتريق عليها او يستهزأ بيها. و ساعتها صاحب العربية بيحس ان السخرية و الإستهزاء ده كأنه موجه ليه شخصيا. و بيرد بعنف لأنه بيكون بيدافع عن سلامة عقله و صحة قراراته اللي خلوه يشتري العربية دي اللي الناس بتتريق عليها.
و الحقيقة ان الموضوع مفروض يكون ابسط من كده بكتير. كل واحد بيشتري عربية بيكون له احتياجات و عنده امكانيات. لو العربية دي لبت احتياجاته في حدود امكانياته يبقى تمام كده. مالوش بقى دعوة ان كذا احسن منها و لا كذا فيه كماليات زيادة عنها. يعني لو كان بالإمكان كنا كلنا ركبنا بي ام و لا مرسيدس و لا كاديلاك. انما و طبيعة الأمور على ما هي عليه لابد ان يكون هناك من يركب الأنواع الأخرى من السيارات.
يبقي خلاصة الموضوع ان اللي عاجباه عربيته وملبية طلباته و مبسوط منها الف مبروك عليه. انا مثلا شفت موضوع هنا عن اللادا واحد صاحبها عمال يقول فيها شعر و انها وحش الطريق ووووو.........الخ. موضوع تاني كان عن واحد بيمدح في السوزوكي التو و طاير بيها. فيه ناس في اقسام الصيني بتاكل اللي يتكلم عن الاسبرانزا كلمة . و مرة كنت باتكلم مع مريضة عندي و باقول لها تريح و ما تمشيش كتير قالتلي لا ده انا باروح كل حتة بالعربية و مرتاحة عالآخر. طلعت ابص عالعربية دي تطلع ايه لقيتها سيات من بتاعة زمان اللي بموتور ورا. بالمناسبة لسة شايف واحدة على الطريق الزراعي ماشية زي الباشا و صاحبها ساند الكبوت(الخلفي) بخشبة علشان الموتور يتهوى.
بس ما حدش من اصحاب السيارات يزعل او يتضايق ان حد يقول رأيه في نوع العربية اللي راكبها و يذكر ما يرى انه عيب فيها.. ببساطة لو الكلام مش عاجبك و عندك رد موضوعي غير منفعل قوله. لو ما فيش رد مناسب غير منفعل اقلب الصفحة، اعمل Back ، شوف لك موضوع تاني. المهم بلاش نمسك في خناق بعض بدون داعي. طبعا مع الأخذ في الإعتبار ان اللي بيوجه النقد يراعي مشاعر الناس في كلامه و يكون موضوعي و غير جارح.
ملحوظة:
انا باجهز في تقرير البلو بيرد سيلفي و هينزل قريب جدا. و اللي هيجيب سيرتها بكلمة كده و لا كده هاوريه شغله.
مع تحياتي
د. عيد