الموضوع: استفسار بخصوص زيت الموتور

المشاركة الأصلية كتبت بواسطة political_tika88

اولا يامهاب باشا حضرتك بنفسك بترد عليا وانا من اشد المعجبين بحضرتك وكنت شفت حضرتك مرة على طريق محور 26 يوليو وكان نفسي اسلم عليك انتا عربيتك واجا سودا تقريبا
تاني حاجه الموتور بحس صوته عالي مع الموبيل هل بيبقى افضل مع الشل هيليكس الترا وايه افضل مكان احط منه زيوت شل انا في بنزينه جنبي في مكرم عبيد
وشاكر لحضرتك كتير جدا والاستاذ رامي والاستاذ هشام والاستاذ محمد صفا
هل مشكلة الكهربا دي ممكن احلها في مركز تشيك بوينت بتاع فيصل لو حد جربه
وشكرا

يا باشا ربنا يخليك شكرا على زوقك .. انا معملتش حاجه استاهل عليها كل الكلام ده

فعلا انا بمشى على المحور كتيييير و عربيتى لونها باذنجانى غامق " و لو متربه بتبان انها سوده فعلا " ... ياريت كنت نبهتنى لما شوفتنى على الطريق , عموما ملحوقه فى اقرب مقابله ان شاء الله لازم اتشرف بمعرفتك .

بالنسبه لعلو صوت الموتور ... موتور الميتسوبيشى 4g18 فى العموم صوته عالى ... بطبيعه الحال صوت الموتور بيهدى شويه مع تغير الزيت لكن لما الزيت بيقدم و تمشى بيه صوت الموتور بيعلى شويه .

انا مجربتش موبيل فى عربيتى ... لكن كل اصدقائى الى نصحتهم ب التغير لشيل بدل موبيل .... قالو انه افضل منه بشكل ملحوظ ... اولا فى صوت الموتور , ثانيا مش بيتحرق بسرعه و بيحافظ على لزوجته لفتره اطول , ثالثا ممكن تقعد بيه اكتر من 10 الاف ... انا وصلت بيه ل12 الف و كان لسه كويس .... و واحد صاحبى سايبه دلوقتى فى العربيه و عامل بيه 15 الف و لسه كويس !!

بالنسبه لمكان التغير ... اى بنزينه شل مضمونه .. فغيره فى اقرب بنزينه شل ليك .

مشكله الكهربا ممكن تتحل ان شاء الله فى ورشه فيصل بس لازم الاول تكلمهم و تفهمهم على المشكله علاشان يكون فى حد مستنيك .. علاشان ماتروحش على الفاضى و تضرب مشوار خصوصا ان الشارع بتاعهم مكسر حبتين تلاته .

و تحت امرك لو عندك اى استفسار

المشاركة الأصلية كتبت بواسطة msafa

منور يا مهاب باشا، واضح انك بتلف بالعربية كتير، لما كنت في ورشة فيصل بكشف على عربيتي قبل ما اشتريها شوفتك و بس كنت مركز مع الناس عشان العربية ولما خلصت لقيتك مشيت

اشوفك في المقابلة اللي جاية ان شاء الله

انا على فكرة كنت بدأت اخاف على الموتور بعد ما حطيت شل الترا عشان العربية عاملة 80000 كيلو و بعد ما حطيته ناس كتيرة قالتلي هات ال 5000 احسن لدرجة ان فكرت اغيره بعد اقل من الف كيلو

ده نورك يا باشا والله

ابدا انا مش بلف كتير ولا حاجه ... هو تقريبا انا الى حظى حلو معاكم انا فعلا فاكر انى شوفت عربيتك الويرا فى الورشه فى اليوم ده ... بس انا فعلا مقعدتش كتير و مشيت فمكانش ليا الحظ انى اتشرف بمعرفتك , بس الجايات اكتر من الرايحات .. نتقابل على خير فى المقابله الجايه ان شاء الله .


.... بالنسبه لموضوع الزيت ... صدقنى كل ده كلام مش مظبوط و مالوش اى ساس من الصحة

طلاما موتورك سليم و الزيت مش بينقص يبقى مافيش اى مشكله من استخدام الزيت التخليقى

و حنروح بعيد ليه .. عربيتى دلوقتى عامله 97 الف كيلو و صاحب عربيتى الاولانى كان بيحط زيت توتال 5000 المعدنى و بعد ماشتريتها منه غيرت ل هيلكس بلس النص تخليقى ال7000 كيلو " وبعد كده غيرت ل هيلكس الترا ال 10000 و الحمد لله مافيش مشكله .

ليه الزيت التخليقى حيبوظ الموتور او حيأثر عليه اذا كان من اهم اهدافه هو حمايه الموتور فى اقصى ظروف التشغيل ... و الكلام ده مع اى نوع مواتير حتى القديمه .

كمان من ميزات الزيت التخليقى انك بتضاعف مسافه السير بدون ماتغير الزيت ... و لو حسبناها حنلاقيها انها نفس التكلفه ... غيارين زيت عادى كل 10 الف كيلو = 200 جنيه + تمن الفلترين 30 *2 بـ 60 جنيه = 260 جنيه .
الزيت التخليقى كل10 الف كيلو 230 جنيه + فلتر الزيت 30 جنيه = 260 جنيه


الزيت التخليقى بيبقى غير مُجدى لو الموتور بايظ و بياكل زيت ... لان الزيت حينقص بشكل ملحوظ و على ال10000 كيلو حيكون الموتور مفهوش نقطه زيت ... فى الحاله ديه لازم الزيت العادى المناسب لحاله الموتور .

المشاركة الأصلية كتبت بواسطة msafa

والله طمنتني ربنا يطمنك كمان و كمان
كنت عاوز أسألك صحيح
صيانة ال 80000 بيتعمل فيها ايه
السيور و الفلاتر اتغيرت ف 60000

صيانه ال80 بيتغير فيها الاتى

- بوجيهات
- زيت فتيس
- زيت باور
- زيت الفرامل
- زيت الموتور مع الفلتر
- سائل التبريد " ميه الريداتير "
- فلتر بنزين " بيتغير كل 20 الف كيلو "
- تنظيف فلتر الهواء

و تعمل اتشيك على : تيل الفرامل , كاوتشات الكوبلن , كاوتشات علبه الدركيسون " مهم جدا " و تربط عفشه .

* الافضل تغسل الشاسيه من الطينه ... لانها بتسبب بارومه .